استاد شهریارین آذربایجانین معروف خلق قهرمانی قاچاق نبی حقنده یازدیغی شعری قاچاق نبی داستانیندان آلدیغیمیز پارچالارلا بیرلیکده یاییریک.
نبی و اونون حیات یولداشی هجرین خلاصکار و ایگیت سیماسی آذربایجانین کندلی عصیانلارینین جانلی حماسه لریندن در
قاچاق نبی داستانیندان :
نبی چیخیب سیلدیریمین داشینا
دوستون – آشناسینی ییغیب باشینا
آینالی تفنگی باسیب دوشونه
قوی سنه دئسینلر آی نادان نبی
دیوانی یئریندن اوینادان نبی
نبی نین گؤزلری آلادی آلا
قوچ نبی اولوبدی دشمنه بلا
نبینین مسکنی اوجا بیر قالا
قوی سنه دئسینلر آی قاچاق نبی
هجری ئوزوندن آی قوچاق نبی
نبینین قاشلاری قارادی قارا
دشمن اوره گینه ووروبدی یارا
بگلری خانلاری گتیریب زارا
قوی سنه دئسینلر آی نادان نبی
دیوانی الینده اوینادان نبی
نبی نین بوغلاری ائشمه – ائشمه دی
پاپاغی گول له دن دئشمه – دئشمه دی
نبینین بوز آتین هئچ آت گئچمه دی
قوی سنه دئسینلر آی نادان نبی
تفنگی هاوادا اوینادان نبی
نبی نین بیرچگی اویما – اویمادی
او هجردن هجر اوندان دویمادی
قیردی دشمنلری بیرین قویمادی
مرد ایگیتلر داردان قورتارار نبی
دشمن اوسته گول له یاغدیرار نبی
استاد شهریاردان :
قاچاخ نبی
دور قفس قاپوسین بیر آچاخ نبی
قوشولاخ قوشلارا بیراوچاخ نبی
قازامات (زندان) ایسیدی یاتا بیلمیسن
آنالار بشیگین ساتا بیلمیسن
آتالار یوردونی آتا بیلمیسن
غیرتون قربانی آی قوچاخ نبی
اون بش ایل گاورین ظلمینه دوزدون
هر نقشه چکدیسه نقشه سین پوزدون
شیمدی که اوبادان ائلدن ال اوزدون
غم یوکون چاتمیشام دور کچاخ نبی
دورت بیر دوره میزی سالداتلار آلدی
قالالار اوجالدی قارانلیق سالدی
زندانون ایشیق سیز، گونشسیز قالدی
همتون اوجادیر، دام آلچاخ نبی
بيركسون قالميوب ياريولداشدان
قالسادا نایشادير دویماز اویناشدان
گجه لی آشمالی بوداغدان، داشدان
زندانی قاز میشام دور قاچاخ نبی
ددين بس وطنده، سابق وطندير
گوردون که دوستون یوق هپسی دشمندیر
وطندن قالان بيرقوری کوشندیر
اوندانداال چکیپ و از گچاخ نبی
چوللرده چکمیشدیم وطن ذلتين
گریمیش ئوزینده چکیم غربتين
قيريرام وطنين ، ابهين ، الفتين
جگردن آیریلمیر، بیر پیچاخ نبی
وطندن دویمشام نبی قيناما
دور گدك بوخالقی آرتیق سیناما
دور گوروم بوآغاج بنزیـر آنــامـا
تلیندن قوی تریم بیرساچاخ نبی
ها رالی اولمالي ، بيله بيلمديك
قانلارین لکه سين سيله بيلمديك
بیرده بیز بویانا گله بي لمديك
آرازین سویوندان بیرایچاخ نبی
غيرتون قربانی آی قوچاخ نبی
مطالب مرتبط
ترهاتا اینانما – استاد ساهر
مولوی دن فارسجا – تورکجه بیر شعر
شفاهی خلق ادبیاتی