اشعث اوغلو جناب مسلمین ساواشینا گئدیر

زیاد اوغلو مسجدده قاراوول قویدوغو حریث اوغلونا خبر وئردی کی ، قیس طایفاسیندان آلتمیش یاخود یئتمیش نفر اشعث اغلو ایله مسلمین ساواشینا گؤندرسین (اشعث اوغلو اؤز طایفاسی ایله بو ساواشا گئتمکدن خوشو گلمیردی چونکی هئچ طایفا عقیل اوغلو ایله ساواشماغی سئومیردی.)

حریث اوغلو عمرو بن عبد الله بن عباس سلمی نی آلتمیش – یئتمیش نفرله بیرلیکده اشعث اوغلونا قوشوب گوندردی. اونلار گلیب مسلم اولان ائوه یئتیشدیلر.

 

جناب مسلم اشعث اوغلونون ساواشینا چیخیر

جناب مسلم آت دیرناقلارینین سسینی و آداملارین های کویونو ائشیدیب بیلدی کی ، اونون اوستونه گلیرلر. قیلینج چکیب قارشیلارینا چیخدی.

کافرلر حمله ائتدیلر. او حضرت اونلارا شدتله یوگوروب قیلینجلا اونلاری ائودن چیخاردی. اونلار بیر داها ائوه یوگوردولر مسلم یئنه ده اونلاری چیخاردی. بیردن حمران اوغلو بکیر ملعون او نا بیر قیلینج ووروب دوداقلارینی یئره سالدى.

عقیل اوغلو آمان وئرمه ییب او ملعونوون باشینا بیر قیلینج ووردو . ایکینجی ضربه نی بئلینین اورتا سوموگوندن ائله ووردو کی ، آز قالا قارنیندان چیخدی بئله لیکله او ملعون جهنمه واصل اولدو.

او حیاسیزلار بو ماجرانی گؤردوکده بیر تعدادی داما چیخیب او یالقیزی داشلادیلار. قمیشلره اود ووروب او غریبین باشینا تؤکدولر.

او ، آجیقلی بیر حالدا حمله ائدیردی. اشعث اوغلو باغیردی: ای مسلم اؤزونو اؤلومه وئرمه. سنه آمان وئریریک. جناب مسلم او ملعونون سؤزونه قناعت ائتمه ییب یوگوردو و بو شعری اوخویوردو :

اقسمت لا اقتل الا حرا و ان رایت الموت شیئا نکرا

کل امری یوما ملاق شرا و یخلط البارد سخنأ مسرا

رد شعاع النفس قاستقرا اخاف ان اکذب او اغرا

یعنی: آزادلیقلا اؤله جگیمه آند ایچمیشم. اگر اؤلومی پیس گؤررسم ده هامی بیر گون شره راستلاشاجاقدیر. سویوغا آجی بیر ایستینی قاتاجاقدیر قورخودان سونرا آرخاینلیغا چاتمیشام. یالان یاخود آلدانیش اولدوغوندان قورخورام ملعون اشعث اوغلو دئدی: سنه یالان دئییلمیر و آل دئییلدیر. بونلار عمین اوشاغیدیر، سنی ووروب اؤلدورمیه جکلر.

داشلار او حضرتین بدنینی ازیب طاقتدن سالمیشدی. داها ساواشا بیلمیردی. آرخاسینی دیوارا سووکه ییب دایانمیشدی. اشعث اوغلو یاخینلاشیب دئدی :

بیز سنه آمان وئریریک. جناب مسلم «آمان وارمی منه»؟ دئیه سوردو.

اشعث اوغلو «بلی» دئیه جاواب وئردی. او اوتانمازلاردا « بلی سن آمانداسان» دئدیلر. جناب مسلم دئدی: هر گاه منه آمان وئرمه سیدینیز الیمى الینیزه وئرمزدیم.

اونلار مسلمین تسلیم اولدوغونو بیلدیلر. قیلینجین بوینوندان آسیب قاطیرا میندیردیلر. جناب مسلمین گؤز باشی آخیردی مأیوس بیر حالدا دئدی: بر«غدر» ین بیرینجیسیدیر.

اشعث اوغلو «سنه بیر ضرر یئتیشمیه جگینی امید ائدیرم» دئدی. جناب مسلم دئدی: امید ائتمکدن باشقا چاره یوخدور. هاردادیر آمانیز انا لله و انا الیه راجعون ، سونرا آغلادی.

عمرو بن عبدالله بن عباس او حضرته دئدی: سنین ایسته دیگینی ایسته ین بیر آدام بو وضعیته دوشرسه آغلاماز. جناب مسلم بویوردو : آند الوسون آللاها اؤز حالیما یا اؤلمگیمه (هرچند اؤلمگی سنومیرم آغلامیرام. بلکه بورا دوغرو اوز توتوب گلمکده اولان ائل طایفا مین حالینا امام حسینین حالینا آغلاییرام.

