تنعیم دوشرگه سینده

امام حسین علیه السلام مکه ده ن چیخیب تنعیم آدلی بیر منطقه یه یئتیشدی (بو منطقه مکه نین ایکی آغاجلیغیندادیر) اورادا بیر قافله گؤردو.

او قافله یئمن والیسی بحیر بن ریسان طرفیندن معاویه اوغلو یزیده هدیه آپاریردی. قافله نین یوکو ورس آغاجی و بزه ک لوازماتی ایدی. امام حسین علیه السلام اونلارین آپاردیغینی آلیب و دوه صاحبلرینه دئدی:

زور دئییل کیم ایسته ییرسه بیزیمله عراق گئده کرایه سینی وئریب یولداشلیق انده ریک ایسته مه ین بورا یا قدر گلدیگی یولون کرایه سینی آلیب گئده بیلر.

اونلاردان بیر تعدادی کرایه سینی آلیب آیریلدی. بعضیلری ایسه حضرتین قوللوغوندا عراقا گئتدیلر.

 

صفاح دوشرگه سی

عبد الله بن سلیم و مذری بن مشمعل دئییرلر: یولوموزو داوام ائتدیریب صفاح منطقه سینه چاتدیقدا شاعر غالب اوغلو فرزدقی گؤرودک. او امامین قارشیسیندا دوروب دئدی:

آللاه ایستدیگینی وئرسین و سئودیگین آرزونا چاتدیرسین سنی. حضرت فرزدقدن: آرخاسیندا کی جماعتدن دانیشماغینی ایستدی. فرزدق دئدی:

بو سؤزو بیلن آدامدان سوردون. اهالینین اوره گی سنینله قیلینجی ایسه بنی امیه ایلن دیر. یازی (طالع) گؤیدن ائنر.

آللاه اؤز ایستدیگینی ائدر. امام دئدی: دوز دئدین امر آللاهیندیر. او اؤز ایستدیگنی ائدر. تانریمیزین دا هر گون بیر ایستگی واردیر گؤیدن یئره ائنن مقدرات سئودیگیمیزه اویغون اولارسا اونا شکر انده ریک.

او دا شکر ائتمکده بیزه یول گؤسترر. یوخسا مقدرات طلبیمیزه مانع اولارسا نیتی حاقق اولوب اورگی تقوا ایله دولموش آدام حاقدان چیخماییب و چیخمایاجاقدیر.

سونرا امام حسین فرزدقله وداعلاشیب سفرینه داوام ائتدیردی ، امام حسین علیه السلامین مکه ده ن چیخیب کوفه یه دوغرو گلمه گینین خبری زیاد اوغلونا چاتدیقدا اؤز قاراووللارینین باشچیسی حصین بن تمیمی بیر اوردو ایله گوندردی.

اونلار گلیب قادسیه ده امام حسین علیه السلامین پوسقوسوندا دایاندیلار، حصین آتلیلاری قادسیه خفان ، قطقطانه و لعلع قصبه لرینین آراسیندا سیرایا دوزدو.

 

حاجر دوشرگه سی

دیگر طرفدن امام حسین علیه السلام گلیب حاجر منطقه سینه یئتیشدی. بو مضموندا بیر مکتوب یازیب قیس بن مسهردن کوفه اهلینه گؤندردی.

رحمان و رحیم اولان آللاهین آدی ایله

على اوغلو حسیندن مؤمن و مسلمان قارداشلارینا

سلام علیکم شکر اولسون آللاها کی ، اوندان باشقا بیر آللاه یوخدور.

سونرا سیزین گؤزل نیتلی و اخلاقلى اولدوغونوزا دایر عقیل اوغلونون مکتوبو گلیب یئتیشدی. مکتوبدا اهالینین توپلانیب حاققیمیزی آلماق اوچون بیزه کؤمک ائده جکلری گؤرسنیر.

آللاهدان ایشیمیزین آواند اولماغی نی و سیزه چوخ ثواب وئرمگینی دیله ییرم. چرشنبه آخشامی ترویه گونو ۸۔ ذیحجه ده اؤز ائلچیمی گوندردیم. او سیزه – یئتیشدیکده ایشینیزی برک توتون.

انشاء الله بو گونلر من سیزه چاتارام. والسلام علیکم و رحمه الله و برکاته .

بئله لیکله قیس بن مسهر کوفه یه طرف یوللاندى. قادسیه شهرینه چاتدیقدا حصین اونو یاخالایبب کوفه یه زیاد اوغلونا گوندردی.

قیسی زیاد اوغلونون یانینا آپاردیلار. او ملعون دئدی: سارایین دامینا چیخیب او یالانچی اوغلو یالانچیا یامان دئگیلن (مقصدی امام حسین علیه السلام ایدی) او سارایین دامینا چیخیب اوجا سسله دئدی:

ای جماعت آللاه خلق ائتدیکلرینین ان یاخشیسی پیغمبر قیزی فاطمه نین اوغلو حسین بن علی حاجر منطقه سینده دیر. من اونون ائلچیسی قاباقجا گلدیم اودا گلیر .

