اولماسادا – علی آقا واحد

یانیندا دلبریمین اعتباریم اولماسادا،

یئنه غمین چکرم ، غمگساریم اولما سادا.

بدنده یاری جانیم قالماییب، گئدیب یاریم،

گرک دؤزوم غم – هیجرانه، یاریم اولماسادا.

گونوم کی، تار اولوب اول زولف اليندن، ای تاری،

ترنم ائیله، سنی تاری، تاریم اولماسادا.

اوزون خیالی بسیمدیر بهشت – کؤیوندا،

یوز ایل خیالیما گلمز، باهاریم اولماسادا.

لبینله مست گؤزون هر دوشنده خاطیریمه،

شرابه رغبیتم آرتیر، خؤماریم اولماسادا.

منیم بیر آهیم ایله شمعلر یانیر گئجه لر،

توخونما، شعله عشقم ، شراریم اولماسادا.

کمند – زولفله ، واحد ، اؤزوم شیکار اولدوم ،

منیم او آهو باخیشلی شیکاریم اولماسادا.

ائل اوبا