ائل اوبا – کوفه اهلی معاویه نین اؤلومونو و یزیدین خلافته یئتیشدیگینی ائشیدیب قورخويا دوشموشدولر. اونلار همده امام حسینین و زوبئیر اوغلونون بيعت ائتمکدن بویون قاچیریب مکه یه گئتمکلرینی ائشیتمیشدیلر.
محمد بن بشر همدانی بئله روایت ائتمیشدیر : سليمان بن صرد خزاعینین ائوینه ییغیلدیق. سلیمان چیخیش ائدیب دئدی :
«معاویه اؤلوب و حسين اونلارا بيعت ائتمگه مانع اولوب مکه یه گئتمیشدیر. سیز ایسه اونون و آتاسینین شیعه سی سنييز. اگر اونا یاردیم ائدیب دشمنی ایله جهاد ائتمه نیزه اینانیرسیزسا مکتوب یازین. یوخسا قورخورسونوزسا اونو آلداتمایین»
اونلار، « یوخ » دئدیلر. «اونون دوشمنلری ایله موحاریبه ائده جه ییک و اؤزوموزو اونون يولوندا اؤلومه وئره جه ییک.»
«ائله سه» سلیمان بن صرد خزاعی دئدی: «مکتوب یازین حسینه.» اونلار ایسه بو مضموندا بیر مکتوب یازدیلار :
« بسم الله الرحمن الرحيم
سليمان بن صرد ، مسیب بن نجبه ، رفاعة بن شداد ، حبیب ابن مظاهر و سایر کوفه شیعه لریندن علی اوغلو حسینه.
سلام اولسون سنه. حمد اولسون سنین غدار دوشمنینین بئلینی سنیدیران آللاها ائله بير شخصين بئلینی سنیدیردی کی ، زوراکیليقلا خلیفه اولوب امتین اموالینی غصب ائتمیشدی.
خالق اوندان راضی دئییلدی. مسلمانلارین یاخچیسینی اؤلدوروب پیسینی ساخلامیشدی. تانرینین مولکونو ظالملر اليله اؤزونه دولت ائتمیشدی ، ثمود طایفاسی کیمی آللاهين رحمتیندن اوزاق اولسون.
بیلدیرمه لی ییک کی ، امامیمیز یوخدور. بیزه دوغرو گلین. اولسون کی ، تانری سنین الینله بیزی حاق اطرافینا توپلایا. نعمان بن بشیر اماره ساراینیدادیر اونون جمعه و بایرام نامازی مراسیمینده اشتراک ائتمیریک.
هر گاه سنین بورايا گلمه گینی بیلسه ک ، آللاه قویسا نعمانی کوفه دن چیخاریب شاما گؤنده ره ریک. سالام اولسون سنه تانرینین رحمتی ایله بیرلیکده.»
محمد بن بشر همدانی اور روایتینی بئله داوام ائتدیرمیشدیر:
مکتوبو عبد الله بن سبع همدانی و عبدالله بن وال التميمی دن گوندردیک. اونلار سرعتله گئدیب رمضان آیینین اونوندا مکه ده امام حسینه یئتیردیلر. ایکی گوندن سونرا. قيس بن مسهرالصیداوی ، عبدالرحمن بن عبدالله بن الكدن الارحبي وعمارة بن عبيد السلولی نی گؤندردیک اونلار تقریبأ ۱۵۰ مکتوب آپاریردیلار.
ایکی گوندن سونرا هانی بن هانی السبیعی و سعید بن عبدالله الحنفی نی بو مضموندا بیر مکتوبلا گؤندردیک:
بسم الله الرحمن الرحیم
مؤمین و مسلمان شیعه لریندن على اوغلو حسینه.
تله سیکلی گلین خالق سیزی گؤزله ییر . خالقين نظرینده سندن باشقاسی یوخدور. او دور کی ، تله سین ، تله سين. والسلام علیک.
قیس کوفه اهلينين مکتوبونو امام حسینه یئتیردی. امام اونو مسلم بن عقیل ایله بیرلیکده عراقا گوندردی. بطن مضيقده مسلم جنابلارینارینین ایشی چتینلیگه دوشدوکده امام حسینه بیر مکتوب یازیب قيسدن گوندردی….
قیس امام ایله عراقا قاییتدی. بطن حاجره چاتديقدا ، امام حسین کوفه اهلينه بیر مکتوب یازیب قیسدن گوندردی.
قیس گلیب قادسیه منطقه سینه یئتیشدیکده بوسقودا یاتمیش حصین بن تميم تمیمی اونو ياخالاييب ابن زیادا گؤندردی.
او ملعون ایسه جناب قیسی قصرالاماره سارایینین دامیندان یئره آتدیردی. بئله لیکله قيس آللاهين رحمتينه واصل اولدو …
بو طرفدن امام حسین علیه السلام عذيب الهجانات شهرینه چاتديقدا قیسین اؤلوم خبرینی ائشیددیکده گؤزلری دولوب اختیارسیز اولاراق مبارک گؤزلریندن یاش آخدی.
امام بو آیه نی اوخودو: (منهم من قضى نحبه و منهم من ينتظر وما بدلو تبدیلا) اونلاردان بیر تعدادی اؤز عهدینه وفا ائدیب دیلر بیر تعدادی ایسه انتظار چکیر و اراده لرینده اصلا دؤنوكلوک یوخدور.
الهی بیزه و بونلارا بهشتینده یئر وئر گیلن. و اوز رحمتینین آلتیندا توپلا. و سنین ثوابینی طلب ائدنلردن قرار وئر گیلن.
قایناق : کربلا ماجراسی ، روایت : ابو مخنف لوط بن یحیاداندیر ، نشر ائدن : اسلامی تبلیغات تشکیلاتی ، تدقیقاتچی : شیخ محمد هادی یوسفی ، چئویرن : شیخ عباس امامی کرکوکلو ، دیجیتال یاییمجیلیک : ائل اوبا
مطالب جالب
جایگاه عقل و شهوت در ملائکه ، انسان و حیوانات
تواشیح ؛ غیر از علی (ع) که خوانده محمد (ص) برادرش
اسماء الحسنی به زبان ترکی