چیخین اونا بویون اگیب یاردیمینا جاواب وئرین. او سونرا زیاد اوغلونا و اونون آقاسینا لعنت ائدیب و علی بن ابیطالبه صلوات گتیریب رحمت گوندردی.

زیاد اوغلونون امری ایله اونو دامدان یئره آتدیلار. بدنی او وخالارنیب آللاهین رحمتینه گئتدی.

 

عرب سولاریندان بیری

دیگر طرفدن امام حسین علیه السلام حرکت ائدیب عرب سولاریندان بیرینه یئتیشدی. مطیع اوغلو عبدالله اورادا ائنمیشدی.

امامی گؤردوکده اونو قارشیلاییب دئدی: آتام آنام سنه قوربان هانسی سبب سنی بورایا گتیرمیشدیر؟

امام بویوردو: عراق اهلی منه مکتوب یازیب دعوت ائتمیشلر.

عبدالله دئدی: سنه آللاهی و اسلام حؤرمتینی خاطیرلادیرام ای پیغمبر بالاسی. آللاها آند اولسون اگر بنی امیه الینده کین ایسته سن سن اولدوررلر.

سنی اولدوررلرسه بیر کیمسه دن قورخمازلار. بئله لیکله آللاهین ، اسلامین ، قریشین و عربلرین حؤرمتی آرادان گنده ر. بوشلا بو ایشی و کوفه یه گئدیب بنی امیه یه دولاشما.

امام حسین علیه السلام بو سؤزلره باخماییب یولونا داوام ائتدیردی نهایت گلیب خزیمیه دوشرگه سینه یئتیشدی.

 

قین اوغلو زهیر امام حسینه (ع) قوشولور

فزاره طایفاسیندان بیری دئییر: زهیر ایله بیرلیکده مکه ده ن چیخدیق. بیز امام حسین علیه السلام یول گندیردیک. امام حرکت ائننده زهیر دالی قالیردی. اوتراق ائدیردی. امام استراحت اوچون اوتراق ائتدیکده زهیر قاباغا کئچیردی، نهایت بیر دوشرگه یه چاتدیق کی ، اورادا اوتراق ائتمکدن باشقا یول یوخ ایدی.

بئله لیکله دوشرگه نین بیر طرفینده زهیر دیگر طرفینده ایسه امام حسین علیه السلام اوتراق ائتدی ، بیز اوتوروب خؤره ک یئییردیک.

امامین ائلچیسی یانیمیزا گلیب سلامدان سونرا دئدی: ای زهیر امام منی گوندریب سنی ایسته ییر . هر کسین الینده کی شئی یئره دوشدو سانکی باشیمیزین اوستونده بیر آلیجی قوش دورموشدو.

زهیرین آروادی دلهم دئییر کی، من اونا دئدیم: پیغمبر بالاسی دالینجا آدام گونده ریب گئتمیر سنمی؟ سبحان الله گئت قوللوغونا سؤزونو دینله سونرا قاییت.

زهیر گندیب تئز قاییتدی. اوزونده سئوینج گولوشو واردی. او اؤز اصحابینا دؤنوب دئدی: سیزلردن کیم ایسته سه منه تابع اولسون یوخسا عهدیمین سونودور. ایندی بیر حدیث دئییم سیز اوچون:

غزوه لرین بیرینده آللاهین کؤمکلیگی ایله خزر شهرین آلدیق و چوخلو غنیمت اله کئچیردیک. سلمان باهلی (بیر چوخ کتابلاردا سلمان فراسی) الده ائتدیگینیز غنیمتلره گؤره سئوینیرسیزمی؟ دئیه سوردو. ائله دیر دئدیک.

سلمان دندی محمد اؤولادینین گنجلرینی گؤرسنیز داها چوخ سئوینین. اونلارا کؤمک ائدین. اونلارین بایراغی آلتیندا دؤیوشمگی بو غنیمتدن داها یاخشی بیلین…

سونرا زهیر آرتیردی «من سیزلری آللاها تاپشیریرام» آروادینا دا، «آزادسان» دئدی. قوشول اؤز آداملارینا چونکی منه گؤره بیرینه خئیردن باشقا بیر زاد یئتیشمگه راضی دئییلم.

امام حسین علیه السلام او دوشرگه ده عبدالله بن یقطری عقیل اوغلو مسلمین یانینا گوندردی. حصین بن تمیم قوشونو اونو یاخالاییب زیاد اوغلونا گؤندردیلر.

او ملعون چیخ سارایین دامینا دئدی یالانچی اوغلو یالانچیا (مقصد امام حسین (ع) دیر) قارغیش ائت. سونرا گوروم سنله نئجه یاناشاجاغام.

