دیگر طرفدن عروه اوغلو هانی خسته لندی. و زیاد اوغلو عبید الله اونون عیادتینه گلدی. عماره بن عبید سلولی هانیه دئدی «بیز بو ظالمی اؤلدورمگه ییغیشمیشیق. آللاه اونو اولدورمک اوچون بیزه امکان یارادیب. من اونو اؤلدوره جه یم»

عماره بن عبید سلولی کوفه لیلرین طرفیندن اللى اوچ صحیفه لی ہیر مکتوبلا امام حسین علیه السلامین خدمتینه گلن ایدی ، امام علیه السلام ایسه اونو مسلم له بیرلیکده کوفه یه گؤندرمیشدی.

هانی دئدی: ائویمده آدام اؤلدورولمگی سئومیرم.

بئله لیکله زیاد اوغلو هانی نین عیادتینده ن سونرا سالم قایتدی. بیر هفته کئچمه دن شریک بن اعور حارثی ده خسته لندی. اونون بوتون والیلره او جمله دن زیاد اوغلونا یاخشیلیغی دگمیشدی و صادق بیر شیعه ایدی.

زیاد اوغلو او گئجه شریکین عیادتینه گله جگی خبرینی گوندردی. شریک عقیل اوغلو مسلمه دئدی: بو اجلاف بو گئجه عیادتیمه گله جک.

بورادا اوتورارکن چیخیب اؤلدور سونرادا قصر الاماریه گئت قارشینی آلاسی بیر کیمسه ده اولمایاجاقدیر. من ایسه ساغالدیقدا بصره یه گئدیب سنین والی لیگینی اجراء ایده ره م.

گئجه اولدوقدا زیاد اوغلو شریکین عیادتینه گلدی. جناب مسلم بونو بیلیب باشقا اوتاغا کئچمگ ایستدی. شریک اونا دئدی «زیاد اوغلو گلیب اگلشدیکده فرصتی الدهن وئرمه.

هانی «ائویمده آدام اولدورولمه یی سئومیرم» دئدی ، چونکی او بو ایشی اؤزونه عار بیلیری. (قید ائدیریک کی ، شریک هانی نین ائوینده یاتمیشدی عبید الله گلیب مجلسده اوتوروب شریکین کئفینی سوردو.

شریک ، عقیل اوغلونون چیخماماغینی گؤردوکده فرصتین الدن گئتمه گیندن قورخوب بو سؤزو دال با دال تکرارلادی:

ما تنظرون بسلمی آن تحبوها ؟ / گؤرمه ییرسییز می سالام وئره سنییز اونا ؟

اسقنیها وان کانت فیها نفسی / من اؤلسمده او شربتی اونا ایچیرین.

زیاد اوغلو بو سؤزلری ایکی اوچ دفعه ائشیدیب دئدی: نه ایچین بو سؤزلری تکرار ائدیر؟ ده لی اولوب مو؟

هانی بن عروه «دوزدور» دئیه جاواب وئریب سؤزونه داوام ائتدیردی «آللاه سنی اصلاح ائتسین سحر تئزدن بو سؤزلری تکرار ائتمگه اؤیره نیب»

نهایت زیاد اوغلو مجلسدن چیخیب گئتدی ، جناب مسلم ایچری گیردی.

شریک سوردو : اونو اؤلدورمکدن چکیندیره ن هانسی سببلر اولدو؟

مسلم «ایکی خصوصیت» دئیه جاواب وئردی: بیرینجیسی بودور کی هانی نین بو ایشدن خوشو گلمیر. ایکینجسی پیغمبر (ص) ده ن دئییلن روایت «ان الایمان قید الفتک و لایفتک مؤمن» یعنی ایمان غافیلجه اولدورمگه باغلیدیر، مؤمن بیر کمیسه ایسه غافلجه اولدورمز.

هانی دئدی: آمما آند اولسون آللاها هرگاه زیاد اوغلونو اولدورسه ایدین سانکی فاسق ، فاجر ، کافر و غدار بیر آدامی اولدورموشدون. لاکین ائویمده آدام اؤلد ورولمکدن آجیغیم گلیر.

جاسوس معقل جناب مسلمین یانینا گلیر. دیگر طرفدن معقل ملعون او قدر مسلم بن عوسجه نین یانینا گل – گنت ائتدی کی ، عوسجه اوغلو اونو مسلمین یانینا گتیریب احوالاتینی او حضرته دئدی ، معقل جناب مسلمه بیعت ائتدی ، جناب مسلمین امری ایله ابو ثمامه صائدی پوللارى معقلدن تحویل آلدى.

او گونده ن اعتبارا معقل هر گون عقیل اوغلونون یانینا گلن بیرینجی آدام و اورادان چیخان سون آدام اولموشدو. بئله لیکله بوتون سرلری زیاد اوغلونا یئتیریردی.

قایناق : کربلا ماجراسی ، روایت : ابو مخنف لوط بن یحیاداندیر ، نشر ائدن : اسلامی تبلیغات تشکیلاتی ، تدقیقاتچی : شیخ محمد هادی یوسفی ، چئویرن : شیخ عباس امامی کرکوکلو ، دیجیتال یاییمجیلیک : ائل اوبا

Print Friendly, PDF & Email