تاپماجالار
۱. آپارارام گئتیره‌رم توکر یاشی ،اونو ساتار عطار باشی ، اونو آلار میرزا کاشی.
۲. آتامين یئتدی اوغلو وار ، یئتدی سی ده بیر بوی دا.
۳. آتدیم آتانا – دئیدی کوتانا ، سودا بالیغا – دوزده جئیرانا.
۴. آتیلیب دوشه‌ر – قیرمیزی پیشه‌ر.
۵. آدام دئییل هئی قاچیر ، آینا دئییل نور ساچیر.
۶. آدامی یئیه ر ساغ اول دئیه‌ر.
۷. آرپا یئمز – سامان یئمز ، زر بویانا زر اویانا.
۸. آرپا یئیه ر – گول له وئره ر.
۹. آراسیندا اود – دوره‌سینده سو ، نه اودو سونر نه سویو دونر.
۱۰. آجی یارپاق اوددا یانار ، گوزونو یانديريب باخار ، بیر اوجوندان دومان قالخار ، بیر اوجوندان آتش یاخار.
۱۱. آخان چایین آخانی ، دولانديرير جهاني ، بیر یانیندا خیش ائیله‌ر ، بیر یانیندا کوتانی.
۱۲. آخشام سایدیم چوخ ایدی ، سحر باخدیم یوخ ایدی.
۱۳. آخشام دوغولار ، سحر یئر اویار ، آخشام ییغيلار ، سحر داغيلار.
۱۴. آچاندا قاچار – باغلاسان یاتار.
۱۵. آکیشی کیشی – دمیردن دیشی ، یئیه ر حاصیلی – قالار کوله‌شی.
۱۶. آغ آپباغام شکر کیمی ، آمما شور داد وئره‌رم.
۱۷. آغ دی – شوردی – شیرین دی.
۱۸. آغا چالاندا – قارا آغلار.
۱۹. آغ پولو وئردیم – قارا سو آلدیم ، مضرابی ووروب – مندیلی چالدیم.
۲۰. آغا نظر آی آغا نظر ، آدی داغلاری بزه ر ، باشيندا جوت آغاج گزه ر.
۲۱. آغزینا باخ آغزینا ، تیکیلیب کاغاذینان ، هر کیم اونو تاپماسا ، ده‌لیی اونون آغزینا.
۲۲. آغزی وار دیلی اولماز ، یوز قمیش وور چیغیرماز.
۲۳. آغاج باشيندا قارغا ، آغزی دولو فاورقا.
۲۴. آغاج باشيندا آغجا یوماق.
۲۵. آغاج باشيندا بوقجا ، نه بوقجادير نه تاقجا.
۲۶. آغاجدیر کوتویو یوخ ، باغيرساقدیر قارنی یوخ ، اوخویور آمما آغزی یوخ.
۲۷. آغاجدا وار باغیرساق ، یئتدی بابانی چاغیرساق ، آغزین آچیب اوخویار.
۲۸. آغاجلاردان سئچیلیر ، آیدا بیر دون بیچیلیر ، بیرجه ال سپیلنده ، یئتدی جه ایل بیچیلیر.
۲۹. آغاجدان آلتی – دمیردن قاتی ،انسان الینده – واردی قدرتی.
۳۰. آغاجینا چیخماق اولماز ، سیلکه له‌سن ییغماق اولماز.
۳۱. آغجا تپه – اوستو کوپه ، نه کوپه‌دیر نه ده تپه.
۳۲. آغ گونبزدی قاپوسو یوخ.
۳۳. آغ بیر دامدیر – دیبیرلانیر.
۳۴. آغ مرمر اوسته قیرمیزی بولبول.
۳۵. آغ قارایا توققوشور ، سالام دئییر باریشیر.
۳۶. آغدی پندیر دئییل ، قویروغو وار سیچان دئییل.
۳۷. آغ اوطاق – چیل چیل اوطاق ، قیرخ پیلله سی – اللی اوطاق.
