بیر گون زیاد اوغلو مجلیسینده کیلره دئدی:
نه اوچون هانی بورایا گلمير؟ بیر نفر «خسته دیر» دئیه جاواب وئردی.
زیاد اوغلو بو اوچ آدامی چاغیرتدیردی. اشعث اوغلو محمدی ، خارجه اوغلو اسماءنی و حجاج اوغلو عمروی. (او واخت عمرو بن حجاجين باجیسی دوعه هانی نین آروادی ایدی)
زیاد اوغلو اونلاردان سوردو : نه اوچون هانی بورایا گلمير؟ بیلمیریک بلکه ده خسته دیر دئدیلر.
زیاد اوغلو: خبرلشمیشم یاخشیدیر قاپیسی آغزیندا اوتورور دئیه امر ائتدی: گندیب دئیین کی ، حاقدان ال چکمه سین من بونون کیمی شریف کیمسه لرین فاسد اولماغینی سئومیرم.
اونلار هانی نین ائوینه گلیب دئدیلر: زیاد اوغلونون گؤروشونه گلمه مگینین سببی ندیر ؟ امیر (زیاد اوغلو) سنی آنیب دئییردی: خسته اولماغینی بیلسم عیادتینه گنده رم.
هانی دئدی: خسته لیک منی بو ایشد ه ن چکيندیریر.
اونلار دئدیلر: امير ، سنين آخشام چاغیلار قاپی دالیندا اوتوردوغونو بيلير اميرين خدمتیندن بویون قاچیرمیسان. او بو ایشه دؤزمز . سنی آند وئریریک بیزیمله گله سن.
هانی گئیینیب قاطیرا میندی. دارالاماره سارايينا یاخینلاشديقدا زیاد اوغلوندان بد گمان اولوب حسان بن خارجه یه دئدی:
قارداش اوغلو من بو کیشیده ن قورخورام. سن نئجه فیکیرلشیرسن؟
حسان دئدی: آللاها آند اولسون اوره گیمده سنه نسبت اصلا قورخوم یوخدور. قورخماغا سبب یوخدور. سن گناهسيزسان.
هانی زیاد اوغلونا یاخینلاشديقدا ، او ملعون یانیندا توران شورئیح قاضيه اوز توتوب بو شعری اوخودو:
اريد حبائه و يريد قتلی غدیرک من خلیلک من مراد
من اونا عطا ائتمک ایستدیگیم حالدا او مني اؤلدورمک ایسته ییر دوستدان عذر ایسته مک مرادا چاتماق دیر.
هانی «بو سؤز ندیر حوکمدار؟» دئیه سوردو.
زیاد اوغلو دئدی: خبردارلیق ائدیرم هانی. اطرافیندا کنچن بو ایشلرندير؟
عقیل اوغلو مسلمی ائوینه گتیریب امیرالمؤمنین یزید بن ضدینه سیلاح و آدام توپلاییرسان. بئله گمان ائدیرسن کی ، بو ایش گیزلی میدير ؟
هانی: من بو ایشی گورمه میشم مسلم ده یانیمدا دئییلدیر.
زیاد اوغلو: سن بو ایشی گؤرموشسن.
هانی: یوخ گؤرمه میشم…
زیاد اوغلو: بلی گوروموشسن
بئله لیلکه زیاد اوغلو بو ایشه تأكيد ائدير هانی ایسه دانیردی. نهایت زیاد اوغلو معقل جاسوسو چاغیرتدیریب هانی یه دئدی: بو آدامی تانیییرسانمی؟
هانی تانییرام دئدی و معقل ملعونون ، زیاد اوغلونون گؤزو اولدوغونو بیلدی. سونرا عبيد الله ها دئدی: ایندی ائشیت مندن و دئدیگیم سؤزلره اینان آللاها آند اولسون یالان دئمیرم.
تایی اولمايان آللاها آند اولسون من اونو ائویمه چاغیرمامیشام و ایشلرینده ن خبریم یوخدور. بیر گون اونون قاپیمدا اوتورماغینی گؤردوم. مندن ائویمه گلمه گینی خواهش ائتدی. من ایسه اوتاندیم. اونو ائویمه گتیریب قوناق ساخلادیم.
دئدیگین ایشلرده دوز دور. ایسته ییر سنسه آند ایچیب سنی امین ائدیرم کی ، بیر ضرریم توخانماياجاقدير. یاخود سنین یانیندا بير گیرو قویوب اونو ائویمدن چیخارارام باشقا بیر یئره گئتسین و قوناقلیق حاققی منیم بوینومدان گوتورولسون.