او دامین اوستونه چیخیب اوجا سسله دئدی: ای جماعت من پیغمبر قیزی فاطمه اوغلونون سیزه گؤندردیگی ائلچیم. چیخین مرجانه و سمیه نین والدلزنا اوغلونون ضدینه و اماما یاردیم ائدین.

زیاد اوغلونون امری ایله او مؤمن دامدان یئره آتیلدى. بدنی اووخارلاندی ، لاکین هله جانی چیخامیشدی. عمیر اوغلو عبد الملک گلیب باشینی کسدی. بئله لیکله او آللاهین رحمتینه گئتدی.

 

امام حسین علیه السلام زرود دوشرگه سینده

عبدالله بن سلیم ومذری بن مشعل دئییر: حج مراسیمینی قورتاردیقدان سونرا حسین علیه السلاما اؤزوموزو یئتیریب اونون ایشینین نه اولاجاغینی بیلمکدن باشقا بیر شنی ایستمیردیک.

یولدا دوه لردن یئره دوشوب توونان (سرعلته) گئدیب زرود منطقه سینده اماما چاتدیق. (زرود منطقه سی ثعلبیه ایله خزیمیه آراسیندا بیر یئردیر .)

امام حسین علیه السلاما یاخینلاشدیقدا کوفه لیلردن بیرینی گؤردوک کی ، امامی گؤروب ایره لیلدی. امام حسین علیه السلام دایاندی.

بئله ظن ائتدی کی ، او شخص بونون یانینا گلیر. لاکین او آدام سووشوب گئتدی. بیز بیر – بیرمیزه دئدیک: گئدک بو آدام کوفه دن خبرلیدیرسه احوالاتی سوراق.

اونا یاخینلاشیب سالام وئردیک. او دا جاواب وئردی. کیملردنسن؟ دئیه سوردوق اسد طایفاسیندان دئدی. بیز ده او طایفادانیق دئدیک آدین نه دیر؟

او بکیر بن شعبه دنیه جاواب وئردی. بیز – بیریمیزی تانیدیق. سونرا سوردوق: کوفه لیلردن دانیش.

او دئدی: من کوفه دن چیخمامیش عقیل اوغلونو و هانینی اؤلدوردولر. کوفه بازاریندا جنازه لرینین آیاقلاریندان توتوب سورویوردولر . اونونلا وداع لاشیب امام حسین علیه السلاما دوغرو گئتدیک. و ثعلبیه دوشرگه سینده اونونلا بیرلیکده اوتراق ائتدیک.

 

امام حسین علیه السلام ثعلبیه دوشرگه سینده

امام حسین علیه السلامین قوللوغونا گلیب دیدیک:

آللاه سنه رحمت ائتسین بیزده بیر خبر واردیر. ایسته ییرسنسه گیزلی یا خود دا آچیق دانیشاق؟ او حضرت اؤز صحابه لرینه باخیب «بونلار ایله منیم آرامدا گیزلی سؤز یوخدور» دئدی .

دئدیک دونن آخشام سیزه دوغرو گلن او آدامی گؤردونمو؟ حضرت بویوردو : بلی اوندان سؤز سورماق دا ایسته ییردیم. او آدام اسد طایفاسینداندیر دئدیک عقل و فیکیر صاحیبدیر.

او بیزه دئدی: من کوفه دن چیخمامیش عقیل اوغلونو و هانی نی اؤلدوردولر. اونلارین جنازه سینی کوفه بازاریندا سورویوردولر. حضرت انا لله و انا الیه راجعون آللاهیم اونلارا رحمت ائتسین دنیه بو سؤزو نئچه دفعه تکرار ائتدی

بیز دیدیک: ای حضرت! آللاها آند وئریریک اؤزونو و آرواد اوشاغینی قورو. گئری دؤن. چونکی کوفه ده سنه بیر آدام شیعه و کؤمکچی یوخدور.

قورخوروق اوستونه قیلینج چکه لر. عقیلین اوغلانلاری آتلانیب دئدیلر: یوخ آللاها آند اولسون گیری دؤنمریک یا قارداشیمیزین حاییفینی آلاریق یاخود دا شهید اولاریق.

امام حسین بیزه باخیب ، «بونلاردان سونرا یاشاماق نه یه گرکدیر ؟» دئدی. بئله لیکه بیلدیک کی ، امام حسین علیه السلام کوفه یه گئتمک عزمینده دیر .

دیدیک: آللاه سنین قارشینا خئیر چیخارسین. او حضرت «آللاه سیزه رحمت ائتسین» دندی. سونرا حضرت ابا عبد الله او باشدانا دک گودوب سحر آچیلدیقدا گنج لره سو مشکلرینی دولدوروب حیوانلاری سو وارماغا امر ائتدی.

