بللی دیر – خسته قاسیم

آی آغالار سیزه تعریف ائیله ییم

گلن آیین گلیشیندن بللی دیر

کیمی قونار ، کیمی کؤچر یوردوندان

فلکینده گردیشیندن بللی دیر

نامرده اوز سالما اوزون گؤتورمز

نامرد قوناغینا چؤرک گتیرمز

اوت کؤک اوسته بیتر اصلین ایتیرمز

بد اصیل ده یئریشیندن بللی دیر

هرکیم قاپیسیندا بئش کئچی ملر

تکبر ائیله ییب مجلیسه گلر

گؤزو کله سینده هر جایی ( آوارا – سرسری ) گولر

هر جای ده گولوشوندن بللی دیر

صاباح محشر گونو قورارلار سانی

کیمسه سالا بیلمز قصری ائیوانی

هر آنلاماز دئییر منم کئیوانی ( کد خدا – خان )

کئیوانی دا تیکیشدن بللی دیر

« خسته قاسیم » سؤزون سالما درینه

عاشیق ، معشوق ایلن گرک سورونه

مرد آند ایچر ایستکلینین سرینه

ایستکلی ده باخیشیندان بللی دیر

ائل اوبا