یوردوموزون ، درین دویغولو شاعری ، خلقیمیزین دردلرینی ترنم ائدن استاد حبیب ساهر ین یارادیجیلیغینی ، 1320 ایللریندن بویانا دیلیمیزه کونول ویرنلر تانیر و قیمت ویررلر.
او آریامهر کابوسونون حاکم اولدوغی اوزون ایللر بویونجا داسوسمادی؛ «وارلیق» بوردا شاعرین «خزان» شعریندن بیرپارچانی اوخوجولارینه ارمغان ایدیر.
بیر چوخ خزان
گلیب، کئچدی
بیر چوخ کروان
قونوب، کؤچدو.
بیر خزاندا
یئتیم قالدیق.
بیر خزاندا
سئودالاندیق.
اَن نهایت
خولیالارین هاواسیندان
قانادلاندیق.
بیر خزاندا
پارلاق قیزیل گونش دوغدو.
بیر خزاندا
بولود گلیب گونو بوغدو
آنلایارکن خزانلاری
زامان بیزی قووالادی
گلدی زامان، کئچدی زامان
آیری دوشدوک یوردوموزدان.
حسرت قالدیق
سَرین-سَرین بولاقلارا
گول-چیچکلی اوتاقلارا
زامان کئچدی، بیز قورودوق
سوسوز قالان آغاجلار تک.
طراوتدن سالدی بیزی،
بیلمم غربت؟
یوخسا فلک؟
قایناق : وارلیق ، آیلیق فرهنگی آذری فارسجا نشریه ، سایی 2 اینجی 1358 جی ایل ین خرداد آیی
مطالب مرتبط
آذربایجان ادبیات تاریخینه بیر باخیش (3)
بایاتیلار (دوبیتی های ترکی آذربایجانی)
مجمع الخواص دیوان و منشآت – صادقی افشار