توفارقانلی عاشیق عاباسین ایکینجی پاراسی

عباس مهیار

فولکلور عاشیق ناغیل لاری – «توفارقان» روایتینده

توفارقانلی عاشیق عاباسین ایکینجی پاراسی

گول گز دری یب گولی دسده / بیر چاپار سالمیشام دوستا

چیخیب دور مو شام پول اوسته / باغریم قان اولدی یار گلمز

عاباس اورادان اوز قویوب گول گزین كردك اوتاغینا گندیب گؤروب له له وار، یوردی یوخ اور بی گینه درده گلیب بئله دبیب:

گینه گلدیم وران اوتاق / گورونمز گول گز گورونمز

اورگیمه ویردون بیرتاق / گورو نمر گول گز گورو نمز

آی نی یه گیریبدی قاره / باغریم باشی اولوب پاره

یار گندیب هانسی دی یاره / گورو نمر گول گز گورو نمز

من عاباسام یانا یانا / یاندی باغری دوندی قانا

یاریم گندیب ایصفهانا / گورو نمز گول گز گورونمز

عاباسین نه نه سی اوغلونون گلمه ییندن خبری اولوب، اوزون اونا یئتیریب و دییب: «اوغول باغیر دالاخ اولما، ئوزووی یئمه، ایندی یه چك گول گزی آپار می ییبلار. گول گز همشه باهار باغیندادی».

عاباس نه نه سین گؤروب اورك لندی و دئدی:

باشینا دوندوگوم آنا / اورگیم دوب دولی قاندی

خبر آلدیم طبیب لردن/ دئدی دردون به درماندی

دولاندی پیمانام دولدی / سارالدی گول رنگیم سولدی

بیریار کی دیل بیلمز اولدی / او درد ئولومنن یاماندی

عاباسام قهره دولمیشام / سارالیب نی تك سولمیشام

بوگون همدم سیز قالمیشام / دونیا باشیما تیفاندی

عاباس سؤزلرین دییندن سونرادا اورادا دورا بیلمییب، یار اوتاغیندان چیخیب يول باشلي ييب او قدر گئدیب کی همشه باهار باغينا يتيشيب اوزون بير جورونن باغا سالیب گول گزی بیر آغاش کؤلگه سینده تاپیب، دولی دولی اورکدن بیر ناله چکیب و بئله دييب:

سحری گلمیشم گولشن سئیرینه / گئنه گول روخسارون یادیما دوشدی

هریانا باخارام قونچه گؤرنده / لب شکر بارون یادیما دوشدی

گول گز عاباسدان چوخ یارالی دی، اولارکی بیرکیشی آروادین گردك اوتاغیندا قویوب سفره گئدسین؟ گول گز گوزونون یاشین سیلیب دئدی:

جانیم اوغلان دورما گوزوم ئوونده/ قئیت گئت مچیددی اویئرون سنون

قلبیمی اینجیتدون بو بیر سوزونده / حضرت صاحابدی اویئرون سنون

عاباس یارینین آجیقلانماغینا باخمی ییب، دردلی نیسگیللی سؤزونون دالیسین اوخویوب:

یاریم دایانیبدی گول ریحانه / جمالون گؤرمه سم اوللام دیوانه

بیر گوزاریم دوشدی نرگیزستانه / چشم جا دولارون یادیما دوشدی

عاشیق نه قدر ئوزین یار قاباغیندا سينديرسادا ياريندا قایداسیدورکی نازین چوخاتسین، اونا گوره گول گز بئله دییب:

بولبول اولسون قویمارام قونا گوله / سیر سوزومی سالدون ديل لردن ديله

بیر ساحاتدیخ ایشی قویدون مین ایله / قئیت گئت منبردی اویئرون سنون

بیرده داهی عاباسین حوصله سی قورتولور، ایستییرکی بیر دفعه یار داشین آتا و باش چوللو بیابانه قویا و ائله گئده کی قود قوشدا خبرین گتیر مییه.