 

زباله دوشرگه سینده

سونرا یولا دوشوب زباله آدلی بیر منطقه یه یئتیشدیلر. اورادا امامین سود قارداشی عبد الله بن یقطرین شهید اولماق خبری یئتیشدی. او حضرت جماعتی توپلاییب بیر مکتوب چیخاریب دئدی:

رحمان و رحیم اولان آللاهین آدی ایله.

سونرا ، بیزه اورک یاندیریجی بیر خبر یئتیشیب. مسلم بن عقیل، هانی بن عروه و عبد الله بن یقطر شهید اولوب.

سؤز یوخدور کی ، شیعه لریمیز حیله ائدیب. کیم قاییتماق ایسته ییرسه قاییتسین ، بیزیم کفالتیمیزدن خارج دیر. بئله لیکله جماعت داغیلدی او حضرتین ساق – سولوندا مدینه دن گلن صحابه لریندن باشقا بیر کیمسه قالمادی.

حضرت بیلدی کی ، بونلار طمع اوزوندن بیعت ائتمیشدیلر. قارشیدا اؤلومون اولماغی معلوم اولدوقدا داغیلدیلار.

دان یئری سوکولنده حضرت امری ایله گنجلر قافله نی سیراب ائدیب مشکلری دولدوروب یولا دوشدولر.

 

 

بطن العقبه دوشرگه سینده

بو منطقه یه چاتدیقدا حضرت امر ائدیب قافله اوتراق ائتدی. مکرمه طایفاسیندان بیری اماما دئدی: سنی آند وئریرم آللاها گئری دؤن. واللاه اوخدان وقیلینجدان باشقا بیر شئی گئیمه میسن.

بو جماعت سنی دعوت ائتمیشدی. نه قدر سنه خیانت ائتمه میشدیلر و سنله دؤیوشه چیخمامیشدیلار اورا یا گئتمگین عقله سیغیان بیرایش ایدی.

لاکین ایندیجه خبرینی وئردیگین بئله بیر وضعیتده (یعنی عقیل اوغلونونون وهائینین اؤلمگی و شیعه لرین اؤز بیعتلرینی سیندیرماغی بیروضعیتده) بو ایشی گورمگینی دوز گؤرمورم.

حضرت بویوردو : ای آللاهین بنده سی: دئدیگین سؤز منه گیزلی دیئیلدیر. منیم ده فیکریم سنینکی کیمیدیر . لاکین آللاه تعالی امریندن دؤنمز.

 

شراف دوشرگه سی

بئله لیلکه حضرت حرکت ائدیب شراف منطقه سینه یئتیشدی. او باشدان چاغی حضرت گنجلری سو دولدورماغا امر ائتدی. گون اورتا اولدوقدا بیر نفر سسلندى: الله اکبر .

امام حسین علیه السلام «نه یه گؤره الله اکبر دئییرسن» دیئه سوردو، او آدام «خورما آغاجلارینی گؤردوم» دئدی. عبد الله بن سلیم و مذری بن مشعل دئدیلر : بیز بو یئرده خورما آغاجی گؤرمه میشیک.

امام حسین علیه السلام دئدی: سیزین رایینیز ندیر؟

ایکی نفر اسد طایفاسیندان دئدیلر: بیز آتلارین باشلارینی گؤروروک

الله اکبر دئیه سسله نن آدام دا دئدی: و آللاه منده اوجور گؤرورم.

 

ذوحسم داغلاریندا

حضرت بویوردو : بورادا بیر سیغیناجاق یوخدورمو؟ گلن جماعتله قارشیلاشماق اوچون اونا آرخالاناق؟

ایکی نفر اسد طایفاسیندان دئدیلر: سول طرفینده ذوحسم داغلاری واردیر. اونلاردان اؤنجه اورا چاتا بیلسن ایستدیگین کیمی اولاجاقدیر. بئله لیکله قافله نین یولونو اگیب اونلاردان تئز ذوحسم داغینا یئتیشدیک.

اونلار بیزلری گؤردوکده یولدان چیخیب بیزه دوغرو گلدیلر. قافله اوتراق ائدیب حضرتین امری ایله چادرلار قورولدو. بیر آزدان سونرا بیزه دوغرو گلنلرین آتلاری گؤرسندی. اللرینده کی بایراقلار قوش قانادینا اوخشاییردی. نهایت گلیب یئتیشدیلر، حربن یزید تمیمی نین امرى آلتیندا مین نفر آتلی واردی.

حر اؤز قوشونو ایله امام حسین علیه السلامین قارشیسیندا دایاندیلار ، حضرت ایسه اؤز صحابه لری ایله دؤیوش لباسی گئییب اللرینده قیلینج دورموشدولار.

امام گنجلره دؤنوب بویوردو : اونلارین اؤزلرینه و آتلارینا سو وئرین. گنجلر سو مشکلرینی گتیریب اونلارا سو وئردیلر. ناماز واختی چاتدیقدا امامین امری ایله مسروق اوغلو حجاج آذان دئییب جماعت نامازینین صفی دوزولدو.

