امام حسین علیه السلامین مکه دن چیخماغی

امام حسین علیه السلامین مکه دن چیخماغی

امام حسین علیه السلام 60 – نجی ایل شنبه ۲۸ – رجب ده مدينه دن چیخیب ۳۔ شعبان جمعه گونو مکه یه گیردی ، او حضرت شعبان ، رمضان ، شوال و ذیحجه آیلارینی مکه ده قالدى. و چرشنبه آخشامی گونو ذیحجه نین سگگیزینده مکه دن چیخدی.

حضرت مکه ده دوشرکن او شهرين اهالیسی ها بئله حجه وعمره یه گلن مسلمانلار دسته – دسته اونون گؤروشونه گلیردیلر.

زبیر اوغلونون امام حسین علیه السلام گؤروشو

امام حسین علیه السلام مکه ده اولار کن زبير اوغلو عبد الله دا مکه ده ایدی. او بعضا گون آشيرا بعضا ده ایکی گون دال – بادال او حضر تین گؤروشونه گلیردی.

زبير اوغلونا معلوم اولموشدوکی ، نه قدر امام حسین (ع) مکه ده دیرسه حجاز اهالیسی اونا بيعت ائتمیه جكلر. و امام علیه السلام اونلارین یانیندا بؤیوک شخصیت صاحبی ایدی.

بونا گؤره بیر گون او امام حسین علیه السلام لا خصوصی شکيلده صحبته باشلاییب دئدی: بنی امیه نین بیزی بوشلاماغينين سببینی بیلمیرم.

خلافت و ولایتي اله آلا بیملدیگیمیزین سببینی ده بیلمیرم. بیز مهاجرلر اؤولادی ییق، خلافت بنی امیه اوچون دئییل بیزیم اوچوندور. دئه گؤروم نه ائده جکسن؟

امام حسین علیه السلام: آند اولسون آللاها اؤزومله آراشمیشام کی ، کوفیه گئدم. شیعه لریم و کوفه اعيانلاری دا بونو یازمیشلار. آللاهدان خیر دیله ییرم.

زبیر اوغلو: منیم ده سنین شیعه لرین کیمی شیعه لریم اولسایدی کوفه دن ال چکمزدیم.

سونرا «امام حسین علیه السلامين حجازدان چیخیب گئتمگينه راضی ایمیش» دئمه سینلر دئیه سؤزونه داوام ائتدیردی: اگر حجازدا قالیب ولایتی ایسته ییر سن سه انشاء الله بیر کیمسه مخالفت ائتمز. سونرا دوروب چیخدی.

امام حسین زبیر اوغلو گئدندن سونرا دئدی: اونون اوچون دونیادا منیم حجازدان چیخیب عراقا گئتمگيمدن یاخشی شئی یوخدور. چونکی یاخشی بیلیر نه قدر من حجازدا وارامسا ، اونا بیر ایش یوخدور. مسلمانلار مني اونلا تای ائتمزلر. او دور کی منیم بورادان گئتمگیمی و حجازین اونون اوچون قالماغینی ایستدی.

امام حسین علیه السلامين ابن عباس ایله بحثی

امام حسین علیه السلام کوفیه گئتمک قرارینا گلدیکده ، عبدالله بن عباس گلیب اونا دئدی: خالق آراسیندا بئله یاییلیب کی ، عراقا گئدیرسن دئی گؤروم نه ائتمک ایسته ییرسن؟

حضرت جاواب وئردی: بو ایکی گون عرضینده یولا دوشه جه یم انشاء الله. ابن عباس ، «بئله سه بو سفرده سنه آللاهدان سیغیناجاق دیله بیرم.» دئیه آرتیردی:

آللاه سنه رحمت ائتسین دئه گؤروم بیر طایفایا دوغرو گئدیرسنمی کی ، اؤز امیرلرینی اؤلدوروب اؤلکه لرینی آلیب دوشمنلرینی قووموشلار؟ اگر بئله دیرسه گئت اورايا . يوخسا بیر حالدا کی اونلارین امیرلری زورلا حؤکم سورور و عاملارينين اليله زکات توپلايير سنی دعوت ائتمکلرینین معناسی یوخدور.

اونلار سنینله ساواشماق ایسته ییرلر. من ایسه سنی اونلارین زیانیندان آماندا گؤرمورم. اونلار حيله ائدر، یالان ساتار ، سنله مخالفت ائدر و سنی اؤلدورمگ او چون دئدیکلرینین ضدینه دایانارلار.

امام حسین بویوردو : من ایسه آللاهدان خئیر ایسته ییرم. گؤرک نه اولاجاق ؟

امام حسین علیه السلامين ابن عباس ایله ایکینجی بحثی

آخشام اولدوقدا ابن عباس امام حسین علیه السلامين یانینا گلیب دئدی: عمی اوغلو نه قدر اؤزومو دؤزمگه يؤنلدیرم سه دؤزه بیلمیرم.

