نشریه الکترونیکی ائل اوبا

و من آیاته خلق السّموات و الأرض و اختلاف ألسنتکم و ألوانکم إنّ فی ذلک لآیات للعالِمین

تخمیس – ناز ائت ، منه ، ای سئوگیلی جانان ، منه ناز ائت


لینک مطلب : http://eloba.ir/?p=2448

علی آغا واحد (1965-1895)

ائل اوبا – تخمیس نه دئمک دیر : بیر شاعیرین بیر بئیتینه اوچ میصراع علاوه ائده رک بئش میصراع لی شعر یازماق.

 

« یانسین دیلیم آغزیمدا ، دئسم ، نازیوی آز ائت ،

ناز ائت ، منه ، ای سئوگیلی جانان ، منه ناز ائت » * .

*صمد منصوردان اقتباس اولونوب

اول باخیشیندا منی حیران ائله دین سن

بیر اینجه گولوش له اوره گیم قان ائله دین سن

کافر قیزی ، آخیر منی صنعان ائله دین سن

« یانسین دیلیم آغزیمدا ، دئسم ، نازیوی آز ائت ،

ناز ائت ، منه ، ای سئوگیلی جانان ، منه ناز ائت »

خلق ائیله میش اؤز کئیفی گلنده سنی تاری

اؤلدور ، بو بلادان منی قورتار ، سنی تاری !

رحم ائت منه ، بیگانه یه ناز ائیلمه باری

آلقیش ، ائله بیر عاشیقه ، وار سن کیمی یاری

انصاف ائله ، اؤز عاشیقینی محرمی راز ائت

« ناز ائت ، منه ، ای سئوگیلی جانان ، منه ناز ائت »

آیینه نی حیرتده قویوب عکسی – جمالین

خورشیدی خجالتده قویوب عاریضی – آلین (آل یاناق)

عاشیقلری حسرتده قویوب زولف ایله خالین

بلکه ، اولا قسمت بیزه گولزاری وصالین

هردن بو سینیق کونلومو بیر لطفیله ساز ائت

« ناز ائت ، منه ، ای سئوگیلی جانان ، منه ناز ائت »

گؤردوم گوزلیم ، اؤزگه یه سن ناز ائله ینده

آز قالدی کی ، روحوم اوچا ، جان قالمادی منده

بو ناز و نزاکت وار ایکن بیر بئله سنده

درد اهلی اینان ، دوشمه یه بیلمز بو کمنده

دایم بو گوزل خلقته مین راز و نیاز ائت

« ناز ائت ، منه ، ای سئوگیلی جانان ، منه ناز ائت »

تیبلیس (تیفلیس) شهرین ائیله میش هر کیمسه کی ایجاد

تاری ائله سین روحینی عالمده گؤروم شاد

جنت کی ، دئییرلر ، ائدیب ایجاد اونو شداد

(شداد : قدیم یمن ده سرتلیک و ظالیم لیغی ایله مشهور اولار بیر پادشاهین آدی ؛ ظالیم ، کوبود)

بوردان آپاریب حوری و قیلمان و پریزاد

یا رب ، بو پری چوهره لری بنده نواز ائت

« ناز ائت ، منه ، ای سئوگیلی جانان ، منه ناز ائت »

دونیا اوزونه یاخشی گؤزللر گلیب هر چند

اولماز سنه بیر اؤلکه ده نه مثل ، نه مانند

تبریز ، باکی ، تهران ، شکی ، شیروان ، قوبا ، دربند

گنجه ، قاراباغ ، شهری بخارا و سمرقند

ایسترسن اگر ، عزم ره مولک حجاز ائت

« ناز ائت ، منه ، ای سئوگیلی جانان ، منه ناز ائت »

اولما گؤزلیم ، صورتینه بیر بئله مغرور !

من ائتمیشم عشقیله سنی عالمه مشهور

هجرینده منی ائیله مه غم اکمگه مجبور

بیر دم حرمی وصل ایله ائت قلبیمی مسرور

درگاهه منی قول دئیه مانندی ایاز ائت

« ناز ائت ، منه ، ای سئوگیلی جانان ، منه ناز ائت »

واعظ ، ائله ظن ائیله مه ، حقی دانیر عاشیق

نه کعبه ، نه بوتخانه ، نه مسجد تانیر عاشیق

لاکین اؤزونو حق سئون انسان سانیر عاشیق

دونیادا فقط بیرجه محبت قانیر عاشیق

سن گئت هله ، اؤلموش لره تکلیفی نماز ائت

« ناز ائت ، منه ، ای سئوگیلی جانان ، منه ناز ائت »

واحید ، دئمه ، من دایمی یم ذؤوقو صفاده

منصوری ده (صمد منصور) یاد ائتمه لی ییک دار فناده

بو میصرعی – نازی او دئمیش بیر بئله ساده

یا رب سن اونا رحمتینی ائیله زیاده

قبر ایچره اونون روحینی لطفون له فراز ائت

« ناز ائت ، منه ، ای سئوگیلی جانان ، منه ناز ائت »

قایناق : آذربایجان سئوگی شعرلری ، کؤچورن : محمد عبادی قارخانلو ، ترتیبچی : هاملت عیسی خانلی ، نشر اختر تبریز

ائل اوبا