زیاد اوغلو دئدی: یوخ ، آللاها آند اولسون ، اونو منیم اوچون گتیرمه یینجه یانیمدان اوزاقلاشمایاجاقسان.
هانی دئدی: یوخ آند اولسون آللاها اونو هئچ واخت وئرمرم. قوناغیمی ، اؤلدورمک اوچون سنه وئریم می؟
زیاد اوغلو: آند اولسون آللاها اونو منه وئرمليسن.
هانی: آند اولسون آللاها وئرميه جم
اونلارین سؤزو اوزانديقدا ، عمرو اوغلو مسلم باهلی آیاغا قالخيب دئدی: حوكمدار اذن وئر من هانی ایله دانیشیم.
سونرا هانی یه دؤنوب دئدی: بورا گل سنينله دانیشیم.
اونلار ایکیسی مجلیسین بیر بوجاغیندا اگلشیب دانیشیردیلار زیاد اوغلو اونلارین بعضی سؤزلرینی ائشیدیردی بعضیسینی یوخ.
مسلم باهلی هانی یه دئدی: سنی آند وئریرم آللاها اؤزونو اؤلومه وئریب اؤز ائلينه بلا گتیرمه. تانری حاققي من سنی اؤلومدن قورتاریرام.
بو کیشی (عقیل اوغلو مسلم) بنی امیه نین عمیسی اوغلودور اونو اؤلدورمه یه جكلر . مسلیمی زیاد اوغلونا تحویل وئر. بو ایش سنه اسکیکلیک ساییلماز چونکی سن اونو سلطانا وئریرسن.
هاني اونون جاوابیندا دئدی: تانرى حاققی بو ايش منه اسکیکلیک گتيرر. قولومون قوه لی اولدوغو حالدا و یاردیمیمین چوخلوغو و ساغلاملیغیملا بئله منه سيغنيان قوناغیمی تحویل وئریم مي؟
آللاها آند اولسون هر گاه تک قالام و بير نفر کؤمگيم قالمايا اؤزوم اؤلمه یینجه اونو تحویل وئرمه رم…..
او بئله ظن اندیردی کی ، ائل طایفاسی اونو مدافعه ائده جكلر. او دور کی ، اونو تحویل وئرمکدن قطعيتله چکینیردی.
زیاد اوغلو بو سؤزلری ائشیتدیکده اونو یانینا ایسته ییب دئدی: آللاها آند اولسون مسلیمی گتیرمليسن یوخسا بوینونو وورارام.
هانی دئدی: بئله اولارسا ائوینین اطرافيندا قیلینج چوخ اولاجاقدير. (چونکی ائل طایفاسینین اونو مدافعه ائتمکلرینی ظن ائدیردی.)
زیاد اوغلو «وای حالينا قیلینج سسی ایله منی قورخودروسان» دئیه اونو ایره لی گتیرمگه امر ائتدی. ملعون آغاج ایله هانینین اؤز گؤزونه او قدر ووردو کی ، بورنو سینیب اوزونون اتی ساللاندى و الينده کی آغاج سیندی.
هانی قاراووللاردان بیرینین قیلینجینی آلماق ایستدیکده او هانی نی بو ايشدن چکیندیردی.
زیاد اوغلو «خوارج ساواشينا گئدیرستمی»؟ دئیه سؤزونه داوام ائتدیردی «قانینی بیزه حلال ائتدین سنی اؤلدورمک بیزه حلال اولدو» سونرا اونو بير اوتاغا سالیب قاپیسینی باغلاماغی قارووللارا امر ائتدی.
سونرا خارجه اوغلو أسماء زیاد اوغلونا دوغرو هرله نیب باغیردی:
ارسل غدر سائراليوم؟ بو گون وفاسیزلیق نشانه سیدیرمی؟
سونرا بو آدامی یانینا گتیرمگه امر وئردین ، بیز ایسه اونو یانینا گتیردیک. سن اونون اوزونون اتینی داغيديب ساققالينى قانا بویادین و اؤلدورمگه چالیشدین. بئله دئییلمی؟
زیاد اوغلو عجبا سن ده بوراداسان» دئیه اونو توتوب دؤودوروب حبسه سالدیردی. اشعث اوغلو محمد ، «بیز حوکمدارین رأیی ایله راضی ییق. صلاحیمیزا اولا یا اولمایا چونکی امیر تربيه ائدندیر.» دئیه زیاد اوغلونا دؤندو
«سن عروه اوغلونون بو شهردہ کی خصوصیله ائل طایفاسی ایچینده کی حؤرمتینی بیلیرسن.» اونون ائلی ده بیلیر کی هانی نی منله أسما بورایا گتیرمیشیک.