امام اگنینده بیر کؤینک بیر عبا و آیاغیندا نعلین چادیریندان ائشیگه چیخدی. اونلارین قارشیسیندا دایانیب بویوردو : آللاها حمد و ثنادان سونرا، ای جماعت! من آللاهدان وسیزدن عذر ایسته ییرم. من سیزه طرف گلمزدیم لاکین مکتوبلارینیز و ائلچیلرینیز گلیب منی «امامیمیز یوخدور گل گیلن بلکه ده آللاه سنینله بیزی هدایت یولونا یؤنلندی» دئیه دعوت ائتمیشلر.

اگر سؤزونوزون اوستونده دورموشونوزسا من گلمیشم. آند ایچیب سؤز وئرین تا اورکدن امین اولوب شهرینیزده قالیم ، یوخسا سؤز وئرمیرسینیز سه و منیم بورادا قالماغیما راضی دئیلیسینیزسه من گئرى دؤنه رم. سیزده گلدیگینیز یئره قاییدین.

اونلار اماما جاواب وئرمه ییب مؤذنه ، نامازی باشلا دئدیلر.

امام حسین علیه السلام بویوردو : ای حر اؤز آداملارینلا ناماز قیلماق ایسته ییرسنمی؟ حر «یوخ» دئدی «سن ناماز قیل بیز ایسه سنه تابع اولاریق» امام جماعت نامازینی قیلیب سونرا چادیرینا گئتدی.

صحابه لری گلیب باشینا ییغیشدیلار. دیگر طرفدن حر اوز چادیرینا گئدیب نئچه نفر اؤز آداملاریندان باشینا ییغیشدیلار. قالان آداملار ایسه آتینین جیلوووندان توتوب کؤلگه سینده اوتوردو ….

ایکیندی اولدوقدا امام حسین علیه السلام حرکت ائتمک اوچون کجاوه لری حاضیرلاماق امرینی وئردی. سونرا چادیردان چیخیب موذندن اقامه دئمگی ایستدی.

نامازدان سونرا حضرت بویوردو : ای جماعت! اگر پرهیزکار اولوب حاققی اؤز صاحیبینین بیلسه نیز آللاهین رضایتینى الده ائتمیش اولارسینیز .

بیز اهل بیت سیزین ولایتنیزه هامیدان آرتیق لایقیک. ولایت ، سیزه ظلم ائدیب زورلا حؤکم سوره ن مدعی لرین دییلدیر. اگر بیزلردن خوشونوز گلمیرسه اوندا مکتوبلارینیزدا یازدیغینیز وائلچیلر گؤنده ردیگنیز فیکرینیز ده گیشیب. بئله سه سیزلرده ن ال چکیب باشقا یره گئده رم.

حربن یزید دئدی: وآللاه بیز دئدیگین بو مکتوبلارین نه اولدوغونو بیلمیریک. حضرتین امری ایله سمعان اوغلو عقبه خورجوندا کی مکتوبلاری گتیریب اونلارین قارشیسیندا یئره تؤکدو.

حربن یزید دئدی: بیزلر بو مکتوبلاری یازانلاردان دیئیلیک. آلدیغیمیز امره گؤره هارادا سنه چاتساق ال چکمه ییب سنی زیاد اوغلونون یانینا آپاراجاغیق. حضرت بویوردو : سنه اؤلوم بو ایشدن داها یاخیندیر.

امام حسین علیه السلامین امری ایله صحابه لر آتلارینا میندیلر

صحابه لر آتلانیب قادینلارین دا مینمگین گؤزله دیلر سونرا یولادوشوب گئری دؤنمک ایستدیکده حر بن یزیدین آداملاری مانع اولدولار.

امام حسین علیه السلام بویوردو: ای حر آنان سنسیز قالسین نه ائدیرسن؟

حر دئدی: آللاها آند اولسون عربلرده سندن باشقاسی اؤزوده سنین ایندیکی وضعیتینده بوسؤزو منه دئسه ایدی. آناسینی آغلار قویاردیم. لاکین آند اولسون آللاها نه ائدیم کی ، سنین آنانین آدی خئیردن باشقا چکیلملی دئییلدیر.

امام حسین علیه السلام «ائله سه نه ایسته ییرسن» ؟ دئدی. حر دئدی واللاه سنی زیاد اوغلونون یانینا آپارماق ایسته ییرم. حضرت « واللاه سنه تابع اولمارام» دئدی. حر دئدی واللاه سندن ال چکمرم.

بئله لیکله سؤز چوخالدیقدا حر دئدی: من سنینله ساواشماغا امر اولونمامیشام. سنی کوفه یه آپارماغا امر اولونموشام. سن ایسه کوفه یه گئتمک ایسته میرسنسه مدینه یه آپاریب چیخارمایان بیر یول توت گئت.

