اوخشامالار اؤلوم و تراژدی ایله باغلی یانیقلی ، نیسگیللی شعرلردیر . بونلار عوموما یاس مراسیمینده اوخونار . بیر پارا آغیلار فورم باخیمیندان بایاتی کیمیدیر و اونو بایاتیدان آییران جهت ایسه اونون غملی، کدرلی مضمونودور.

آغیلارین بیر سیراسی ایسه نثز پارچالاریدیر مثلا وفات ائدن دؤیوشکن گنج اوغلان اولورسا آغینین باشلانقیجیندا بئله سؤزلر اوخویارلار:

وئردین ، دوشمنینه دیرسک گؤستردین ، قنیمینینه قان اوتدوردون، …. آلتی نین بئدوو

آتینا ، چیینی نین سوزن توفنگینه، ترکی نین خورجونونا، آغزینین کسرلی سؤزونه آنان

قوربان یا خود تزه گلینه بوخچادا قالان پالتارلاریوا آنان قوربان

دده قورقود کیتابیندا دا آغیلارا راست گلمک اولور،

وای آل دوواغیم ییه سی

وای آلنیم باشیم اومودو

وای شاه أیگیدیم

دویونجا اوزونه باخمادیغیم خانیم أیگیت

هارا گئتدین،منی یالقیز قویوب؛ جانیم أیگیت .

گؤز آچیبان گؤردوگوم،

کؤنول وئریب، سئودیگیم

بیر یاسدیقدا باش قویدوغوم

یولوندا اؤلدوگوم،قوربان اولدوغوم

وای قازان خانین ایناغی،

وای قالین اوغوزون ایمرنجیسی بئیرک.

باشقا اؤرنکلر

آغاجدا خزل آغلار،دیبینده گوًزل آغلار.بئله اوغلو اؤلن آنا،سرگردان گزر آغلار

کوچه ده خونچا گئدر،ایچینده نیمچه گئدر.عالمین گولو گئتسه،بیزیمکی قونچا گئدر.

آغلایان باشدان آغلار ،کیپریکدن ،قاشدان آغلار،قارداشی اؤلن باجی،دوروب،اوباشدان آغلار.


هر یئرده دومان گوًرسم،غوصه یه یانان گوًرسم،اورک یانار،آلیشار،اوجا بوی جاوان گوًرسم.

قیزیل گول کولدا قالدی،درمه دیم کولدا قالدی.دوشمن ائوین ییخیلسین،گوًزلریم یولدا قالدی.

گوًرونن داغلار ایمیش،اوستونده باغلار ایمیش.آنا بالادان آیری،نه یامان آغلار ایمیش.

گوًزوم قالدی یولوندا،قان دوردو ساغ –سولوندا.بالا آنان اؤله یدی،یارا واردیر قولوندا.

آهولار تک ملرم،اوزه قان یاش الرم.قانا باتمیش بلگین،گاه آچیب،گاه بلرم.

هیجرینده آغلارام من،عالمی داغلارام من.اوتاغیوین قاپیسین،هی آچیب،باغلارام من.

بولبول گولشنه گلدی،نه گلدی ،منه گلدی.منی گوًرنلر دئییر:اوغولسوز ننه گلدی.

داغلار داغیمدیر منیم،غم اویناغیمدیر منیم.دیندیرمه قان آغلارام،یامان چاغیمدیر منیم.

کؤینگیوی یومارام،ایسلاتمارام،یومارام.بوش یئریوی گؤرنده،گؤزلریمی یومارام.

عزیزیم اولو داغلار،چشمه لی ،سولو داغلار.بوردا بیر ایگید اؤلوب،گوًی کیشنر بولود آغلار.

میاندابدا ثبت اولان آغیلار

من اؤلدوم آغلاماقدان،

باغا سو باغلاماقدان.

باغدا یارپاق قالمادی

یاراما باغلاماقدان

اوتای بوتایا باخار ،

آراسیندان چای آخار.

چیخسین منیم گؤزلریم

سنسیز دونیایا باخار

آناسی یانار آغلار،

حریفی قانار آغلار.

آنا دئییر گؤورچین

تابوتا قونار آغلار .

قایناق: تورک خلق ادبیاتی – یازان: علیرضا صرّافی

Print Friendly, PDF & Email