اؤزونون و کؤمکچیلرینین بو يولدا اولمگیندن قورخورام. عراق اهالیسی حیله کار دیر، اونلارا یاخین گئتمه. حجازدا قالسان بورانین امیریسن، عراقلیلار سنی ایسته ییرلرسه بیر مکتوب گؤندر دوشمنلرینی کوفه دن چیخاریب قووسونلار سونرا گئت بیرده اگر هجرت ائتمگه تأکید ائدیر سنسه چوخلو داغی و دره تپه سی اولان يئمن شهرینه گئدیب اورا مسلمانلارینین آراسیندا سنه بیعت آلماق اوچون تبلیغاتچی گؤندر. من ده خلافتين دينج يوللا الينه کئچمگینی ایسته ییرم.

امام بویوردو: عمی اوغلو آللاها آند اولسون کی، سنین صداقتلى و مهربان اولدوغونو يقين ائدیرم.لاکین شبهه یوخومدور کی ، عراقا گئتمگ عزمینده یم.

ابن عباس دئدی: بئله دیرسه آرواد اوشاقلارینی آپارما . آللاها آند اولسون قورخورام سنی اؤلدوره لر.

امامین عؤمر بن عبد الله مخزومی ایله بحثی

عؤمر مخزومی دئییر: امام حسین علیه السلام عراقا گئتمک اوچون حاضیرلانديقدا یانینا گئدیب آللاها حمد ائدندن سونرا دئدیم :

عمی اوغلو یانینا گلمیشم نصیحت ائتمک حاجبتم واردیر . نصیحتیمی ایسته ییر سنسه دئییم یوخسا واز کئچیم سؤزومدن.

حضرت امام حسین علیه السلام بویوردو : دئگیلن سؤزونو . آللاها آند اولسون فاسد اولماغینی ظن ائتمیرم. نصیحت ائتمک ایسه پیس بیر ایش دئییلدیر.

عؤمر مخزومی دئدی: عراقا گئتمک ایستدیگینی بیلمیشم. من بو گئتمکدن ال چکمیگینی دیله ییرم.

معلومدور ، ائله بير شهره گئدیرسن کی ، اورانین حاکمی واردير . اللرینده ده بیت المال چوخدور اهالیسی ایسه دنیا قولودور . سنه یاردیم وعده سی وئره ن او جماعتین سنینله ساواشماما سینی ظن ائتمیرم.

امام حسین علیه السلام دئدی: آللاه سنه یاخچی مکافات وئرسین عمي اوغلو. تانری حاققی بیلیرم سن اخلاص و نصیحت اوچون بورا گلیب و عقل اوزو ایله دانیشیرسان سنین رأینی قبول ائدم یوخسا قبول ائتمه یم هر حالدا طالع اؤز ایشینی گؤروجکدیر . سن منیم یانیمدا یاخچی مصلحتچی و نصیحت ائدنسن.

ابن زبیرین امام حسین علیه السلاملا سون دانیشیغی

روایته گؤره عبدالله بن سليم ومذری بن مشعل دئمیشلر : بیز ترویه گونو حج مناسبتیله مکه یه گیریب گؤردوک: امام حسین (ع) و زوبير اوغلو عبدالله حجر اسماعیل ایله کعبه قاپیسی آراسیندا دوروبلار.

یاخینلاشیب گؤردوک زوبير اوغلو دئییر: مکه ده قالماق ایسته سن سنینله قالاريق. ولايت ده الينده اولار. سنه بيعت ائدیب آرخادوراريق.

حضرت دئدی: آتام (امام علی علیه السلام) منه دئییردی: «بير قوچ مکه حؤرمتینی آرادان آپاراجاق.» من ایسه او قوچ اولماق ایستمیرم.

سونرا زوبير اوغلو امام حسینه گیزلی بیر سؤزده دئدی: او حضرت دؤنوب بیزه دئدی ، بیلدینیزمی زوبير اوغلو منه نه دئدی؟ «قوربانین اولاق بیلمه دیک.» دئدیک.

امام بویوردو : زوبير اوغلو دئدی کی، من گئدیم جماعتی سنین باشینا توپلاییم.

سونرا امام بویوردو : واللاه بیر قاریج مکه دن قیراق اولسم بورادا اؤلمگیمدن منه یاخشیدیر . آللاها آند اولسون اگر بیر حیوان یوواسینا گیرسم منی چیخاریب حاجتلرین یئرينه پئتيررلر. والله يهود طایفاسی شنبه گونو ظلم ائتدیکلری کیمی منه ظلم ائدرلر.

عمروبن اشدق بن احوالاتی

امام حسین علیه السلام مکه دن هجرت ائدنده سعید بن عاص اوغلو مدینه واليسی ایدی. او امام حسین عليه السلامين عراقا گئتمگینه مانع اولماق اوچون قارداشی یحیی ایله بیر تعداد آدام گؤندردی.

