بیری واریدی بیری یوخویدو ، حاتم آدلی بیر ایگید اوغلان واریدی ، او آناسی ایله بیرلیکده یاشییردی ، حاتمین بیر ایتی ، بیر کچیسی بیرده تویوغو واریدی. بوتون ایل بویونجا تویوق گونده بیر یومورتا دوغوب ، کچی ایسه بیر قاب سود وریردی. بو سودنن یومورتا آنا-بالانی ایل اوزونو باش باشا کچیندیریردی. حاتم تویوغا ساری بوغدا ، کچیه قارا یونجا ، ایته ده قورو چورک وریردی.

کچی ایلده دورد دیشی قوزو دوغوردو ، نیسه بو قوزولار ائله بیر آز بویوینده قورد اونلاری اوغورلویوب ییردی. یازیق کچی گوزونون یاشین توکوب اونوندا بالاسی اولوب بویودمغی گوزلویوردو. حاتم چوخ چالیشیردی اویسا قوردو توتا بیلمیردی.

کچینین بیر قویون باجیلیغی واریدی. گونده اوتلاغا گئدنده باجیلیغی یانینا گئدیب اونون اوریینی اوودوردو. کچی گونونو باجیلیغیننان کچیریردی. گونلرین بیر گونو کچی گنه اوتلاغا چیخمیشدی ، او یام یاشیل بیر اوتلوقدا اوتلویوردو ، ایت ده اونون یانیندایدی ، بیر گوردو باجیلیغی آغلایا آغلایا گلیر ، کچی سوروشدو:

– قویون باجی ، سویله گوروم نیه آغلاییرسان؟

قویون ددی:

– آغلاماییم به نه ائلییم؟ بیرجه بالام وارییدی ، اونو دا بو گئجه ، قورد آپاردی!

کچی ایله قویون بیر بیریلرینه قوشولوب آغلادیلار. ایت اوتدان-زاددان یولوشتوروب قویونون قاباغینا توکدو ، قویون دویونجاق اوت ییب ، اونلارلا سوزون بیتیریب یولا قویولدو ، گئد ها گئد قاباغینا بیر تولکو چیخدی.

تولکو اونو گوروب ددی:

– قویون باجی ، هارا گئدیرسن؟

قویون دیشلرینی شاققیلدادیب ددی:

– اولان ، نه قویونو ، نه کچیسی ، من قوردام ، قویون دریسینه گیرمیشم ، اوولایاجاغیمی بو یولنان توزاغا سالیرام.

تولکو گولوب ددی:

– اوهو ، نجه سن قورد قارداش ، یاخچی توزاق تاپیپسان ، دوزون ده گوروم بو گون بیغیین آلتیندان نه کچیریبسن؟

قورد یانیت وریب ددی:

– تولکو ، آند اولسون ، اوچ گوندور دیلیمه ات دیمییب!

تولکو ددی:

– اوزویون یورولموش بیلسن یولداشیین اولموش بیل ، یاخچی نه یه گوره قویون دریسی گییبسن ، بونون سنه قازانجی ندی؟

قورد ددی:

– بونون منه قازانجی چوخدو ، حاتمین کچیسینن باجیلیق اولموشام ، او دوغوب بویودور من ییرم.

تولکو ددی:

– نه اولسون ، بودو آجسان؟!

قورد ددی:

– کچی دریسینه سیغیشمایینجاخ کوکدور ، اونون توکون چکسن یئریندن یاغ دامار ، گئدک سن های سال من بیله سین آللادیم

چکیم بیر قیراغا یییک.

تولکو ددی:

– کچی یانلیزدی؟

قورد ددی:

– یانیندا بیر ایت ده وار.

تولکو ایت آدینی اشیدیب ددی:

– یولداشین ساتان سونوندا قاداسینی چکر ، قورخورام قورونون اودونا یاشدا یانا.

قورد ددی:

– ایشیین گور ، منیم یولداشلیغیم ائله بئله اولار ، من قویون دریسینن چیخاجام ، گئدریک ، سن سس ائله ییب ایتین آغزینی باشقا یئره سالارسان ، من کچینی اوغورلویارام.

تولکو قوردنان بیرلشدی. قورد قویون دریسینن چیخدی ، بونلار بیر بیرینه قوشولوب دوز کچی اوتلایان یئرین یاخینلیخلارینا گئلدیلر ، بورادا بیر تویوقدا وارییدی. تویوغو گورنده تولکونون آغزی سولاندی. تولکو قوردو کشیکه قویدو ، اوزو چکیلیب اوزاغا گئدیب بیر نچه یول واققیلدادی ، ایت اونون سسین اشیدن کیمین هورویه هورویه اونا ساری گئددی ، قورد بو چان یولا توشدو ، کچینی توتوب بئلینه توللاییب یولا دوزلدی.