سنی تانریا آند وئریرم اونو منه باغیشلا. من بو طايفانین منیمله دوشمن اولماغینی ایستمیرم. چونکی بونلار شهرين حورمتلیلریندن و یمن ین مشهورلارینداندیرلار.
زیاد اوغلو بو ایشی گوره جگینه سوز وئردی. و دیگر طرفدن هانی نین اؤلوم خبری حجاج اوغلونا چاتديقدا مذحج طایفه سی ایله سیلاحلانيب دارالاماره سارایینی احاطه ائتدیلر.
حجاج اوغلو عمرو اوجا سسله دئدی: من حجاج اوغلويام بونلار ایسه مذحج طایفاسینین دؤیوشچولریدیرلر.
و وجوهها لم تخلع طاعة ولم تفارق جماعة یعنی ائل باشچیلاری تابع دیر و اهالیدن اوزاقلاشمامیشلار. بؤیوکلرینین اؤلوم خبرینی ائشیدیبلر بونلارا چوخ آغير گليب.
بو خبر زیاد اوغلونا چاتدیقدا شورئیح قاضییه دئدی: گئدیب اتاقدا هانی یه باخ سونرا چیخ اونون ائلینه دیری اولماغینی و سن اؤز گؤزونله اونو گؤرمگینی سؤیله.
شورئيح قاضی بئله دئییر: هانی نین یانینا گئتدیم منی گؤردوکده دئدی: ای تانری ای مسلمانلار ائل طایفام قیریلیب می؟
دیندارلار هارادادیرلار؟ شهر اهالیسی هارادا دیرلار؟
عجبا مندن اوز دؤندریب دوشمن آراسیندا تک قویدولار. شورئيح دئییر: هانی نین قانی ساققالینا آخيردی من دار الاماره سارایی نین قاپیسینداکی سس – کویلری ائشیدیکدہ اورادان چیخدیم هانی دالیمجا گلیب دئدی:
ای شورئیح بئله ظن اندیرم کی ، بو سس کوی مذحج طایفاسینین سس کویودور . و مسلمان شیعه لریمدیر. اگر اون نفر گلرسه منی قورتارارلار.
شورئیح دئییر: اورادان چیخیب جماعتین یانینا گلدیم ، زیاد اوغلونون خصوصی قاراووللاریندان بکیر اوغلو حمید منیمله ایدی. اونلارا دئدیم: سیزین بورايا توپلاشماغینیزین خبری حوکمدارا چاتديقدا منی هانی نین یانینا گؤندردی من گئدیب اونو گؤردوم.
حوکمدارین امرينه گؤره سیزینله گؤروشوب دئييرم کی ، هانی دیریدیر اونون اؤلوم خبری سهودیر.
حجاج اوغلو واونون يولداشلاری دئدیلر: آللاها شکر اولسون کی ، او اولمه ییب سونرا داغیلدیلار.
زیاد اوغلونون چیخیشی
عبيد الله ملعون خالقين عصیانیندان قورخوب ، اعیانلارلا بیرلیکده مسجیده گئدیب منبره چیخدی. تانرینی حمد و نثا ائدندن سونرا دئدی:
ای جماعت سوچدان اوزاقلاشیب تانریا یاخینلاشین. حوکمدارینیزا بويون اگمک اوچون آرانیزا آیریلیق سالمایين. یوخسا هلاکته دوشرسينيز ذلیل و محروم اولارسینیز. سنه صداقتلی اولان قارداشيندير. قورخان عذر قاپیسینی اؤز اوزونه باغلاییر.
قایناق : کربلا ماجراسی ، روایت : ابو مخنف لوط بن یحیاداندیر ، نشر ائدن : اسلامی تبلیغات تشکیلاتی ، تدقیقاتچی : شیخ محمد هادی یوسفی ، چئویرن : شیخ عباس امامی کرکوکلو ، دیجیتال یاییمجیلیک : ائل اوبا
مطالب جالب
تواشیح ؛ غیر از علی (ع) که خوانده محمد (ص) برادرش
اسماء الحسنی به زبان ترکی
علت مهلت دادن خداوند به «ظالمان»