آخی قایدا بونادی دردلی دردلی نین دردین بیله گرك، او زامان عاباسین گوزی بیر بولبوله ساتاشیر.

بونبول گول پیتاغیندا سینه سین ائله تیکانا ویریرکی گولون تیکانی بولبولون سینه سیندن باتیر و باشینین دالیسیندان چیخیر بولبول اورادا قورویوب گول پیتاغینا یاپیشیر، آما عاباسی خجالت تری باسیر و ئوزئوزونه دئیر «آی عاشیق تورپاخ سندن اوجا بیر کلمه سوزونن یاردان اینجی دون؟ سونرا سؤزونی بوشعریله باشا آپاریب:

ئولونجه گلمه رم یولوندا دیله / حق کمگون اولسون پیغمبر بئله

بولبول جانین قوربان ائیله ییر گوله / عاباس جان نثارون یادیما دوشدی

عاباس دئیر «گول گز جانیمداندا گئچمه لی اولسام دالونجا ايصفهانا گلیب سنی شاه عاباسین الیندن قورتاراجاغام»

سونرا گول گزدن آیری لیر دده نه نه سینین یانینا گلیر.

اونلاردان حلاللیق ایستی ییر که ایصفهانا گئدسین خواجه صاباح، عاباسین عمیسی دییر:

«اوغول بو یولدان قئیت قدیمنن دئیبلر، شاهین بیر آغزی اوتدی بیر آغزی سو، دئدی ئولدورون کیم سنون دادووا چاتاجاخ. موفته ئولوم قاپیدادی. اللشگینن ساغ یاشا. گل بو یولدان اوز دوندر».

عاباس بوسؤزلرین قاباغیندا عمی سینه بئله دئدی:

جانیم عمى منه ستم ائله مه / بیر عرضه یازارام خانا یئتیشی

دوداخکی لل اولدی یوخدی قیمتی / اودا من تك بزير گانا يئتیشی

یار منی گورجه ییین نیقابین آتدی / آیی بنده ویردی گونی یوباتدی

هر کس نازلی یارین چنگینه چاتدی / سکگیز جنت بیر ریضوانه یتیشی

بیر بولبولم بئل باغلارام گولومه / گول گز آدی ورد اولوبدی دیلیمه

هر کس یاری الین وئرسه الیمه / مهدی دیوانینده سانه یئتیشی

عاباس اوندان صونرا اوز یولداشلارينا تونوب و بئله دئدی:

نازلی یار گئدیری ایندی الیمدن / منده بو دونیادا نه قالیم ایندی

سینم اولدی دردی هیجران بارکشی / یارسیز بودنیادا نه قالیم ایندی

بسله میشدیم شیرین جانی شاه آلا / شاه بویورا قوللموخ لشكر شاهالا

قورخوم بودور نازلی یاری شاه آلا / پارسیز بودونیا دا نه قالیم ایندی

دئدم یاشی آخدی یاخا آخارمی / آنبار اولسا قیشا قالماز قار دامی

درد الیندن قورتا رسیدیم یاخامی / درمانسیر دونیادا، نه قالیم ایندی

مؤمنلر مؤمنی جوماده گئتدی / ملک لر سمایه جوماده گئتدی

عاباس اغلار یاریم جوماده گئتدی / یارسیز بودونیادا نه قالیم ایندی

عاباس شعرلرین قورتاراندان سونرا هامی یار یولداش قوهوم قارداش ائل طایفادان خوداحافظ ليك ائله يیب اوزون ایصفهان سفرینه آماده ائله ییب.

یاردالیسیجا همشه باهار باغینا طرف گئدیب آما گول گز کروانی هله یولا دوشمه میشدی. باهار چاغیدی. سئل لرسولار توفارقان چاییندا شاققئلدی ییب آخیردی یکه یکه داشلاری بیری بیرینه ویریب بولوتلی هاوادا بیر سهیمنلی تودقوننوخ یاراتمیشدی.

