دیلیم – مجیدزاده

دیلیم

ای منیم هر نییم، هر نه دن عزیز

دویورام جسمیمه سنی جان دیلیم

دادیوین یانیندا جان نه دیر بئله

سن منه شیرین سن جانیمدان دیلیم

سن منیم وارلیغیم، شرفیم، شانیم

دوزلوگوم، دوز سوزوم، آری ویجدانیم

سنسن داماریمدا دولانان قانیم

قلبیمه وئریر سن، ایستی قان، دیلیم

ای بؤیوک اولوسون آناسی، آنام

اوغوز ائللریندن قالان نیشانام

آنجاق من سنین له تولمز اینسانام

سنسن بو باغریمدا چیرپینان، دیلیم

گل گنده ک آناجان، ائلیمه ساری

سن ایله دیری دیر اودالار دیاری

داغلارین باشیندا اولان آغ قاری

اوزون آغلیقیندان بیر نیشان، دیلیم

هر دن بو دیاردا بیر مشعل یانیب

او مشعلدن بوتون شرق ایشیقلانیب

تاریخین گونونده بو سوز جانلانیب

نسیمی سی حق سیز سویولان، دیلیم

یازمیرام سوز قوشان بؤیوکلرینی

شمس، قطران، نیظامی، افضل الدینی

چون یاخشی قانماییب هیچ اونلارسنی

قوی تأسف قیلیم اونلاردان، دیلیم

دئمیش اسکیلردن بونو بابالار

یوردونو، دیلینی آتان اوبالار

بیرگون آنجاق دیلسیز، دیدرگین قالار

اولماز آرتیق سنه یاراشان دیلیم

اصیللر هیچ زمان اصلین ایتیرمز

دوز اوغول آنایا کدر گتیرمز

یادلارا دوشسه ایش، ثمر یئتیرمز

آنجاق سن گئنده آتمیرسان دیلیم

دبیر من عزیز دیرمنه هر بیری

هرهانسی اولسا وار اوزونون یثری

هانی (نیظامی) تک سوز پیغمبری؟

دئیرم – حیف اولا بونلاردان دیلیم

شاعیر کی سوز قوشار، اوخشایار ائلین

صیقللر، پارلادار ئوز دوغما دیلین

اگر سوز باغیندا عطیرلی گولین

اولار دوشونجه نی دورولدان، دیلیم

شرفلی بیر اوغول او بؤیوک داهی

غزل دونیاسی نین جلالی – جاهی

(فضولی) آدلانان شعرین آللاهی

بئله بیر اوغولا جان قوربان دیلیم

یادیما سالیرام کنجیب توته نی

بؤیوک آغ ساققالی، (قورقوت ده ده) نی

یازدی (اوغوز) لاری، چوخ سئودی سنی

او دور کی عزیز دیر هر زامان، دیلیم

او، یازمیش چوخ اولو با بالاریمدان

ایگیت یاشایشلی شن دیاریمدان

(اوروزلو) (قازانلی) روزگاریمدان

وفالی قاراجیق چوباندان، دیلیم

یازمیرام سیاکسار، آتروپاتیمدان

اسکی چاق، مدیالی پولاد قاتیمدان

یازیرام خطائی، آری زاتیمدان

سنیله یازیبدیر بیر دیوان دیلیم

بابکله جوانشیر ایگیت قهرمان

ایشلری سئچیلمز قوچ کوروغلودان

دئیه ردیم بونلارا تای اولماز اینان

زامانی – زامانا جالاسان دیلیم

زامانلاری توکوب آراسان دیلیم

آنجاق هر ایگیدین بیر دورانی وار

تکجه هر ایگیددن یاخشی آد قالار

وار نبیم، هجریم، ایگیدیم ستار

او محکم آرخاداش باقرخان دیلیم

ساوالان، چنلی یم، باشیمدا قاردر

میلیونلارجا ماهنیم، بایاتیم واردر

آغ گوندور ئونومده گوللو باهاردر

ای سازلی عاشیقلی، تار کامان دیلیم

عزیزیم قارا گوزلر

با خیرسان هارا گوزلر!؟

قوللارین سال بوینوما

چاتدیق ایلقارا گوزلر

تهران-ح-م- ساوالان