۳۸. آغ اوتون آلاسينا ، گون دوشوب قالاسینا ، ائیله ده قوش اولار کی ، دن وئرمه‌سین بالاسینا؟
۳۹. آغ مزاردا یاتان قاری.
۴۰. آغ مایا هاردان گلیرسن؟ قانلار ولایتیندن ، هانی بس قانین؟ یوخدی تانری قدرتیندن.
۴۱. آغ ایله قارا باریشیر ، بیر بیرینه ساریشیر ، دوست گورنده سئوینیر ، دوشمان گورور آلیشیر.
۴۲. آغ آتیم – آپباز آتیم ، ساری قایادان قوپماز آتیم.
۴۳. آغ نه‌نه‌دن ساری اوغلان.
۴۴. آغ اوغلانی چالدیم یئره!
۴۵. آغ یئرده قارا توخوم ، الیم ایله اکیرم ، دیلیم ایله بیچیرم.
۴۶. آغ اوطاقدیر نه قاپوسو نه پنجره‌سی.
۴۷. آغ ایتیمی ناللادیم ، هیندوستانا یوللادیم.
۴۸. آغیر آغیر حاللانیر ، گویدن یئره ساللانیر.
۴۹. آلاندا بیر دانا ایدی ، ائوده باخدیم مین دانا.
۵۰. آلاندا قارا قیزایدی ، ائوده یئللدم قیزاردی.
۵۱. آلاجادیر آلاجا ، اوشدو قوندو آغاجا.
۵۲. آلا قاپی – زنجیردن ساپی ، بئش بوداغ وار بئش یارپاغی.
۵۳. آلا اللاندی – باشی چوللاندی ، قاشیقی میندی قئچی ساللاندی.
۵۴. آلا باغدان انیر هئل ، آیاغیندا ایپه‌ک تئل.
۵۵. آلاجا هئی آلاجا ، چیخیب قوندو آغاجا ، آغاجدا بیر ائو تیکیب ، نه قاپوسی وار نه باجا.
۵۶. آلتدان عباسی وار بونون ، اوستدن عباسی وار بونون ، خنجر ایله دلیک دلیک ، گورنه هواسی وار بونون.
۵۷. آغ اینچیلر آغاج اوسته دوزولور ، ال ووراسان قیزیل قانی سوزولور.
۵۸. آل قوماشا – دورر گوهر تیکیلمیش.
۵۹. آلتی یاشیل اوستو یاشیل لالالار ، گون دیدیکجه شیرینله شیر لالالار ، عاقللیلار عاقیل ائدیب تاپارلار ، آقیلسيزلار اوز یئرینده یاتارلار.
۶۰. آلتی شوشه – اوستو شوشه ، اورتاسیندا کباب پیشه.
۶۱. آلتی ده ری – اوستو ده ری ، ایچینده بیر اووج داری.
۶۲. آلتی داشدی داش دئییل ؛ اوستو داشدی داش دئییل ، حیوان کیمی اوتلاییر ، حیوانا یولداش دئییل.
۶۳. آلتی قویون – اوستو گنچی ، باشی شابالوت – قویروغو قایچی.
۶۴. آلتی بولاق ایچمه‌لی ، اوستو چیمن بیچمه‌لی.
۶۵. آنامین چارقادی وار قاتلانا بیلمز.
۶۶. آنامین چارقادی وار قاتلاماق اولماز ، ایچی دولو اشرفی هیچ سانماق اولماز.
۶۷. آهانی آی آهانی ، گزه ر جومله جهانی ، گتیرر اولدورمه یه ، نه ات یارار نه قانی.
۶۸. آهانی آی آهانی ، گزه ر جومله جهانی ، دره‌لرده اولدوردوم ، نه اتی وار نه قانی.
۶۹. آیاقسیز گلیر دونیایا ، آیاقلی گئدیر دونیادان.
۷۰. آیاقلار الدن اوزون ، گلیر سویون بالاسی.
۷۱. آیاغی بئلدن اوجا ، هوپیانیر اوجا اوجا ، زیان وئریر اکینه ، دئیین گؤرک آدی نه؟
۷۲. آیاغی یوخدور – قاچار ، قانادی یوخدور – اوچار.