 

جناب مسلم اشعث اوغلونا وصیت ائدیر

سونرا او حضرت اوزونو اشعث اوغلونا توتوب دئدی: ای آللاهین بندہ سی آللاه حاققی منه آمان وئرمکدن عاجز سن. بیر خیر ایش گؤره بیلرسنمی؟

بیر آدام گونده ره سن منیم دیلیمدن امام حسین علیه السلاما بو وضعیتی یئتیره ، بیلیرم اؤز اهل بیتی ایله بویانا گلیر. بو آغلاییب سیتغادیغیم دا اونون اوچوندور.

بیر نفر گوندر امام حسین علیه السلاما بئله دیسین: عقیل اوغلو منی گوندریب اؤزو ایسه اسیر دوشوب و اؤلومدن باشقا بیر شئی گؤرموردو. مسلم دئییر: ای حسین قاییت تا کوفه اهلی سنه مکر ائتمه سین. چونکی بونلار سنین آتانین اصحابیدیرلار. آتان بونلاردان اوزاقلاشماق اوچون اؤلوم دیله ییردی.

کوفه لیلر سنه ده ، منه ده یالان ساندیلار. من ایسه یالان دئمیرم.

اشعث اوغلو دئدی: آند ایچیرم بو ایشی گوروب زیاد اوغلونا بیلدیرجه یم کی من سنه آمان وئرمیشم…..

 

جناب مسلم دارالاماره سارا یینین قاپیسیندا

اشعث اوغلو او حضرتی دارالاماره سارایینین قاپیسینا گتیردی. اهالی گیریش اذنی آلماق اوچون سارای قاپیسیندا اوتورموشدولار. اونلارین آراسیندا عماره بن عقبه بن ابی معیط ، عمرو بن حریث ، مسلم بن عمرو و کثیر بن شهاب دا اوردایدیلار.

قاپی آغزیندا بیر کوزه سرین سو واریدی. جناب مسلم چوخ سوسوموشدو. سوو گؤروب دئدی: بو سودان منه ایچیردین. مسلم بن عمرو باهلی «گؤرور سنمی نه سریندیر؟» دئیه آرتیردی (یوخ ، آند اولسون آللاها بو سودان بیر داملا دا دادمایاجانسان او قدر کی ، جهنم اودونو داداسان.»

جناب مسلم بویوردو : وای اولسون سنه کیمسن؟ باهلی دئدی: من ، سنین داندیغین حاققی تانیان ، سن حیله ائتدیگین اماما نصیحت ائدن و سن عصیان ائتدیگین حوکمدارا بویون اگن مسلم بن عمرو باهلی یم.

جناب مسلم دئدی: آنان سنسیز قالسین. نه قدر آغزی ییرتیق واجلافسان. سن نه قدر داش اورگ سن ، سن ای باهله اوغلو جهنم اودونا مندن داها آرتیق یاراشیرسان.

سونرا او حضرت آرخاسینی دیوارا سؤوکه ییب اگلشدی. حریث اوغلو غلامینی

گؤنده ریب بیر ایچیم سو گتیردی.

غلام کاسانی سو ایله دولدوروب مسلمه وئردی. او حضرت ایچمک ایسته دیکده کاسا قانلا دولدو. کاسانی یئره بوشالتدی. غلام یئنه دولدوردو ، یئنه ایچمک ایسته دیکده قانلا دولدو. اوچونجو دفعه سو ایچمک ایستدیکده دیشلری کاسایا تؤکولدو.

دئدی: شکر اولسون آللاها بو سو منه قسمت اولسایدی یقین ایچردیم.

اشعث اوغلو گیریش اذنی آلیب اونو زیاد اوغلونون یانینا آپاردی. جناب مسلم امیرالمؤمنین آدی ایله سالام وئرمدی. قاراووللار سببینی سوروشدولار. دئدی: منی اؤلدورمک ایسته ییرسه نه اوچون سالام وئریم؟ یوخسا اؤلدورمک ایسته میرسه سالامیم چوخ اولاجاقدیر.

زیاد اوغلو دئدی: اوز جانیم اوچون اوله جکسن. جناب مسلم ائله دیرمی؟ سوردو او ملعون: «ائله دیر » دئدی.

جناب مسلم دئدی فدعنی اوص الى بعضی قومی. یعنی اوندا قوى بعضی آداملاریما وصیت اندیم.

 

جناب مسلمین سعد اوغلونا وصیتی

جناب مسلم زیاد اوغلونون مجلیسینه باخوب سعد اوغلو عومری گؤردو . اونا دئدی: ای عؤمر منلن سنین آرامیزدا قوهوملوق واردیر .

