گؤزوم یولدادیر – احمد جواد

آ دوستلار ، بیر قومرال ترلانیم اوچدو

یوللاردا یولوم وار ، گؤزوم یولدادیر

اون بئش گون آیریلیق ، اون بئش ایل کئچدی

اؤلدوردو انتظار ، گؤزوم یولدادیر.

هانی منیم آرخام ، قولوم – قانادیم

حؤرمتیم ، عزتیم ، شؤهرتیم ، آدیم

قارداش برابری گؤزل آروادیم!

سؤیله یین ، دورنالار ، گؤزوم یولدادیر

گئتمیشدی اون گؤنه ، چیخدی اون بئشه

نئچین سالدی منی بئله تشویشه؟

دئمه دینمی ساقین(چکین) ، کؤنلوم بیر شوشه

گئج گلرسن ، سینار ، گؤزوم یولدادیر

او کی وئردی سنه هم وار – یوخونو

قلبینه ساپلادین هجران اوخونو

یاستیغیندان آلدیم گؤزل قوخونو

یاستیغین گول قوخار ، گؤزوم یولدادیر

ای وفاسیز ، سنین اوره گین داشدان

نئیچون سؤیله مه دین ، گولوم ، بوباشدان

” یاری آز سئویرم قوهوم – قارداشدان “

قوهوملو بَختَوَر ، گؤزوم یولدادیر.

احمد جواد (1937-1892)