تویوق بونو گورن کیمین ، قاناد آچیب گویه قالخدی تز اوزون حاتمه چاتدیریب آغلایا آغلایا ددی:

– نیه دوروبسان؟ کچینی قورد آپاردی!

حاتم بیر باشینا ووردو بیر گوزونه دابان آچیب یولا توشدو. تویوقدا قاناد آچیب گویه قالخدی. بو چان ایت ده گئلیب چیخدی.

تویوق گویده ، حاتمله ایتده یئرده یئل کیمین قاچیردیلار. اونلار کسمه یولدان گئدیب قوردو باسدیلار. حاتم قوردو گوز گوز ائله ییب بیر اوخ آتدی ، قورد یارالاندی. قورد کچینی بیراخیب اوزون قایادان توللادی ، یاری دیرلی اولسادا اوزون اولومدن قورتاردی. حاتم کچینی گوتوروب قایتارماخدا اولسون ، ایزین ورین سیزه تولکودن دییم ، تولکو اوجا بیر یئردن اولانلارا باخیردی.

حاتم گئدندن سونرا یاواش یاواش قوردون یانینا گئلیب گوردو قورد قیزیل قانین ایچینده دی ، اونون یاراسین باغلاییب ددی:

– قورد قارداش من سنی بئله قوچاق بیلمیردیم ، کیمسه او قووها قوودان قورتولمازییدی سن ایدین قورتولدون.

قورد ددی:

– بیر زاد دییر ، اولمه سم بونون حاییفین اونلاردان چیخارام.

تولکو ددی:

– بیر زاد ائده بیلمه یه جکسن.

قورد ددی:

من گنه قویون دریسینه گیینه جم ، سن منی ساتماغا کویه آپار بیر یول تاپیپ منی قویون آدینا حاتمه سات. گئریسینن ایشین یوخدو.

تولکو ددی:

– بیر تومن وررسن کویدن یمه لی بیر زادلار آلیب تورباما توکرم ، سونرا سنی ساتارام.

قورد ددی:

– یاخچی وررم.

قورد ایله تولکو بیر پالتار تیکیجی یانینا گئلدیلر ، تولکو ددی:

– تیکیجی قارداش ، منه بیر داوارچی پالتاری تیک.

تیکیجی ددی:

– تولکو نه اولوبدو ، داوارچی پالتارین نینیرسن؟

تولکو ددی:

– قورد قارداش پیس ایشدن ال چکیب ، او دا باشقالارینی اوولامیر ، بیر نچه قویون آلمیشیق داوارچیلیق ائلیه جییق.

تیکیجی ددی:

– سنه گووه نن داشا دونسون.

تولکو ددی:

– سنین نه ایشیین قالیب ، پالتاری تیک ور ، قارشیلیغین آل.

تیکیجی اولارا بیر داوارچی پالتاری تیکدی ، بولار پالتاری گوتوروب بیر گیزلین یئره چکیلدیلر. تولکو پالتاری گیدی ، قورددا قویون دریسینه گیردی. تولکو قوردو قاباغینا قاتیب آل ورچیلر یئرینه چاتدیلار. او گون حاتمده اورایا گئلمیشدی. او گزه گزه تولکونون یانینا گلیب ، قویونو تانیدی. قویونون باشین تومارلاییب ددی:

– داوارچی قارداش ، بو قویون منیم کچیمین باجیلیقیدیر ، بوجور دامازلیق قویون ساتیلارمی؟

تولکو ددی:

– ائلیه جغیم یوخدور ، الیم آشاغیدیر ، اونا گوره ساتیرام.

حاتم ددی:

– من بو قویونو آپاریرام ، نچه یه وریرسن؟

تولکو ددی:

– آت دئیل ، دوه دئیل ، نچه وریرسن ور.

حاتم ددی:

– سوز سنین دی ، نچه ورجغیمی ده؟

تولکو ددی:

– سنه اوچ تومن.

حاتم دینمز سویله مز اوچ تومن وردیب قویونو آلدی اوینه گئتیردی ، تولکو ده بیر چوخ ات آلیب اوزونو مشه یه وردی ، حاتمین آناسیدا بو قویونو تانییردی ، او چوخ سوینیب قویونون اوزونن گوزونن اوپدو.

قویونو کچی ایله تویوقون یانینا آپاردیلار. بونلاردا اوپوشوب گوروشدولر ، بیر یولداشجا قوشولوم قوردولار.

کچی ناغارا ووردو تویوقدا زیرنا چالیب بیرلیکده سئوینجله دولوب داشدیلار. بیر جار بئله کئچدی. نیسه قورد یئرینه سالیب کچینی ییه بیلمه دی. ایت اونلاردان آیریلمیردی ، قورد ایسه اته تامازدی
قالمیشدی ، گوندن گونه آریقلییردی ، بیر گون کچی حاتمه ددی:

– باجیلیغیم گوندن گونه آریقلییر ، اوزوده دوداقینی دوداقی اوزه رینه قویوب بیر زاد دمیر.

