باخ تبریز اهلی نین ایشی افغان اولوب تامام

حيران قاليبلا جمله پريشان اولوب تامــام

بازار کاساد، چؤره ک باها یوخدور آلیش وئریش

بالمره خانمان لارى ويران اولوب تامام

يولچی توتوبدى کوچه لری کئچمک اولمورو

بو غصه دن اورکلریمیز قان اولوب تامام

هر کیمسه نین کی دولتی وار، کندی وار، گولور

بو ایشلری گؤرنده هراسان اولوب تامام

اصنافه باخ اؤلوبدو، اولوب فيکره غوطه ور

بیلمز نه چاره ائیله یه ؟ حیران اولوب تامام

وار هر کسین کی مکنتی بو شهردن قاچیب

زوار کربلا و خوراسان اولوب تامام

چو خلاری قاچدی تیفلیسه قالدی عیالی آج

محتاج خواربار له هم نان اولوب تامام

چوخ ائو ساتیلدی قالمادی بیردانه قوش قونان

حرآج پلاس و قابلاما، یورغان اولوب تامام

بوندان سورا دئیه ردیله یاخشی اولار بازار

گئتدیکجه چون مظنه لر ارزان اولوب تامام

وقت سحر هامی اوتورواب یوخ خبرلری

گؤردیله جار چکیلدی هراسان اولوب تامام

سیندی عیاری پول لاریزین اولدو بیر قپئک

ای تبریز اهلی رایج ایران اولوب تامام

هر کس ائشیتدی بو سؤزی دوشدو تلاطمه

سؤیلردی باغریمیز داها بریان اولوب تامام

چون چيخدی بو صدا قره پول توتدی عالمی

بیر کیمسه ساخلایانمادی ترسان اولوب تامام

بو باسدی خشکباره، او باسدی چؤره کچی یه

هر یئرده قاره پوللی پشیمان اولوب تامام

گؤردوله بو پولون ضررين چکمک اولمورى

الدن دوشوب بو ایشده مسلمان اولوب تامام

مردم اؤزی اولوبدو رضا سیندیریب پولی

هشتادی بیر قیرانیده میزان اولوب تامام

ایندیکی بیر شاهی قره پول تاپماق اولموری

هامی تؤکر قیران جیبه اعیان اولوب تامام

یوخ خیردا پول داها فقرا گلسه وئرمگه

خیرات قوتاردی و احسان اولوب تامام

ماه صفرده مین اوچوز اون یئتدی هجردن

کئچمیشدی تابو امر نمایان اولوب تامام

یارب اؤزون بو شهره ائله لطف و مرحمت

اسلام قوه دن دوشوب، ارکان اولوب تامام

بیزلر چیخانمادیق بوقدر امتحان دن

باخسان بو خلقه چوخلو پريشان اولوب تامام

خلقین دؤنوبدی حالتی دیندیرمک اولمورو

دیندیرمیسن دانیشدیغی عصیان اولوب تامام

هرگونده اللی دفعه دئیه ر کفر و ناسزا

از بسکی آجدی پیرو شیطان اولوب تامام

بو اغنیاده رحم و مروت تاپیلمیری

فرعون عصرلر هامی هامان اولوب تامام

 ديــوان ائله اؤزون فقرا دوشـــدو قــــــــوه دن

يوخ دادرس هره اؤزو ديوان اولوب تامام

هریاندا واردی زاهد و مؤمن خفیف اولوب

آمما او واردی تولکولر اصلان اولوب تامام

من بنده نین بو شعرینه هر کس قولاق وئره

افسوس ائدیب زامانه یه نالان اولوب تامام

ائل اوبا

Print Friendly, PDF & Email