مختار ثقفی نین حبس اولونماقی

گونش اوفوقده یوکسلدیکده زیاد اوغلونون قاپیسی آچیلیب جماعتین ایچری گیرمه سینه اذن وئریلدی. مختار ثقفی ده جماعتله ایچری گیردی. زیاد اوغلو، «عقیل اوغلونا کؤمک ائتمگه می کوفه یه گلمیشدین؟» دئیه سوردو.

مختار «بئله ائتمه دیم» دئدی ، «گلدیم سحره کیمی حریث اوغلونون بایراغی آلتیندا قالدیم.» حریث اوغلو دئدی: او دوز دئییر آللاه سنه کؤمک اولسون.

زیاد اوغلو مختارین اوزینه بیر آغاز ووروب گؤزونو یارالادى. سونرا دئدی: سنین جزان بودور. آللاها آند اولسون اگر حریث اوغلو سؤزونو تأیید ائتمزسه ایدی بوینونو ووراجاقیدیم. بونو دوستاغا سالین او ایسه امام حسین (ع) شهید اولانا کیمی دوستاقدا قالدى.

 

کسیلن باشلار یزیده گؤندریلدی

زیاد اوغلو جناب مسلیمین و هانی نین باشلارینی هانی بن ابی حیه الوادعی و زبیر بن اروح تمیمی ایله معاویه اوغلو یزیده هدیه گؤندردی. او اؤز کاتبی عمرو بن نافعی ایسته ییب یزیده بو مضموندا بیر مکتوب یازدی :

سونرا آللاها چوخ شکر کی ، امیرین حقین آلیب دوشمنین شرینی رفع ائتدی. مؤمنلرین امیرینه خبر وئریرم : عقیل او غلو کوفه ده هانینین ائوینه سیغیندی من ایسه اونلارا گؤز قویوب ، آرالارینا جاسوس گوندردیم.

نهایت اونلاری ائودن چیخاریب بویونلارینی ووردوردوم. ایندی ده باشلارینی هانی بن حبه و زبیر بن اروح ایله سنه گؤنده ریرم قید ائدیرم کی ، بو ایکی نفر سؤز ائشیدن ، باشی آشاغی و نصیحت اهلی دیرلر.

امیر ایسته ییرسه بونلاردان سورابیلر. تأکید ائدیرم کی بو ایکی آدام بیلیک صاحبی دوز دانیشان و آنلاقلیدیر، و اورکلرینده آللاه قورخوسو واردیر . والسلام ….

باشلار گلیب یزیده چاتدیقدا ، مکتوبو اوخویوب زیاد اوغلونا بو مضموندا بیر جاواب یازدی:

سونرا ، دوغروداندا من ایسته دیگیم کیمی دایانمیشسان. قدرتلی بیر آدامین ایشینی گؤرموشسن. شجاعتلی بیر یوروش ائدیب شری باشیمیزدان و از کئچیرتدین. سنین حاققینداکی رأییمی عملینله تأیید ائتمیش سن، گوندردیگین ائلچیلری چاغیریب گیزلی سؤزلر سوردوم. دئدیگین کیمی عقل و فیکر صاحبیدیرلر.

بو سؤزلری سنه تاپشیرماق ایستردیم: علی اوغلو حسینین عراقا دوغرو یوللانماغینین خبرینی ائشیتمیشم. یوللاردا قاراوول قویون. ظنین اولدوغون آدامی و اتهام ائدیلن هر بیر کیمسه نی یاخالاییب حبسه آل.

سنی اؤلدورمک ایسته مه ینی اؤلدورمه. باش وئرن هر بیر حادثه نی منه یاز. والسلام علیک و رحمه الله

قید ائدیریک کی ، جناب مسلم چرشنبه آخشامی گونو هجرتین آلتمیشینجی ایلینده ذیحجه آینین سگگیزینده کوفه ده قیام ائتدی. حضرت امام حسین علیه السلام ایسه عینی گونده یعنی ترویه گونو مکه دن چیخدی.

قایناق : کربلا ماجراسی ، روایت : ابو مخنف لوط بن یحیاداندیر ، نشر ائدن : اسلامی تبلیغات تشکیلاتی ، تدقیقاتچی : شیخ محمد هادی یوسفی ، چئویرن : شیخ عباس امامی کرکوکلو ، دیجیتال یاییمجیلیک : ائل اوبا

Print Friendly, PDF & Email