عاباس چایا طرف باخیب درتلی اورکدن بیر آه چکیب بئله دئیب:

آی جانیم توفارقان چایی / عجب سرخوش یانا گلدون

تؤكولوب اينك تختيندن /  قوجا گونبر سانا گلدون

دالی سین باغلی ییب قاردان / تؤكولور قیه دن جاردان

ایندی کئچر کوردو واردان / آلمیجاراشینا گلدون

مرد ایگید ییغار تایاسین / قاطارا چکر مایاسین

ییخار جاراغیل قایاسین / آل صیقاییش سانا گلدون

قیز گلین لر سویون ایچر / آغینان قره نی سئچر

قیرمیزی گول آتدان گئچر / قوچا قاضی کد سانا گلدون

عاباس دىیر بالخی بالخی / دولانسین فلکین چارخی

گواهیرین قاشقا آرخی / كوللو مسلمانا گلدون

عاباس شعر اوخوماقدان ئوزونه گلمه میشدی کی چکیلون اوزاخدان دورون سسی قولاغینا گلیب بیرواخ گؤروب کروان اودوها گئتدی عاباس ال آياخ ائله ییب کروانین دالى سيجا يول لانيب داغمانلار اتگینده ئوزون كروانا یئتیریب كروانین قاباغین کسیب.

قول عبدالله حوکمینن چوماقچیلار باشینا تؤكولوب و دویونجا عاباسی اودشدیریبلر سونرا كروان یولونا باشلی ییب عاباسین جان اینجى ييب اورك ياراسي نشدرلنيب بئله دئيب:

ای آغالار گئدنه باخ گئدنه / منی قویوب گوزی یاشلی یار گئدر

يوك لنيب دی قفله قاطیر برخانا / اله بيللم هر نه عالم وار گئدر

بودونیا دا یوخسول اولی وای اولی / آه چكمك دن الیف قددیم یای اولی

ال ویر مارام تر شا مامون ضای اولی / یار قوینوندا بیرجوت قوشانار گئدر

من گزمیشم آلچاغیله اوجانی / یار یولوندا قوربان دئدیم بو جانی

شاهلار ویران قویدی آذربایجانی / عاباس آغلار گول گز کیمی یار گئدر

دی یللر یوز دانیشان ئولر آما عاباس مین دانیشیب ئولمويوب.

نه سؤز اونی یوروب نه یول. گول گز دالیجا گئدیر تا سردری یه یتیشیر. اورادا دئیللر «بو گئجه شاه کروانی بیردا دوشوب» آخی اوزامان کی یوللاری قیسالدان اوت کیمی قیزان گول له کیمی گئدن يو گورك لر يوخيدی.

یولچیلار توفارقاندان تربیزه گئدنده سردری ده دو شرگه ائله ییب او گونون صاباحی تربیزه گئدردیلر عاباس گول گز قالان یئری صوروشور.

بیر اوتاق اونا نیشان وئریللر عاباس گول گز قالان اوتاغا گیریب دولی اور کدن بیر شعر اوخویوب:

گؤزل مجردم سنون یولوندا / دونیا جيفه سیندن خالصم باری

بیر در ده دو شمیشم ایوب در دی دی / گل اثله در دیمه چاره سن باری

جانیمی سالیب سان اودا گئدرسن / پروانه تك شاما، اودا گئدرسن

 سحر یار دالیجا او دا گندرسن / اود بودور سینمده خالی سن باری

قول اولان گیم گئدر قول ایاغینا / یوخسول اولان گئدر وار ایاغینا

توفارقانلی عاباس يار اياغينا / چکیلیب سینه مه داغ سن باری

عاباس گؤروب دورماخ یئری دئییل. اتاقدان چیخیب سردری بازارینا گلیب بیراز کهنه مه آلماسی آلیب یار ایزین توتوب یولا دوشوب سلیمان خان آدلی بیر سردری خانلاریندان عاباسا توش گلیب عاباسین حالین صوروشوب عاباس سئوگی دردین اونونان آرایا قويوب.

