نشریه الکترونیکی ائل اوبا

و من آیاته خلق السّموات و الأرض و اختلاف ألسنتکم و ألوانکم إنّ فی ذلک لآیات للعالِمین

“بالقاباق چیچه‌یی دولما سی” نئجه پیشیریلیر؟


لینک مطلب : http://eloba.ir/?p=9651

ایچی دولدورولا‌راق پیشیریلن ان ماراق‌لی شئی‌لردن بیری ده بالقاباق چیچه‌یی‌دیر.

یاشیللیقلارین ایچینی دولدورا‌راق و یا بیتکی‌لرین یارپاق‌لارینا بیر شئی‌لر بورویه‌رک یئمک بیشیرمک دونیا اوزرینده اولدوقجا گئنیش بیر پیشیرمه فورمودور.

کیمیسی، اورتا و گونئی آمریکا‌داکی کیمی میصر و بانان/بامبو یارپاق‌لارینی، بعضی اوزاق دوغوداکی کیمی پالما و یا بامبوک یارپاق‌لارینی ایستیفاده ائدیر بو ایش اوچون.

تورکیه‌ده ایسه دئمک اولار کی، هر تروزی‌نین ایچی دولدورولابیلیر. بادیمجاندان انگینارا؛ کلم‌دن بامادورا؛ بیبر‌دن قاباغا قدر هر شئیی دولدورا‌راق یئمک پیشیریلیر. ایچی دولدورولا‌راق پیشیریلن ان ماراق‌لی شئی‌لردن بیری ده بالقاباق چیچه‌یی‌دیر.

آغ‌دنیز مطبخینده، ایتالیا و یا یونان‌دا بالقاباق چیچه‌یی پنیر ایله دولدورولوب قیزاردیلا‌راق یئییلیر.

تورکیه‌ده ایسه ادویات‌لارلا غنی‌لشدیریلمیش دویو ایستیفاده ائدیلیر و یئمک قازاندا پیشیر. اژه دنیزی و آغ‌دنیز بؤلگه‌سینده پیشیریلن بالقاباق چیچه‌یی دولماسی نئجه پیشیریلیر؟

دولما

بالقاباق چیچه‌یی دولماسی اوچون لازیم اولانلار:

30  دنه بالقاباق چیچگی

2  باش خیردا دوغرانمیش سوغان

1  چای ایستکانی زیتون یاغی

1  دنه رندلنمیش بامادور

1،5  سو ایستکانی دویو

1/2  سو ایستکانی قاینار سو

1/4  دسته اینجه دوغرانمیش شوگود

1  شیرین چای قاشیغی قورو نعناع

1/3  شیرین چای قاشیغی دوز

1/4  شیرین چای قاشیغی ایستوت

اوّلجه قاباق چیچک‌لری‌نین اوج بؤلومه‌لرینده یئرلشن یاشیل بؤلوم‌لری تک تک چیخاردین. چیچک‌لرین ایچینده اولان ساری بؤلوم‌لری یارپاق‌لارا ضرر وئرمه‌دن دقت‌لی بیر شکیلده آلین.

زیتون یاغی‌نین یاری‌سینی گئنیش بیر قازاندا ایسیدین. قورو سوغان‌لاری یوموشاینجایا قدر قووورون.

دویولری یویوب سولارینی سوزدوکدن سونرا قازانا آلین، شفاف بیر گؤرونتو الده ائدنه قدر سوغان‌لارلا بیرلیکده قووورمایا داوام ائدین. رندلنمیش بامادور قاتیب قاریشدیرین. سونرا دا ایستوت، دوز و قورو نعناع علاوه ائدین.

سوغان‌لی دویو ½ ایستکان ایستی سو ایله دویولر سویو چکنه قدر ضعیف اوددا پیشیرین.

اوجاغین آلتینی سؤندوردوکدن سونرا دم آلماسی و سویوماسی اوچون بیراز گؤزله‌یین.

سویویان دولما ایچینه دوغرانمیش شوگودو دا علاوه ائده‌رک یاخشیجا قاریشدیرین.

حاضیرلادیغینیز دولما ایچیندن آز آز آلیب، چیچک‌لرین ایچ بؤلوم‌لرینی دولدورون.

چیچک‌لری، اوست بؤلوموندن ایچه دوغرو قاتلاییب قاتلاما یئری آلتدا قالا‌جاق شکیلده قازانا یئرلشدیرین.

قالان زیتون یاغینی اوزرینه گزدیریب دولما‌لارین یاریسینا گله‌جک قدر ایلیق سو علاوه ائدین.

دولما‌لارین داغیلما‌دان پیشیرمه‌لری اوچون اوستلرینه آغیرلیق ائده‌جک بیر قاب یئرلشدیرین.

قازانین قاپاغینی اؤرتون و 10-15 دقیقه ضعیف اوددا پیشیرین. ایسته‌یه گؤره لیمون دیلیم‌لری یانیندا ایلیق و یا سویوق اولا‌راق سرویس ائدین.

عافیت اولسون!

TRT