باهاسیز داشدی دونیا
چؤروک آغاشدی دونیا
هارا باخیم خوش اولوم
بوتون قان یاشدی دونیا
پنجره میز یان – یانا
یاردا چیخیب ایوانا
من باخیرام او باخیر
قالمیشیق یانا – یانا
داغلارین باشی قارا
دیبی نین داشی قارا
بوردا بیر قیزسئومیشه م
آلا گؤز ، قاشی قارا
عزیزینه م یار – یارا
کباب باغریم یار – یارا
دیز تیتریه ر قان قاچار
یئتیشنده یار – یارا
آغ آلما قیزیل آلما
بشقابا دوزول آلما
بولسه یدیم یار گؤندریب
ساخلاردیم یوز ایل آلما
من عاشیق قار قامیشا
یاغیبدیر قار ، قامیشا
یوز دیل آغیز نئیله سین
بیر الله قارقامیشا
گل گئدک داش بولاغا
سویو سرخوش بولاغا
بیرین سن دئه بیرین من
تؤکک قان یاش بولاغا
دسمالا آلما قالا
باشینی سالما قالا
نامرد ایله دوست اولما
دوشرسن قالما قالا
اوجادیر بیزیم قالا
درد گئتمز یوز ایل قالا
بد اصیل ، اصیل اولماز
بویونجا قیزیل قالا
اوجاغی یاخشی قالا
اودون قوی یاخشی قالا
نه اولار بو دونیادا
پیس اؤله ، یاخشی قالا
عزیزیم گول باغدا
بلبل باغدا گول باغدا
سنسیز باغا گیرمرم
خزان اولا گول باغدا