سلیمان خان دئیب عاباس بوسفردن قان اییسی گلیر. چوخلار بئله یوللاردا گئدیب موفته موسللم ئولوب و قارقا قوشدا خبرین گتیر مه ییب.

عاباس دئیر «سلیمان خان من گول گزدن گئچنمیرم سلیمان خان دئیر چوخ گؤزلدی؟»

عاباس دئیر:

ای آغالار نه یین تعریف ائله ییم / قلمنن آرتیقدی قاشی گول گزی

قاشلاری یا قوتدی کیر پی پی آلماس / عاشیق ئولدورمکدی ایشی گول گزی

بولبول کیمی آییردیبلار گولومنن / آیری دوشدوم وطنيمئن ائلیمنن

گئدرکی دور قالا بیلمز یولوندان / دوشدی قال مقاله باشی گول گزین

عرضه می ائله رم سولطانا خانا / محبتی چوخدور کار ائلر جانا

دوققوز آلما وئردیم سلیان خانا / دوردی اونون اولسون بئشی گول گزین

لاله تكين من سینه مدن داغلی یام / لاچین ویریب قول قانادی باغلی یام

ایندی بئله عاباس دئیب آغلی یام / آخار دیده سیندن یاشی گول گزین

عاباس یولا دوشور تربیزه یاخین بیر یئرده کروانا یتیشیر گولگزه گوزی ساتاشیر.

گول گز دئمه آی پاراسی ده.

عاباسین دردی دشیلیر و بئله دئیر:

ساللانا ساللانا گندن سلاطین / گل بئله ساللانما سوز ده یرسنه

آل یاشیل گئیینیب دورما، قارشیدا / یایین بد نظر دن گوز ده یوسنه

گئتمه گئتمه گوروم کیمین یاریسان / هانسی بخته ورین وفاداریسان

کؤلگه ده بسلنمیش قوزه ی قاریسان / سحرین یئل لری تئز ده یرسنه

عاباس دی یر هیچ کس یارین ئویمه سین / دویمه له یاخاوین چارپاز دویمه سین

دسته له زوفلرون یئره دیمه سین / يوللارغو بارلانار توز ده یرسنه

عاباس کروانی تربیزده ایتیریر آما یاریارین ای یین که ایتیره بیلمز.

اوزون تهران دروازاسینا یئتیریر بیر قدر یول گئدندن سونرا بئش یول آیریمینا یتیشیر. بیلمیر هانسی طرفه گئدسین کی یار گئدن یول اولسون اوزون دانلی یا دانلی یا بئله دئیب:

تكبر ائیله ییب لاف ائتمه گویلوم / بو بیر چؤلدی چوخ کروانلار ایتیبدی

خالقی بینمی ین منزیله چاتماز / بو بیر چؤلدی اهرمانلار ایتیبدی

بیر شوشه پارچاسی طرح ائتدی آیه / قیزیل گول قونچه سی باغلاندی مایه

اوغوللار آتایه قیزلار آنایه / عاق اولوبن دین ایمانلار ایتیبدی

ئولونجه گلمه رم یولوندا دیله / حق کمگون اولسون پیمبر بئله

خروزلار اصلانا، قارینچا فیله / دوودیوبن یول ارکانلار ایتیبدی

آلا قارقا لاچین دونی گئیبدی /  ساری گوردوم تولک طرلان ینبدی

هریئریندن قالخان منم دییبدی / عاباس کیمی سخندانلار ایتیبدی

عاباس علی آدین چاغیریپ بیریول قاباغینا توتوب گئدیب.

عاشیق هر یولیدا اگری گئدسه یار یولون دوز گئدر. عاباس چوخ گئدندن سونرا آغ يوققوشون حاجی آغاسینا يئتيشير.

