اوو چویام کمانیم وار
الله دان آمانیم وار
گزیرم اوو دالینجا
وورماغا گومانیم وار
بوداغلار کومورده ندیر
گئچن گون عومورده ندیر
گوزلده ن وفا اومما
اوره گی دمیردندیر
بو باغدا بار شیریندر
هئیوادان نار شیریندر
ساغ اولسون قوهوم قارداش
هامیدان یار شیریندیر
قاپیلاری رزه لیدیر
سؤزلری مزه لیدیر
بیر دانا یار سئومیشم
دونیالار گوزه لیدیر
داغلار باشی دوماندیر
ائلین حالی یاماندیر
دوران گئنه دگیشیب
بلکه آخیر زماندیر
بوردان اوزاق گنجه دیر
زولفون پنجه – پنجه دیر
اولوم الله ایشی دیر
آیریلیق شکنجه دیر
ناز بالیش باش آتدادیر
قارا گوز قاش آتدادیر
ایستدیم دوروب گلم
قوللاریم داش آتدادیر
پاییزین ازلی دیر
باغچانین خزلی دیر
قوربان اولوم آدینا
آدلارین گوزلی دیر
ساوالاندا داغيم وار
ایچینده بولاغیم وار
آنا من جان وئريرم
اوره گیمده داغیم وار
بوداغلار آزا داغلار
قول اولان آزاد آغلار
سنین ده منیم کییمن
مارالین آزا داغلار
گویده اولدوز ماه گئده
گاه اگلنر گاه گئدر
قوربان اولوم او يارا
قاباقينجا شاه گئدر
آغلایارلار ، گولرلر
گوز یاشینی سیلرلر
گئچن گونون قدرینی
گلن گونده بولرلر
اليمده قفسیم وار
ساخلارام هوسیم وار
ائله سنی دئیه رم
نه قده ر نفسیم وار
حقلی اوزون بولدوره ر
دئیه ر سوزون بولدوره ر
منی آغلادان فلک
بیر گون آخیر گولدوره ر
من عاشیق آغلامازلار
یارانی داغلامازلار
غريب يئرده اوله نین
گوزلرین باغلامازلار
بو داغدا توراج بانلار
کیم اونون دیلین آنلار
ياریمدان آییر دیلار
قویمایین مسلمانلار
یول اوستونده وار خیار
یاپراغی دینار – دينار
چنین ایشه توشموشم
قورتارسین پروردگار
داغ باشیندا دومان وار
یار گلمه یه گومان وار
گوسترمه آی جمالین
حسرت چکن، اومان وار
بوردان اوزاخ کوجووار
زولفون ایکی اوجووار
ایکی گویول بیر اولسا
کیمین اونا گوجو وار
بو دره نین دوزو وار
دوز لرینده قوزو وار
ایکی گویول بیر اولسا
کیمین اونا سؤزو وار
ائولری کوندلن یار
منه گول گوندره ن یار
گولون پاییزا دؤنسون
مندن اوز دوندره ن یار
بو نه ایشدیر نادان یار
قاش گوزون اوینادان یار
صبريم يوخ دوز و موم يوخ
منه گلسین قادان یار
کتان كوينك بدن يار
منی قویوب گئده ن یار
اول بئله دگیر دین
سنی بیر اور گده ن وار
سو چیخار باشدان گلر
دولانار داشدان گلر
یار – پارینی ایسته سه
دورار او باشدان گلر
قایناق : اصیل بایاتیلار کتابی ، یازان : مجید عبدا… زاده ، چاپ هاتف ، تبریز ، 1376 ، ص 32
مطالب مرتبط
دده قورقود و اسلام دینی
بودا سنین بورجون
گئده ک گزه ک باغچادا