اعلان ائدیرم عصر فضا پوللو لارین دیر

آجلیق کاسیبین ، عالی غذا پوللو لارین دیر


 دونیاده اولان درد و مصیبت کاسیبین دیر

دم پوللو لارین هر غم و محنت کاسیبین دیر

اعلان خطر منزل ویران کاسیبین دیر

 تحویل بالیغی چومچهٔ ارزان کاسیبین دیر


صوبحانیه قئیماق ایله بال ، پوللو لارین دیر

یای جوجه سی ، ائو کهلیکی حال پوللو لارین دیر


وای حالیمیزا ، از همه بدتر کاسیبین دیر

میمون و آل ایوانی و عنتر کاسیبین دیر


آلماس و بریلیان و تحف پوللو لارین دیر

اجدادینی آختارما ، شرف پوللو لارین دیر


هر دوره ده پستی و شکستی کاسیبین دیر

داشقا ایله ، عرابه ی دستی کاسیبین دیر


 هر مملکتین تازه مودی پوللو لارین دیر

آهو دؤشو ، هندوشقا بودی پولو لارین دیر


هر گونه تصادف و سینیق قول کاسیبین دیر

تاپسا ، مال اتی هرآیی بیر یول کاسیبین دیر


مشدی عبادین گؤرمه لی کورکو کاسیبین دیر

ييرتيق چوخاسی له کئچه بورکو کاسيبين دير


کاباره ده گیتاریله ساز پولو لارین دیر

گردش اوروپاده یئنه آز پوللو لارین دیر


سفته کاسیبین خالی چخان چک کاسیبین دیر

چؤلده قاپاز و ائوده توپورجک کاسیبین دیر


اوستاد و مهندس و طبیب پوللو لارین دیر

ئولادی هنرمند و ادیب پولو لارین دیر


حراجه گئدن یاستیق و یورغان کاسیبین دیر

دوققوز قیز ایله بیر سفیه اوغلان کاسیبین دیر


ائولادی عزیز، پاک و تمیز پولو لارین دیر

مطبخ پیشیکی ، عالی کنیز پولو لارین دیر

ائل اوبا