کروانین توزی گوزونه ساتاشیر بوحالدا بیر او و سوروسی داغدان انیر. بئله بیلینیر کی اونلارین دالیجا شیکارچی دوشوب شاه آداملاری او وسوروسون گؤرن کیمی ال شمشیره، اوخا، کمانه آپاریب اوولارین دالی سیجا دوشوللر اورادا بیرگول گز قالیر بیرده سروان کی گول گزین دوه سینین اوساری اونون الينده ايدىو

عاباس اوزون سروانا یئتیریب بئله دئيب:

باشینا دوندو گوم قوربان اولدوغوم / اندیر کجاوه نی یاری گور میشم

آلا گوزلرینه حیران اولدوغوم / اندیر کجاوه نی یاری گورمیشم

بیر آچیدیم آرخالوقون آراسین / بیر امه یدیم لبلروون پاراسین

سن بیلی سن کجاوه نین چاراسین / اندیر کجاوه نی یاری گور میشم

کجاوه دوه سی آبی الوانا / من قوربانام اونی چکن سروانا

بیلمم نی یه گندیر یار ایصفهانا / اندیر کجاوه نی یاری گور میشم

سروان عاباسین سؤزلرینه باخمیر عاباس اونا حربه زور با گلیر آجیقلی شعرین بئله باشا وئریر:

من عاباسام یوللار اوسده دورارام / گاه گئدره م گاه بوینومی بورارام

کوله سروان سنه بیراوخ ویرارام / اندیر کجاوه نی یاری گورمیشم

دالیسی وار

آما عاباس قره قورخو گلمك دن بهره آپارماییب. بیلیبکی مایاسیز خمیر فطیر اولی اونا گؤره الین جیبینه اوز ادیب بیر آز قره دن ساریدان آغدان سروانين اووجونا باسيب.

سروان پولاتوولانیب دوه نی خیخلاییب عاباس اوزون گول گزه یئتیریب.

ائله بیل کی یاز مالینا دوزداغیتمیسان بالاماخ سورتو خلاماخ توپمك سسی چولوبورویوب آما اولارکی یار یارینایتیشسین زامانه نین گویلی بیلانماسین؟

شاه آداملاری شیکاردان قییدیب. عاباسی اورادا گوروبلر گول گز ایز ايتيرمك اوچون بیرداش گؤتوروب عاباسا طرف آتیب.

بوداش یا دوغوردان اولا یا یالاندان عاباسی اینجی دیب آخی قدیمنن دئیبلر دوس داشی یامان اولی عاباسین اورگینه درد او توروب بئله دئيب:

بار الاها قسمت ائله / یاخچی یولداشینان منی

بیر یار کی جان جگر اولسا / او سووسون باشینان منی

آغلاریسان گولدورو سن / گوزوم یاشین سیلدیریسن

به وفاسان ئولدوروسن/ او گؤزو قاشینان منی

آغللا يوبن گولر اولسام / گوزوم یاشین سیلر اولسام

من کی یاردان دونر اولسام / یاندیر بو ساواشینان منی

عابا سام آرتیبدی آهیم / بیلمیرم ندور گوناهیم

دیوان ائیله گوزل شاهیم / یار آتان داشینان منی

شاه آداملاری عاباسی گینه دویوبلر اونی کرواندان آرالایيبلار و یولا دوشوبلر عاباس، یورقون آرقین گنه کروانین دالی سیجا دوشور گئدیل لر گئدیرلر تا بوگشا قویوسونون باشینا یئتیشیللر .

کروان قویونون دؤوره سینده اوتوراق ائله ییر. چوول سوما عاباسی یاخینا چاغیریر و اونا دئیر آی عاباس اگر قویونون تکینه گئدیب بیزه سو یتیره سن گول گز سنوندی.

منیم سوزوم یوخ عاشیق افلاطوندا اولسا محبته توولانی عاشیق اوره یی صاف اولی عاباس چوول سومانین سؤزینه اینانیب ایپ بئلينه باغلاييب قويونون تکینه انیب و دولچا دولچاسو یوخاری یوللاييب.