ایسته سن معاویه اوغلو یزیده یا خود زیاد اوغلونا بیر مکتوب یاز. من ده زیاد اوغلونا بیر مکتوب یازارام اولسون کی ، تانری سئین ایشیندن منی خلاص ائده. ایندی سن عذیب و قادسیه یولونو توتوب سولا دوغرو گئت گیلن.

نهایت امام حسین علیه السلام او یول ایله گئتمگه باشلادی ، یزید اوغلو حر ده اونون سول طرفینده گئدیردی. اونلار گلیب بیضه دوشرگه سینه چاتدیلار.

 

امام حسین علیه السلام بیضه دوشرگه سینده

بو دوشرگه ده امام اؤزونون و حرون صحابه لرینه خطاب بیر چیخیش ائتدی: تانریا اؤو گودن سونرا :

ای جماعت آللاهین پیغمبری بویورموشدور: (سیزین هر بیرینیز، بیر ظالم پادشاهی بیر حالدا گؤره کی ، تانرینین حلالینی حارام ائدیر، عهد و پیمانینی سیندیریر و آلاه پیغمبریئین عنعنه سیله مخالفت ائدیر. تانرینین بنده لری آراسیندا گناهلی صورتده و دوشمانلیقلا حوکم سورور ، و او پادشاهین قارشیسیندا عمل ایله و سؤز ایله دایانماسا اونو اولدورمک اولار.)

معلوم اولدوغو اوزره،  بونلار (معاویه سلاله سی) تانری اطاعتیندن دؤنوب شیطانا بویون اگیب ، فساد ایشلری یاییب ، آللاه احکامینی بوراخیب حلالی حارام ، حارامی ایسه حلال ائدیب. بونونلا دا بو وضعیتی دؤندرمگه من هامیدان داها چوخ حاقلیام.

منه بیعت ائدیب دوشمان الینده گرفتار ائتمه یه جگینیزه دائر گوندر دیگینیز مکتوبلار و ائلچیلر منه چاتمیشدیر. اگر اؤز بیعتینیزی سیندیرماییب و اونا عمل ائدیرسینیز سه عقله سیغییان بیر ایش گؤرورسونوز.

بئله سه من على اوغلو، پیغمبر قیزی فاطمه نین بالاسی حسینم جانیم جانینیزدیر، عائلم عائله نیزدیر، و سیزین امامینیزام. یوخسا بئله دئییلسه ، سیز سؤزونوزو گئری آلیب بیعتینیزی گؤتورورسونوزسه ، اوز جانیما آند ایچیرم بو ایش سیزدن اوزاق دیئیلدیر.

سیز بو اویونو آتام على قارداشیم حسن و عمیم اوغلو مسلمین ده باشینا گتیردینیز . سیزه آلدانان گئرچکده اؤزونو آلدادیب. سیز اؤز شانسینیزی الینیزدن وئرمیشسینیز.

امام سونرا بو آیه نی اوخودو: و من نکث فانما ینکث على نفسه پیمانی سیندیران بیر کیمسه ، گئرچکده اؤزوندن اؤترو سیندیرار. (یعنی عهد ین سینماغیندان ایرلی گلن زیان اؤزونه قاییدار .) تانری بیزی سیزدن آسیلی ائتمیه جکدیر.

اماملا یاناشی گئدن حر حضرته یاخینلاشیب دئدی: ای حسین من تانرینی سنه آند گتیریرم و دئییرم کی ، بئله بیر وضعیتده سن ساواشا گیرسن اؤله جکسن، اونلار سنینله ساواشسا هلاکته دوشسه جکسن.

امام، «منی اؤلوم ایله قورخودور سانمی؟» دئدی «منی اؤلدورمک سیزین الینیزدن گلرمی؟ بیلمیرم نه دیئیم لاکین اوس قارداشینین عمیسی اوغلونا دئدیگینی سنه دئییرم او پیغمبرین کؤمگینه گئدن «اوس» و گؤروب دئدی: هارا بئله؟ اؤلرسن؟ اوس جواب وئردی:

سامضى و ما بالموت عار على الفتی

دؤنمه رم یولدان اؤلوم عار دئییل گنجلره

اذا مانوی حقا و جاهد مسلما

چونکی حق نیتی قلبیمده جهاد ائیله ییرم

و آسى الرجال الصالحون بنفسه

صالح انسانلارا صالح یاناشارام

حر، امام حسین علیه السلامدان بو سؤزلری ائشیتدیکده گیری چکلیب اؤز آداملاری ایله بیرلیکده حضرتله یاناشی یوللارینی داوام ائتدیردیلر.

