بابا حجاز ملکنون غزالیام من
خراب لرده نی کیمی نوالیام من ، عزالیام من
او بؤلبؤلم کناره دؤشموشم گؤلومنن
اؤزولدوی چوخ جفایله الیم ائلیمنن
اؤلونجه دؤشمز اکبرین آدی دیلیمنن
طریق عشقی آزمارام وفالیام من ، عزالیام من
بابا حجاز ملکنون غزالیام من
خراب لرده نی کیمی نوالیام من ، عزالیام من
اولوب بابا رقیه وه مکان خرابه
گل ایندی قوللاریندا ائت نظر طنابه
بدنده غمچی یئرلری دؤشور عذابه
یاتانمارام صاباحادک یارالیام ، عزالیام من
بابا حجاز ملکنون غزالیام من
خراب لرده نی کیمی نوالیام من ، عزالیام من
اسیری دوشمان اولموشام کسیلدی چارم
گئدوب جلالی عزتیم غمه دوچارم
نه باشدا معجریم قالیب نه گوشوارم
الیمی توتموشام یؤزه حیالیام من ، عزالیام من
بابا حجاز ملکنون غزالیام من
خراب لرده نی کیمی نوالیام من ، عزالیام من
زمانه گور نه خوار ائدیب منی علیلی
جمالیمه جفا ایله وراللار سیلی
یوزومده نوعی گور بابا اولوبدو نیلی
دئمیر بو شمری اکبرین مارالیام من ، عزالیام من
بابا حجاز ملکنون غزالیام من
خراب لرده نی کیمی نوالیام من ، عزالیام من
غمونده گل کیمی سولوب سارالدیم
گورنده قانلی نعشیوی نه حاله قالدیم
خدایه شکری باشیوی قوجاقه آلدیم
بو ماه جمالین حسرتی وصالیام من ، عزالیام من
بابا حجاز ملکنون غزالیام من
خراب لرده نی کیمی نوالیام من ، عزالیام من
جدادی آی کیمی باشون سالاردی هاله
گوزوم دوشردی ناقه دن بو گول جماله
یوزومه باخمادون بو یولدا لا محاله
دئمزدون عاجزم باشی بلالیام من ، عزالیام من
بابا حجاز ملکنون غزالیام من
خراب لرده نی کیمی نوالیام من ، عزالیام من
منه دیوللر آز بئله جهانی داغلا
بو سیل اشکی آز بو گول عزاره باغلا
گئدخ بیز ایله گز دولان دخی آز آغلا
دئموللر قارداشیم اولوب عزالیام من ، عزالیام من
بابا حجاز ملکنون غزالیام من
خراب لرده نی کیمی نوالیام من ، عزالیام من
بو شامین اهلی قلبیمی کباب ائدوللر
منیم لباسیمه باخیب گولوب گئدیللر
آتیللار گاهی داش منه چوخ اینجیدیللر
گوروللر یوخدو بیر کسیم بلالیام من ، عزالیام من
بابا حجاز ملکنون غزالیام من
خراب لرده نی کیمی نوالیام من ، عزالیام من
قانادی باغلی بیر قوشام چمنسیز اؤللم
قالوب بو غربت اؤلکه ده وطنسیز اؤللم
خرابه لرده آج سوسوز کفنسیز اؤللم
مزاریمه باخان بیلر هارالیام من ، عزالیام من
بابا حجاز ملکنون غزالیام من
خراب لرده نی کیمی نوالیام من ، عزالیام من
فلک منی یتیم ائدوب بو اوچ یاشیمدا
گلیر ظهوره خون دیل بو گوز یاشیمدا
گوروللر شامی قیزلاری قرا باشیمدا
دیوللر بس کیمین اؤلوب ؟ قارالیام من ، عزالیام من
بابا حجاز ملکنون غزالیام من
خراب لرده نی کیمی نوالیام من ، عزالیام من
رقیه جان کریمی یه کرامت ایله
وئرنده جان گلوب اونو عیادت ایله
گناهی چوخدو حشر ائده شفاعت ایله
اگر چه نوکرم ولی خطالیام من ، عزالیام من
بابا حجاز ملکنون غزالیام من
خراب لرده نی کیمی نوالیام من ، عزالیام من
شعر از حاج کریمی مراغه ای
More Stories
محرم گلدی – سید صادق موسوی ترکمانی
جایگاه عقل و شهوت در ملائکه ، انسان و حیوانات
تواشیح ؛ غیر از علی (ع) که خوانده محمد (ص) برادرش