سنه بیر حاجتیم واردیر. او حاجتی یئرینه یئتیرمگین واجبدیر. لاکین گیزلیدیر. سعد اوغلو عقیل اوغلونون حاجتینی اونا دئمگی قبول ائتمدی. زیاد اوغلو دئدی: بو ایشدن چکینمه. گور عمین اوغلونون حاجتی ندیر؟ سعد اوغلو مسلم ایله مجلسین بیر بوجاغیندا اوتوردولار. زیاد اوغلو اونلاری گؤروردو.

جناب مسلم سعد اوغلونا دئدی: کوفه ده یئددی یوز درهم بورجوم واردیر. اونو وئره سن من اؤلندن سونرا ایسه جنازه می زیاد اوغلوندان آلیب باسدیراسان.

نهایت بیر نفر گونده ره سن حسینه دئیه کی ، کوفه یه گلمه سین. چونکی من بیر مکتوبدا کوفه اهلینین بیعت ائتدیکلرینی اونا یازمیشام. او دور کی اونون کوفه یه گله جگینی یقین ائدیرم.

 

جناب مسلم زیاد اوغلونون قارشیسیندا

سونرا زیاد اوغلو دئدی: ای عقیل اوغلو! اهالینین ایشی و سؤزو بیر ایدی سن گلیب اونلاری بیر – بیریندن آییردین. بیر سیراسینی بؤیودوب بیر سیراسینی کیچپلتدین.

مسلم ، «یوخ بئله دئییلدیر» دئیه سؤزونه داوام ائتدیردی. «من گلمدیم. کوفه اهلی دئدیلر: سنین آتان یاخچیلاری اولدوروب، قانلارین تؤکوب و بو شهرده کسری و قیصرین گردویو ایشلری گؤروب. بیز ایسه عدالتی برپا ائدیب آللاه حوکمونه چاغیرماغا گلمیشیک.»

زیاد اوغلو دئدی: ای فاسق سن نه سن ، بو سؤزلر ندیر؟ بیز بورادا بو اهالیه بئله رفتار ائتمیردیک. بلکه سن مدینه ده چاخیر ایچیردین.

مسلم ، «منمی چاخیر ایچیردیم؟» دئیه سوردو. سونرا سؤزونه داوام ائتدیردی: آللاه حاققی تانری سنین یالان دئمگینی بیلیر. من چاخیر ایچمه میشم.

چاخیر ایچمگه مندن داها حاقلیسی مسلمانلارین قانین ایچن تانرینین حارام ائتمگینه باخمایاراق آدام اؤلدورن. قاتل اولمایانی اؤلدورن. آجیق و دوشمانلیق اوستونده قتل ائده ن و لهو و لعب ایش گؤرندیر کی ، اؤزونو تمیزه چیخاریر. سانکی بیر ایش گؤرمه میشدیر.

زیاد اوغلو دئدی: ای فاسق نفسین بیر شئی ایسته ییر کی ، تانری سنی اونا چاتماغا موفق ائتمدی. چونکی سن خلافته لایق دئییلسن.

عقیل اوغلو ، «پس خلافت اهلی کیمیدیر زیاد اوغلو ؟» دئیه سوردو.

زیاد اوغلو: «امیرالمؤمنین یزید » دئیه جاواب وئردی.

مسلم دئدی: شکر اولسون آللاها ، بیزیمله سیزین آرامیزدا اونون حؤکم ائتمگینه راضی اولموشوق.

زیاد اوغلو دئدی: ائله ظن ائدیرسنمی کی خلافتدن سیزه بیر پای چاتاجاق؟

مسلم دئدی: آللاها آند اولسون بو ظن دئییل تمامیله یقیندیر.

زیاد اوغلو: تانری منی اؤلدورسون اگر اسلامدا بیر کیمسه اؤلمه ین وضعیتده سنی اؤلدورمه سم.

مسلم: سن ایسه پیس شکیلده اؤلدورمگی و پیس اخلاقیاتی بوشلاما ، سندن باشقا هئچ کیم بوجور ایشلری گورمگه حاقلی دئییلدیر.

زیاد اوغلو جناب مسلیمی، امام حسینی، حضرت علینی و عقیلی یانمانلاماغا و پیس دانیشماغا باشلادی.

قایناق : کربلا ماجراسی ، روایت : ابو مخنف لوط بن یحیاداندیر ، نشر ائدن : اسلامی تبلیغات تشکیلاتی ، تدقیقاتچی : شیخ محمد هادی یوسفی ، چئویرن : شیخ عباس امامی کرکوکلو ، دیجیتال یاییمجیلیک : ائل اوبا

Print Friendly, PDF & Email