صبح اولدی هر طرفدن اوجالدی اذان سسی

گویا گلیر ملائکه لردن قرآن سسی

بیر سس تاپانمیرام اونا بنزه ر، قویون دئییم:

بنزه ر بونا اگر ائشیدیلسیدی جان سسی

سانکی اوشاقلیقیم کیمی ننیمده یاتمیشام

لای لای دئییر منه آنامین مهربان سسی

سانکی سفرده یم اویادیرلار کی دور چاتاخ

زنگ شتر چالیر ، کئچرک کاروان سسی

سانکی چوبان یاییب قوزونی داغدا نی چالیر

رؤیا دوغور قوزی قولاغیندا چوبان سسی

جسمیم قوجالسادا هله عشقیم قوجالمیوب

جینگیلده ییر هله قولاغیمدا جوان سسی

سانکی زمان گوله شدی منی گوپسدی یئره

شعریم یازیم اولوب ییخیلان پهلوان سسی

آخیر زماندی بیر قولاق آس عرشی تیتره دیر

ملت لرین هارای مددی ، الامان سسی

انسان خزانی دیر تؤکولور جان خزه ل کیمی

سازتک خزل یاغاندا سیزیلدار خزان سسی

قیرخ ایلدی دوستاغام قالا بیلمز او یاغلی سس

یاغ سیز سادا قبول ائله مندن یاوان سسی

من ده سسیم اوجالسا گرک دیر ،یامان دئییم

ملت آجیخلی دی اوجالیبدی یامان سسی

دولدور نواره قوی قالا ، بیر گون ، بو کؤرپه لر

آلقیشلاسینلا ذوق ایله بیزده ن قالان سسی

مقناطیس اولسا سسده چکر ، انقلابدا باخ

آزادلیق آلدی سرداریمین قهرمان سسی

انسان قوجالمیش اولسا ،قولاخلار آغیرلاشار

سانکی یازیق قولاخدا ،گورولدور زمان سسی

باخ بو درین سکوته سحر هانسی بیر نوار

ضبط ایلیه بیلر بئله بیر جاودان سسی؟

سانجیر منی بو فیشقا چالانلاردا شهریار

من نیله ییم کی فیشقایا بنزه ر ایلان سسی