اونداکی هامی سودان دویوب عاباسی یوخاری چکیللر آما عاباس قویونون آغزینا یتیشمه میش چوول سوما بیر گوژلی شمشیر ایله ویریر ایپ قیریلیر و عاباس کله مینار قویونون تکینه دوشور.

چوول سوما اونادا راضی اولمور شاه آداملاری اونون دئدیگینه گؤره بير بؤيوك داش قویونون آغزينا قويوللار و یوللارین چکیللر و گئدیللر.

عاباس قويونون تکینده آغاسی علینی چاغیریب و بئله دئیب:

موشکلده قالمیشام چاغوررام سنی / یئتیش بیر دادیمه ای آغا هرای

پروانه تك يا ندیم شمعین اودونا / پيلته تك قوورولدوم اویاغا هرای

ایپگی توخوللار اله یاپیشی / پریشان زوفلرون اله یا پیشی

مردین قایداسی دور اله یا پیشی / نامرده یا پیشار آی اغا هرای

کا به دن گلیردون دموشگولونه / بولبول عرض حالین دئمیش گولونه

بچارا عاباسین بو موشگولونه / ئوزون داده یئتیش ای آغا هرای

اوندان صونرا عاباس سؤزلرین گول گزه ساری بئله دئیب:

آه زار ائله مه غم چکمه کونلوم / ئوزومی یئتیررم یاره بو گنجه

سینه می سورته رم پارسینه سینه / چکه لر دیلیمنن داره بو گئجه

عاباس شعرلرينين دالیسین دئمك ديدی کی بیردن گوردی قویونون آغزینداکی داش کنار گئتدی و ایشیقلیق قویونی بورودو.

عاباس بیلدی کی بو ایش آغاسی امیرالمؤمنین ایشی دور عاباس سوينجك اولوب دئيب:

آغالار آغاسي صل علی محمد / ارنلر سروری گلدی ها گلدی

دولدولون صاحابی قنبر آغاسی / جانسیزا جان وئرن گلدی ها گلدی

قورانی اوخورام آیه اوزوندن / توکولورسوز پیمبرین سوزیندن

به نامازلار دوشوب حقین گوزوندن / حق عاشیغین گؤرن گلدی ها گلدی

عاباس دی یه ر چاغورورام یا ساقی / بیزه قسمت ائله بهشتی باقی

آلاهین رسولی مینمیش بوراقی / جانسیز اجان وئرن گلدی ها گلدی

بوحالدا بیر نفر نورانی، آدام قویونون باشیندا حاضر اولوب و عاباسی سسله ییب و دئیب «عاباس الووى اوزات الیمی توت» عاباس الین اوزادیر مولى علينين الى اونا یتیشیر و عاباسی قویودان چیخار دیر صونرا بویورور: عباس منی تانی یی سان؟

عاباس دئیر کور اولسون او گؤز کی سنی تانی می یا قولاغ آس گور تانی ییرام یا خیر و دئیر:

مظهر العجايب طيب الاطياب / بهشته مالك سن ساقی کوثر

ناطق قرآن سان علمون بیانی / سنون الونده دی حساب و دفتر

سنون وارلو غوندا یئر توتدی قرار / سنون حوکمونده دور کلا هر نه وار

سنه بخش ائله دی بیر پروردیگار / فاطمه، ذوالفقار، دلدل و قنبر

یوز ایگیر می دورت مین نبیدن اولا / حق دئيوب شأنيوه لولاك لولا

بیر آدون قل کفی بیر آدون طاها / بیر آدون یاسین دی بیر آدون حیدر

یداله الیلن خیبری آلدون / ئوزووی قول ائتدون بربره ساتدون

طفل ایکن آغ دؤوون بندینی چاتدون / وصی مصطفی قاضی محشر

عاباس، سؤزلریوی بیر بیلیر آللاه / گنبد خضراده ذكر الا الله

بیت المقدس ده والله بالله / یوخدورسنون کیمی ذات پرهنر

علی (ع) بویورور: «عباس صلواة چه ویر و آتیمین ریکابیندن توت» عاباس گوزلرین یوموب بیر صلوات چه ویریب و علینین ریکابیندن توتدی بیر گوزوم آچیم ساحات اصفهان دروازه سینه یئتیشدی.