۷۳. آیاقسیز آتیم – قویمویور یاتیم ، گئدنده هایله گئدیر ، اولماییر اونا چاتیم.
۷۴. آی گئدر آی ایل گئدر ، گئجه گوندوز پول گئدر ، نه دیلی وار نه آغزی ، نریلدر اصلان گئدر.
۷۵. آی گئده‌ر آدام ایله ، بیر خونچا بادام ایله ، نه دیلی وار نه آغزی ، دانیشیر آدام ایله.
۷۶. آی قوش هاردان گلیرسن؟ ، قانلی قایا دیبیندن ، قانین ندن قورویوب؟ تانری بئله بویوروب.
جاوابلار
۱. مرکب
۲. هفته‌نین گونلری
۳. ایلدیریم
۴. قاورقا – بوغدانی قیزیب یئیردیلر
۵. سو
۶. مزار – قبیر
۷. آفتامبیل – ماشین
۸. گئچی
۹. سماور
۱۰. سیغار
۱۱. دگیرمان – سو دگیرمانی
۱۲. اولدوزلار
۱۳. تویوق جوجه‌سی
۱۴. سو دگیرمانی
۱۵. اوراق – بوغدانی بیچن اوراق
۱۶. دوز
۱۷. قند و دوز
۱۸. قلم و کاغیذ
۱۹. مرکب
۲۰. قوچ
۲۱. تولوق – حیوان دریسیندن تیکیله‌ن سود قابی
۲۲. بالیق
۲۳. خاش خاش مئیوه‌سی
۲۴. آلا قارغا
۲۵. قوش یوواسی – چورچوپدن تیکیله‌ن یووا
۲۶. کمانچا
۲۷. تار و کمانچا
۲۸. اوجالیق
۲۹. کمان – اوخ کمانی
۳۰. ارجی – مرجیمک
۳۱. پلو
۳۲. یومورتا
۳۳. یومورتا
۳۴. دیش و دیل
۳۵. کاغیذ و قلم
۳۶. آغ تورپاق
۳۷. یارپاق کلم
۳۸. چکیرگه – ملخ
۳۹. تویوق پلو
۴۰. آنا سودو
۴۱. مکتوب
۴۲. ساققیز – ساققیزین مئیوه‌سی
۴۳. سودن توتولان ساری یاغ
۴۴. بورونون سویو
۴۵. بازی
۴۶. یومورتا
۴۷. مکتوب
۴۸. باغیش
۴۹. نار مئیوه‌سی
۵۰. کؤمور
۵۱. گؤت آتان بولبول
۵۲. ال – بارماق – دیرناق
۵۳. رشته – ماکارون
۵۴. هورومچک – تور آتان
۵۵. ایپک قوردو
۵۶. بادام مئیوه‌سی
۵۷. قیرمیزی توت – خار توت
۵۸. گؤی و اولدوزلار
۵۹. اوزوم مئیوه‌سی
۶۰. لامپا چراغی
۶۱. انجیر مئیوه‌سی
۶۲. توسباغا
۶۳. قاراقوش
۶۴. سوت وئره‌ن قویون
۶۵. گؤی – سما
۶۶. گؤی و اولدوزلار – اشرفی: کئچمیشده پول آدی
۶۷. یوخو – یوخلاماق
۶۸. یئل – کولک
۶۹. قورباغا
۷۰. قورباغا
۷۱. چکیرگه
۷۲. خبرچی – بویماده رن گولونون توخوملاری
۷۳. ایلان
۷۴. آخار چای، آخار سو
۷۵. کیتاب – یازی
۷۶. قویونون قویروغو
منبع: کتاب تاپماجا (تاپماجالار – بیلمه جه لر) ، ص 40، تالیف : زهره وفائی. نشر دیجیتال: ائل اوبا.
مطالب مرتبط
آذربایجان ادبیات تاریخینه بیر باخیش (5)
توفارقانلی عاشیق عاباسین ایکینجی پاراسی
وارلیغیم