زبانحال امام حسین(ع) درکنار قبر جدش حضرت محمد(ص)

قالانمیرام مدینه ده ، ایا رسول مصطفا

ایاقه دور مزاریدن ، بالان حسینی سال یولا

آتام ، آنام ، فدا سنه

دور ایله بیر دعا منه

حسین گلیبدی روضه وه ، وداع لشیر بو قبریله

اوزاق دوشور مدینه دن ، جهاندا زور و جبریله

تحمل ایلیه ر بالان ، بو مشکلاتی صبریله

بالان گئدیر مدینه دن ، خدای حی یه آند اولا

آتام ، آنام ، فدا سنه

دور ایله بیر دعا منه

شهید اولوبدوی قارداشیم ، عزالیدور تمام ائلیم

حسن گئدیبدی دونیادان ، سینیبدی شیشه تک بئلیم

مزارینی سیلنمیرم ، قالار اورکده نیسگیلیم

همیشه دار دونیادا غریب اولوبدی مجتبا

آتام ، آنام ، فدا سنه

دور ایله بیر دعا منه

گورورسن ای رسول حق سنین یانیندا حاضیرم

گوزومده یاش اورکده غم ، مزاره پاکه زائیرم

اقامتیمده وار خطر ، گره ک گئدم مسافرم

اولوبدوی ایندی مقصدیم ، کنار خانه خدا

آتام ، آنام ، فدا سنه

دور ایله بیر دعا منه

من ایستیرم بو شهریدن جوار بیته یول سالام

طواف کعبه دن سورا ، کنار بیتیده قالام

بالان حسینی دن سنه ، اولور بو آخرین سلام

چیخیر مدینه دن گئجه ، حرم لریله بی صدا

آتام ، آنام ، فدا سنه

دور ایله بیر دعا منه

خلافت آل سفیانا بویورموسان حرامیدی

حسین ولی کردگار سنین له هم مرامیدی

کلامیون پیام لاری ، دلایل قیامیدی

سفینه ی نجاتیدی جهاندا ، پور مرتضا

آتام ، آنام ، فدا سنه

دور ایله بیر دعا منه

بنی امیه بیز لره ائدیبدی ظلم بی حساب

اوره ک دولوبدی قانیله ، اولوبدی باغریمیز کباب

جنایت یزیدیدن ، ولایتین ائوی خراب

محالیدور بو وضعیده ، شریعتیله ، دین قالا

آتام ، آنام ، فدا سنه

دور ایله بیر دعا منه

هلاک اولاندا معاویه آپاردی قبره لعنتی

یزید گلیب ایش اوستونه ، آیاخلییب شریعتی

چیخیبدی تخت قدرته ، سیخیبدی حلق امتی

ایچیب شرابی کئف لنیب ، بو دونیادا او بی حیا

آتام ، آنام ، فدا سنه

دور ایله بیر دعا منه

بزم ولید شومده ، یزیده بیعت ائتمه دیم

امین شرع و مذهبم ، دینه خیانت ائتمه دیم

شراب ایچن خلیفه دن قبول ذلت ائتمه دیم

اگر چه اینجدیب منی سران قوم اشقیا

آتام ، آنام ، فدا سنه

دور ایله بیر دعا منه

ایا پیمبر خدا ، عرایضیم تامیدور

یازیبدی هادی نوحه سین ، اوشاعیر امامیدور

علی اکبر اوغلوما جهاندا بیر غلامیدور

سن ایسته الله ایله سین ، اونوندا حاجتین روا

آتام ، آنام ، فدا سنه

دور ایله بیر دعا منه

اثر قریحه : هادی سلطان محمدی(سلطانی)