حاتم قورددان سوروشدو:

– قویون ، نه ایندی؟

قویون ددی:

– سویوق دییب ، بوغازیم آغرییر.

حاتم ددی:

– تویوق گونده بیر یومورتا دوغور ، ییرسن بوغازیین آغریسی کچر ، توختارسان.

هیه حاتم گونده تویوقون یومورتاسین قوردا وریردی.

قورد گونده بیر یومورتا ییب اولمه دیریل دولانیر ، کچینی آپارماغی اوموردو. بیر نچه گونده بئله کچدی. قورد گوردو گونده بیر یومورتاینان دولانا بیلمه یه جک ، سونوندا آجیندان اوله جک ، حاتمه ددی:

– من توختامادیم ، بوغازیم لاب قوووشور.

حاتم ددی:
– کچینین سودون ده وررم ایچرسن ، یاخچی اولارسان.

حاتم گونده کچیدن ساغدیغی سودوده قوردا وریردی.

ائله اولموشدو حاتم ایله آناسی یاوانلیقا تامازدی قالمیشدیلار ، بیر گون قورد اوز اوزونه ددی: حاتم اوده اولاناجاق ، من کچینی آپارا بیلمیه جم ، یاخچیسی بونو ، اونو اوزاق یولا گوندرم، آخشام قورد حاتمین یانینا گئلیب ددی:

– بوغازیم لاب چوخ آغرییر ، گئد منی توختادماغا بیریسینی گئتیر.

حاتمین اونا یازیغی گئلیب ، کویه ساری یولا توشدو ، او گئدن کیمین قورد کچی ایله تویوقو یانلاییب ددی:

– اوره ییم اوستومده دورمور ، بیر اوتلاقا آغاجلیقا چیخاق ، اوره ییم آچیلسین.

کچی قویونو گوتوروب دیشاری آپاردی ، قورد اویان بویانا گوز گزدیردی ، حاتم یوخ ، ایت یوخ ، بوندان کیم کچر؟ بیردن سیچراییب کچینی یاخالادی.

کچی ددی:

– باجی بو ندیر ، منی نیه دیشلییرسن؟

قورد ددی:

– سسیین کس ، دلی اولموشام.

قورد کچینی بلینه آتیب یولا دوزلدی ، کچی ایسه بیرجه یول برکدن قیشقیردی:

– یاردیما چاتین منی قویون آپاردی.

تویوق سسه اشیه چیخیب ، گوردو ، قویون کچینی گوتوروب قاچیر. تویوق تئز قاناد آچیب آتیلدی گویه ایتی سسله دی ، ایکیسی ده قاچا قاچا گئدیب حاتمه چاتدی ، تویوق آغلایا آغلایا ددی:

– نیه دوروبسان؟ قویون کچینی آپاردی.

حاتم دوروخوب ددی:

– سن نه دییرسن؟ کچینی ده قویون آپارارمی؟

تویوق ددی:

– دانیشماق یئری دئیل ، آپاردی دییرم ، تئز اول.

حاتم کسمه یولدان گئدیب قوردو قاباخلادی. گوردو بودو قویون کچینی بوغازلاییب یئل کیمین گئدیر ، اونلار بیرر بیرر ، بیر یاندان توکولوب قوردو توتدولار ، قورد دورومو بئله گورنده اوزون دلیلیغه وردو ، اونو دلی اولوب دیه بیلسینلر ، حاتم قوردا قانمادی ، بوینونا بیر ایپ سالیب سورودلویه سورودلویه اوینه گئتیردی ، کچینین اونا اوره یی یانیب ددی:

– حاتم اونو کویه آپار ، بیه دوغوردان دلی اولوبدور!

حاتم ددی:

– دلی اولوب اوزون قایادان آتسین ، داها سنی نیه آپاریر؟ من بونو اولدوره جم ، بو قودوروبدو.

حاتم قیلیجی چکیب ، اونو وورماق ایستیه نده ، قورد دیشلرین شاققیلدادی. حاتم تز اونو یاخالادی. دریسین بوغازیننان چیخاردیب نه گوردو؟

قورد قویون دریسینه گیرمیش قورددور ، حاتم اونو تانییب ددی:

– اوهو ، سن قویون دریسینه گیرمیش قوردویموشسان! من سنی گویده آختاریردیم ، یئرده الیمه توشوبسن ، سن ایلده منیم کچیمین دورد بالاسین ییبسن.

قورد یالواریب یاخارسادا ، حاتم اونو سوزونه باخمادی. قیلیجی اونون باشینا اله ووردو ، باشی ایکیه آیریلدی ، حاتم اونون دریسین سویدو. کچینی ، تویوقنان ، ایتیده گوتوروب اوینه گئلدی.

اونلار بوندان سونرا سئوینجله یاشادیلار.

 

قایناق :  nagillar.az ، چئویرن : حسین خیری

Print Friendly, PDF & Email