 

امام حسین علیه السلام عذیب الهجانات دوشرگه سینده

اونلار نهایت عذیب الهجانات منطقه سینه چاتدیلار، و گوردولر کی ، دؤرد نفر هلال اوغلو نافعین آتی یئده کلرینده کوفه طرفیندن گلیرلر. اونلار گلیب امام حسین علیه السلاما چاتدیقدا بوشعری اوخودولار

یاناقتی لا تذعوی من زجری

وشعری قبل طلوع الفجر

بخیر رکبان وخیر سفر

حتی تخلی بکریم النجر

الماجد الحر رحیب الصدر

اتی به الله لخیر امر

ثمت ابقاه بقاء الدهر

ای منیم ده وه م سنی قووماغیمدان اینجینمه. دان یئری سؤکولمزدن اول مقصده چات. یاخچی سفر اوچون یاخچی آدام مینیب سنی. عزیز، آزاد و گئنیش سینه صاحبی بیر کیمسه نی تانری خیر ایش اوچون گتیرمیشدیر. آللاه اونو دونیا وار کن ساخلاسین.

امام حسین علیه السلام بویوردو : آللاها آند اولسون منیمده ایستگیم اودور کی ، اؤلسک ده ، غلبه ده چالساق اللاه بیزه خیر اراده ائتسین. بو حالدا حر ایره لیله ییب. دئدی: بونلار کوفه لیدیرلر و سنلن گلنلردن دییللر اودور کی ، اونلارین حبسه آلینماقلاری یوخسا کوفیه قایتارماق اختیاری منده دیره.

امام بویوردو : اؤزومو (پیس ایشدن) چکیندیردیگیم قدر سنی بونلاردان چگیندیریرم. بونلار منیم کؤمکلریمدیرلر. سن ایسه زیاد اوغلونون مکتوبو گلیب چیخینجا منه دولاشمایا جاغینا سؤز وئرمیشن. و حر، «دوز دیئیرسن لاکین بونلار سنینله گلمه میشلر» دئدی.

حسین علیه السلام بویوردو: بونلار منیم اصحابیمدیرلار. و منیمله گلمیش کیمیدیرلر. اگر آرامیزدا کی عهدی قیریبسانسا منیمله دؤیوشه چیخ.

وضعیت بورا گلیب چیخدیقدا حر او دؤرت نفردن ال چکدی ، سونرا حضرت امام او دؤرت نفردن کوفه اخبارینی وئرمه لرینی ایستدی. عبداله عائذی اوغلو مجمع دئدی:

اعیانلار رشوه لری چوخالدیب مغرور گنجلرى توپلایبلار. و کوفه اهلی سنه قارشی بیرلشیب ، لاکین قالان آداملارین هله ده سنه رغبتی واردیر.

امام حسین ائلچیم سیزه چاتدی می؟ دئیه سوردو. ائلچین کیم ایدی دئدیلر ؟

امام دئدی: منیم ائلچیم قیس بن مسهر صیداوی ایدی. «بلی یئتیشدی» دیدیلر «لاکین تمیم اوغلو اونو توتوب زیاد اوغلونا گؤندردی. زیاد اوغلو ، سنه و سنین آتان علی علیه السلاما یامان دئمگه امر ائتدی. او ایسه سیزلره صلوات چئویریب تئزللیکله کوفه یه گله جگینی اهالیه دیئیب اونلاری سیزه کؤمک ائتمه یه چاغیردی.

بئله لیکله او مؤمن زیاد اوغلونون امری ایله سارای دامیندان یئره آتیلدی. امامین گؤزلریندن یاش آخا آخا بو آیه نی اوخودو:

منهم من قضى نحبه ومنهم من ینتظر وما بدلوا تبدیلا.

یعنی اونلاردان بیر تعدادی شهادته چاتیب بیر تعدادی دا شهادت انتظاریندا دیر و اصلا اراده لرینده دگیشیکلیک تورنمز.

ایلاهی بهشتی اونلارین و بیزلرین دوشرگه سی قرا روئر. و بیزلری اونلارلا بیرلیکده اؤز رحمتینین و ثوابینین یانیندا مستقر ائت گیلن.

سونرا طرماح بن عدی یاخینلاشیب دئدی: واللاه من کی ، سنینله بیر آدام گؤرمورم. اگر سنین یولونو کسن بو آداملاردان باشقاسی سنینله ساواشماسادا بونلار سنی اؤلدوره بیلرلر.

من کوفه دن چیخمازدان بیر گون اول گوردوم شهرین آرخا طرفینده چوخ بیر تعداد ییغیشیبلار. اونلاردان توپلاشمالارینین سببینی سوردوم دئدیلر : قدرت گؤسترمک اوچون توپلاشمیشیلار و ائرته سی گون حسینین ساواشینا گوندریله جکلر.

ایندی ایسه من سندن ایسته ییرم کی ، بیر قاریج دا اولسون بونلارا دوغرو گئتمه. ایسته ییرسنسه بیر شهره گئت گیلن بلکه تانری دوشمنینی سندن چکیندیره. سونرا اؤزون اؤز رایینی معینلشدیررسن.

