وارلیغیم نه دیر؟ آنا تورپاغیم
اوستونده يئلله نن اوچ رنگ بایراغیم
اودور ياراشيغيم، اودور ياراغيم
قوچاقلار اویلاغی آذربایجان!
آلوولار ایچینده یانیب – یاندیران!
وارلیغیم، باغلی دیلیمدیر منیم؟
قولومدا یئر سالان زنجیر دیر منیم؟
یوخ دئییل آزادلیق یولومدور منيم!…
منیم وارلیغمی دانانلار بیلسین
هم ده قایغیما قالانلار بیلسین
وارلیغیمی یاغی آلمیشدیر سادا
خلقیمی محنته سالمیشدیر سادا
آياغيم بخوودا قالمیشدیر سادا،
کدرلی گونلر کئچیرتدی ائلیم
دردیمی دئمگه اولمادی دیلیم.
هر اوچان قوشون یوواسی واردیر
ایسترسه گئینش ایسترسه داردیر
قوش دایوواسیندا شن دیر آزاد دیر.
ئوز یووامدا من قفسده قالدیم
آغیر غملر ایچره دويغویا دالدیم
ییلمه دی باغی واردیر قاناتیم
آزادلیق اوغروندا چاپماغا آتیم
دورت نالا چاپارام آچیلسا قاتیم
بابکلر منیم قهرمانیمدیر
مشروطه آلان ستارخانیمدیر
«شهریار» دئدی «حیدربابا» سین
بویوک شاعرین آلیم قاداسین
او ییخدی شعریله دشمن قالاسین.
اولدو ائلیمین دیللر ازبری
سیلیندی گونلومون بیر آز کدری
«سهند» ده ائتدی آلوولو و ولقان
شعریله یاراتدی ئولکه ده طوفان
قلبینده اویاندی اودلو بیر عصیان
یاندی اوره گی، آلوو اوجالدی
وطنه پارلاق ایشیقلار سالدی
قوجامان «ساهر» گوزل شعریله
اوره ک سوزلریمی دئدی یئریله
عشقله جوشغون اثرلریله
ائلیمه دیلیمه جان باغیشلادی
باغدا، چمنده گول ناخیشلادی
مینلرله شاعر گلدی هارا یا
زلزله دوشدو چیرکین سارایا.
قصرین آلتیندا تیتره دی قایا
شاهین قورخودان باغری چاتلادی
قووق دک قلبی غمدن پارتلادی
امر أتدى ساواکا، تا هجوم أئتسین
ینه ده آختاریش هریانا گئتسین
کتابلار بیغیلسین آرادان ایتسین
آذربایجان خلقینین قاتلیینه
کسدی دیلیمیزی او دونه دونه
اللی ایل قاباق قولدور رضاخان
سوردو آتینی سویله دی قان قان!
اولدو خرابه لیک آذربایجان.
یوردوندان دیدور گین دوشدو ایشچیلر
قویمادی توخویا قالی، فرشچیلر
ده پیشمک ایسته‌دی آنا دیلیمی،
سویوب داغیتدی اصلان ائلیمی،
قویمادی خوش کئچه هیچ بیر ایلیمی،
قارانلیق چوکدو بیزیم دیارا
ووردولار خلقینه هرگون بیر یارا
رضاخان اوغلودا باسغین گتیردی
مینلرجه جنایت باشا یتیردی،
اولدوردو، کسدی، باسدی، ایتیردی
چوخ اوخلار ووردو قلبینه ائلین
کسمک ایسته‌دی کوکوندن دیلین
رضاخان ئولدو، اوغلودا قاچدی
یوردو مداینه ده گول، چیچک آچدی
گونش وطنه، ایشیقلار ساچدی
حقیقت پارلادی، باطل پوچ اولدو
وارلیغیم قالدی، حق سیز، هیچ اولدو.
وولقان
مطالب مرتبط
ای دریاچه زیبایم! با من بگو با تو چه کردند؟
«عاشق امراه» داستانیندان بیر قوشما
تاپماجا، چیستان های ترکی + جواب