حضرت مکه دن چیخديقدا بو آداملارلا قارشیلاشدی. اونلار، «هارا گئدیر سن گئری قاییت دئدیلر. امام گئری دؤنمکدن چكينيب ساواشدیلار. نهایت مانع اولا بیلمديلر ، امام ایسه يولا دوشوب گئتدی.»

اونلار اوجا سسله دئدیلر: ای حسین (ع) آللاهدان قورخ. مسلمانلار آراسيندا آیریلیق سالماق ایسته ییر سنمی؟

حضرت بو آیه نی اوخودو: لي عملي و لكم عملكم انتم بريئون مما اعمل و انا برى مما تعملون (نساء سوره سی) منیم عمليم منیم اوچون سیزین عملی نیز ایسه سیزین اوچوندور ، سیز منیم عملیمدن اوزاقسينیز من ده سیزین عملينزيدن اوزاغام.

حضرت امام زین العابدین بویورور: عبد الله بن جعفر امام حسین علیه السلامه بیر مکتوب یازیب ایکی اوغلو عون و محمد ایله گؤندر میشدی. اونلار بیز مکه دن چیخدیقدا بیزه چاتدیلار. مکتوبدا یاز میشدی:

بو مکتوبو اوخودوقدا بیل کی من آللاها گؤره سنین کوفه یه گئتمه مگینی ایسته ییرم. من بو سفرده اؤزونون و آرواد اوشاقلارینین اؤلمگیندن قورخورام.

بو گون سن اولسن يئر اوزونون چیراغی سؤنر. سن هدایت اهلینین بایراغی و مؤمنلرين امیدیسن. گئتمکده تله سمه بو مکتوبون دالينجا گلیرم والسلام.

دیگر طرفدن مدینه ده عبد الله بن جعفر عمرو بن سعيد ایله دانیشیب دئدی:

امام حسین علیه السلاما بير امان نامه یازیب بیلیندیرکی، اونونلا یاخشی یاناشا جاقسان. هم ده اوندان عراقا گئتمکدن واز کئچمگینی ایسته. بلکه امین اولوب قاییدا.

مكتوبو دا قارداشین یحیی دان گؤندر . بئله لیکله او سنه امین اولار و سنین بو مکتوبدا یازدیقلارینا اینانار

عمرو بن سعيد دئدی: نه ایسته ییر سنسه یاز من مؤهورله ییم.

عبد الله بن جعفر بو مضموندا بیر مکتوب یازدی:

رحمان و رحیم اولان آللاهين آدی ایله

عمرو بن سعید ده ن على اوغلو حسینه:

سونرا ، من آللاهدان سنی اؤلومدن قورتاریب هدايته يؤنلتمگی ایسته ییرم. عراقا گئتمگینی ائشیتمیشم. سنی آیریلیقدان قورویورام. هلاک اولماغیندان قورخورام قارداشیم یحیی نی جعفر اوغلو عبدالله ایله بیرلیکده سنین یانینا گؤنده ریرم. بونلارلا گئری قاییت سنين اوچون امان و یاخشی قونشولوق واردیر

عبدالله بن جعفر مکتوبر گتیریب عمروبن سعید مؤهورلدى. سونرا یحیی ایله گلیب امام حسین علیه السلاما چاتدیلار. او حضرت مکتوبو اوخویوب سعید اوغلونا بو مضموندا بیر جاواب یازدی:

« آللاها دعوت ائدیب صالح عمل ائله ین و مسلمانلاردانام» دئین بیر کیمسه ، تانرینی و اونون پیغمبرینی اینجیتمه ییب. دوغروندان دا آمانا و قوهوملوغا چايغرمیشسان. ان یاخشی آمان ایسه آللاه آمانیدیر. دونیادا آللاهدان قورخمایان قیامتده اونون آمانيندا اولماز. بیز دونیادا آللاهدان ائله قورخماق ایسته ییریک کی ، قیامتده اونون آمانی بیزه واجب اولا. اگر مکتوبوندا نيتين منه یئتیشمک و خیر دیرسه دونیادا و آخرنده خئير جزاسی گؤره سن والسلام.

جعفر اوغلو عبد الله و یحیی گئری دونوب عمرو بن سعیده دئدیلر: مکتوبو او خوندوردوق نه قدر قایتارماغا چالیشديقسا عذر ایسته ییب دئدی:

یوخودا آللاهين پیغمبرینی گؤردوم منه بیر امر ائتدی اونون قوللوغونا

گئدیرم. بو ایسه منیم اوچون داها گوزلدير.

یوخونون نه اولدوغونو او حضرتدن سوردولارسا بویوردو

بو یوخونو بیر کیسمه یه دانيشمامیشام تانری ایلن ملاقات ائدنه کیمی دانیشمایا جاغام دا.

قایناق : کربلا ماجراسی ، روایت : ابو مخنف لوط بن یحیاداندیر ، نشر ائدن : اسلامی تبلیغات تشکیلاتی ، تدقیقاتچی : شیخ محمد هادی یوسفی ، چئویرن : شیخ عباس امامی کرکوکلو ، دیجیتال یاییمجیلیک : ائل اوبا