بئله لیکله گئت «اجاء» آدلی داغلاریمیزا . من ده سنینله گئدیب سنی طایفا میزین ایچینه آپارارام.

امام حسین علیه السلام دئدی: آللاه سنه و سنین طایفانا خیر جزاسی وئرسین. بیزیمله بونلارین آراسیندا بیر سؤز واردیر. بونلاردان ال چکه بیلمه ریک. آرامیزدا کی ایشین هارا چاتاجاغینی دا بیلمیریک.

طرماح دئییر : « اللاه انس و جن شررینی سندن اوزاق ائتسین » دئیه اماملا وداعلاشدیم بئله لیکله امام علیه السلام اؤزسفرینی داوام ائتدیریب بنی مقاتل قصرینه چاتدیلار.

 

بنی مقاتل قصری

هاشم اؤولادینین کاروانی بنی مقاتل قصرینه یئتیشیب اوتراق ائتدیکده قورولموش بیر چادیر گوردولر . امام ، بو چادیر صاحیبینین کیم اولدوغونو سوردو. دئدیلر چادر صاحبی عبید الله بن حر جعفی دیر. حضرت آدام گؤنده ریب اونو اؤز یانینا چاغیریتدیردی.

حر اوغلو عبید الله ائلچیه دئدی: انا لله و انا الیه راجعون واللاه من اونا گؤره کوفه دن چیخدیم کی، حسین کوفه یه گیرنده من اورادا اولمایام.

آند اولسون آللاها ایسته میرم نه من اونو گؤرم نه ده او منی گؤره. ائلچی اونون جاوابینی امام علیه السلاما دیدی. امام باشماقلارینی گئییب گلدی اونون خیمه سینه گیریب سالام وئردی.

سونرا اگلشیب اؤنجه اونو اؤز کؤمگینه دعوت ائتدی. عبید الله ائلچیه دئدیگی سؤزونو بیر داها تکرارلادی.

حضرت دئدی: بیزه یاردیم ائتمیرسنسه باری بیزی اؤلدورمک اوچون ساواشیمیزا گلنلردن اولماغینا گؤره آللاهدان قورخ گیلن. آند اولسون آللاها هارایمیزی ائشیدیب کؤمگیمیزه گلمه ین آدام هلاکته دوشه جکدیر. سونرا حضرت قالیب اؤز خیمه سینه گئتدی.

سمعان اوغلو عقبه دئییر: گئجه نین سون چاغلاریندا ، امام علیه السلام کاروانین چاتیشماسینا امر وئردی. بیر ساعت یول گئتدیکدن سونرا حضرت گؤزونون آجیسینی دریب یوخودان آییلدی وایکی اوچ دفعه انا لله و انا الیه راجعون والحمد لله رب العالمین سؤزونو تکرار ائتدی.

اوغلو جناب علی اکبر آت اوستونده حضرتین قوللوغونا گلیب «قوربانین اولوم آتا نه اوچون بو سؤزو تکرار ائتدین؟» دئیه سوردو. امام بویوردو : اوغول یوخودا بیر آتلینی گؤردوم منه دئدی:

بو جماعت گئدیر ببر حالدا کی ، اؤلوم اونلارا دوغرو گئدیر. من ایسه بیلدیم کی اؤز نفسیمیزدیر بیزی گئتمکدن چکیندیریر.

علی اکبر دئدی: آتاجان آللاه سنه پیسلیک گؤسترمه سین بیز حاقلی دئییلیک می؟

حضرت بویوردی بوتون بنده لرین سیغیناجاغی اولان تانریا آند اولسون بیز حاقلی ییق. علی اکبر دئدی: بئله سه حاق اوسته اولمکدن قورخوموز یوخدور. حضرت بویوردو: تانری سنه خئیر جزاسی وئرسین. آتا بالاسینا وئردیگی خئیر جزاسی کیمی.

بئله لیکله کاروان اؤز یولونو داوام ائتدیریب ، صبح نامازی چاتدیقدا امام حسین علیه السلام ائنیب ناماز قیلیب در حال و تله سیک یولا دوشمک امرینی وئردی.

اؤز صحابه لرینی صول طرفه دوغرو یؤنلتمک ایسته ییردی سه حر بن یزید قویماییردی. حر ده اونلاری کوفه یه طرف آپارماق ایستدیکده امام مانع اولوردو. بئله لیکله بو کاروان گلیب نینوا منطقه سینه چاتدی.

قایناق : کربلا ماجراسی ، روایت : ابو مخنف لوط بن یحیاداندیر ، نشر ائدن : اسلامی تبلیغات تشکیلاتی ، تدقیقاتچی : شیخ محمد هادی یوسفی ، چئویرن : شیخ عباس امامی کرکوکلو ، دیجیتال یاییمجیلیک : ائل اوبا

Print Friendly, PDF & Email