نشریه الکترونیکی ائل اوبا

و من آیاته خلق السّموات و الأرض و اختلاف ألسنتکم و ألوانکم إنّ فی ذلک لآیات للعالِمین

خان ننه – استاد شهریار


لینک مطلب : http://eloba.ir/?p=1424

خان ننه ، هایاندا قالدین

بئله باشیوا دولانیم

 

نئجه من سنی ایتیردیم !

دا سنین تایین تاپیلماز

 

سن اؤلن گون ، عمه گلدی

منی گتدی آیری کنده

 

من اوشاق ، نه آنلایایدیم ؟

باشیمی قاتیب اوشاقلار

 

نئچه گون من اوردا قالدیم

قاییدیب گلنده ، باخدیم

 

یئریوی ییغیشدیریبلار

نه اؤزون ، و نه یئرین وار

 

« هانی خان ننه م ؟ » سوروشدوم

دئدیلر کی : خان ننه نی

 

آپاریبلار کربلایه

کی شفاسین اوردان آلسین

 

سفری اوزون سفردیر

بیرایکی ایل چکر گلینجه

 

نئجه آغلارام یانیخلی

نئچه گون ائله چیغیردیم

 

کی سه سیم ، سینم توتولدو

او ، من اولماسام یانیندا

 

اؤزی هئچ یئره گئده نمه ز

بو سفر نولوبدو ، من سیز

 

اؤزو تک قویوب گئدیبدیر ؟

هامیدان آجیق ائده ر کن

 

هامییا آجیقلی باخدیم

سونرا باشلادیم کی : منده

 

گئدیره م اونون دالینجا

دئدیلر : سنین کی تئزدیر

 

امامین مزاری اوسته

اوشاغی آپارماق اولماز

 

سن اوخی ، قرآنی تئز چیخ

سن اونی چیخینجا بلکه

 

گله خان ننه سفردن

ته له سیک روانلاماقدا

 

اوخویوب قرآنی چیخدیم

کی یازیم سنه : گل ایندی

 

داها چیخمیشام قرآنی

منه سوقت آل گلنده

 

آما هر کاغاذ یازاندا

آقامین گؤزو دولاردی

 

سنده کی گلیب چیخمادین

نئچه ایل بو اینتظارلا

 

گونی ، هفته نی سایاردیم

تا یاواش – یاواش گؤز آچدیم

 

آنلادیم کی ، سن اؤلوبسن !

بیله بیلمییه هنوزدا

 

اوره گیمده بیر ایتیک وار

گؤزوم آختارار همیشه

 

نه یاماندی بو ایتیکلر

خان ننه جانیم ، نولیدی

 

سنی بیرده من تاپایدیم

او آیاقلار اوسته ، بیرده

 

دؤشه نیب بیر آغلایایدیم

قولو حلقه سالمیش ایپ تک

 

او آیاقی باغلایایدیم

کی داها گئده نمییه یدین

 

گئجه لر یاتاندا ، سن ده

منی قوینونا آلاردین

 

نئجه باغریوا باساردین

قولون اوسته گاه سالاردین

 

آجی دونیانی آتارکن

ایکیمیز شیرین یاتاردیق

 

یوخودا ( لولی ) آتارکن

سنی من بلشدیره ردیم

 

گئجه لی ، سو قیزدیراردین

اؤزووی تمیزلیه ردین

 

گئنه ده منی اؤپه ردین

هئچ منه آجیقلامازدین

 

ساواشان منه کیم اولسون

سن منه هاوار دوراردین

 

منی ، سن آنام دؤیه نده

قاپیب آرادان چیخاردین

 

ائله ایستیلیک او ایسته ک

داها کیمسه ده اولورمو ؟

 

اوره گیم دئییر کی : یوخ – یوخ

او ده رین صفالی ایسته ک

 

منیم او عزیزلیغیم تک

سنیله گئدیب ، توکندی

 

خان ننه اؤزون دئییردین

کی : سنه بهشت ده ، الله

 

وئره جه ک نه ایستیور سن

بو سؤزون یادیندا قالسین

 

منه قولینی وئریبسه ن

ائله بیر گونوم اولورسا

 

بیلیرسن نه ایستیه رم من ؟

سؤزیمه درست قولاق وئر :

 

سن ایله ن اوشاخلیق عهدین

خان ننه آمان ، نولیدی

 

بیر اوشاخلیغی تاپایدیم

بیرده من سنه چاتایدیم

 

سنیلن قوجاقلاشایدیم

سنیلن بیر آغلاشایدیم

 

یئنیدن اوشاق اولورکن

قوجاغیندا بیر یاتایدیم

 

ائله بیر بهشت اولورسا داها من اؤز الله هیمدان