عؤمرۆمۆز، ایندی باشا بیر پری سئوداسی ایچون
حئیف اولا، قالمادی گؤز نوری تماشاسی ایچون
عاشیقین قلبی کیمی، غونچه گۆلۆن رنگینه باخ!
باغرینی قان ائلله‌میش بلبل شئیداسی ایچون
اولدو رسوای جهان، دۆشدۆ بیابانلارا قیس
آلدی مجنون آدینی دهرده، لئیلاسی ایچون
جان دئییب جان ائشیدین وامق و عذرا کیمی سیز
دۆزدۆ مین دردلره وامق نئجه عذراسی ایچون
بی‌وفا دلبـره بئل باغلایین دونیاده
سیزی بدبخت قیلار پوچ تمنّاسی ایچون
پاک اولون، دۆز دانیشین، مهر و وفا اهلی اولون
یازمیشام بو غزلی تکجه بو معناسی ایچون
غم هجرانی وئریب روزی خدا محزونه
باشقا نعمت نه وئریب عاشیق رسواسی ایچون؟
م. ع. محزون
مطالب مرتبط
بوگوندن صاباحا
بازگشت – شعر از پرفسور غلامحسین بیگدلی
دیلیم – مجیدزاده