علی (ع) بویوروب «ای عباس یئددی گونه جن فلان عابیده قوناقسان اوندان صونرا هارا ایسته دون گئد».

عاباس عابدین صوراغین توتورو اونی تاپیر و اونا قوناق اولور. عابد ئوز عبادتينه مشغولیدی و عاباس کروانین ايصفهانه یئتیشمه ینیه فکر ائله ییردی.

بیر ساحات گول گز فیکری باشیندان چیخمیردی.

بیرگون عاباس دردلی غوصه لی اوتور میشدی عابید اونون حالین بیلیب و اونی چول چیمنده گزمه یه دعوت الله ییب.

عاباس چول چیمن تاماشاسیندان گول گزین گؤزل لیگی یادینا دوشوب و بئله دئيب:

چرخ آلتیندا سنتك كؤزل تاپيلماز / مصری استانبولی شامی گور میشم

هارداکی بیر آدی بللی گوزل وار / گز میشم نم به نم هامی گورمیشم

خیلی وجاهتده سومیشم سنی / دیشون اینجی دودا قلارون یمنی

جنت جمالوندن آییرما منی / سندن آیریلالی دامی گور میشم

آینا اولوبسان جمالون گورسنه / دسته توتوب سیا زوفلر هؤرسنه

گؤزللیکده کیمسه تای یوخدور سنه / من بهرام گلندامی گؤرمیشم

عاباس بیر غوباردی سن سن آفتاب / شاه جمالون گؤرن ائتمز احتجاب

زاهد سنون اولسون مسجد و محراب / من ئوزوم ئوز مصلامی گؤرمیشم

عابد عاباسی مزه داغینا دعوت ائله ییر تا بو سئودا باشیندان چیخا. آما عاباس اونداکی مزه داغینا یئتیشیر دردی آرتیر و دئیر:

باهار فصلی آچار گولون / عجب ییلاق مزه داغی

سوسن و سونبول و گولی/ بئنوشه سی تزه داغی

گئدین دئیون او خانیما / قاداسی دوشون جانیما

یا دورسون گلسین یانیما / یا گتیرسین گوزه داغی

 مزه داغی چیچک اولی/ یاغیش یاغار گؤیچک اولی

آغ اوزده تئل بیرچک اولی / تؤکولدی اوزه داغی

بیر گول بیر گولون الینده / سوسن سونبولون الینده

عاباس قره قول الینده / یانا یانا گزه داغی

عاباس داغدان شهره قیدیرکن ائشیدیرکی کروان شهره وارد اولور. اوزون اصفهان دروازه سینه یئتیریر.

ساری خوجانین گؤزی عاباسا ساتاشیر. قافله بؤیوک میداندا وارد اولور. و اوچ سردار ساری خوجا، قول عبدالله و چوول سوما گول گزی چکیلی اوزاقدا دورون دی یه یه شاهین قصری نه وارد ائله ییللر.

آما چوول سوما و قول عبدالله عاباسین باره سینده هیچ بیرسوز شاه عاباسا دئمیرلر.

ساری خوجا دئیر: «قوربان بوقیزی کی سنون حؤکموونن برآیا گتیردوک عاباس آدلی بیرجوانین شرعی آروادی دی.

او جوان قیزین دالیجا اصفهانا گلیب و من اونی اصفهان دروازاسیندا گؤردوم».

شاه ئوزوزونه دئیر: «او جوانی بوراگتیرمک گرک و اونی راضی سالماغ».

سونرا نئچه نفر اونون دالیجا یوللاییب تا اونی شاه قصری نه گتیرسینلر.