نشریه الکترونیکی ائل اوبا

و من آیاته خلق السّموات و الأرض و اختلاف ألسنتکم و ألوانکم إنّ فی ذلک لآیات للعالِمین

AfrikaansAlbanianArabicAzerbaijaniBengaliChinese (Simplified)EnglishEstonianFrenchGermanHindiItalianJapaneseKazakhKoreanKurdish (Kurmanji)PersianPunjabiRussianSpanishTurkishUkrainianUrduUzbek

لینک مطلب : http://eloba.ir/?p=3876

مسلم عليه السلامين کوفه یه داخل اولماغی

ائل اوبا – نهایت جناب مسلم اوچ نفر صحابه سی ایله (قيس ، عماره و عبدالرحمن) گلیب کوفه ده مختار ثقفی نین ائوینه گئتدیلر.

کوفه اهلی جناب مسلمين قوللوغونا گلدیلر. او حضرت امام علیه السلامين مکتوبونو اوخودو و اونلار آغلاديلار. بو واخت عابس بن ابی شبیب شاکری آدلی بیر کوفه لی آیاغا قالخيب آللاها شکر ائدندن سونرا حضرت مسلمه خطاب ایده رک سویلدی :

«من خالقین اوره گینده نه اولدوغونو بیلمه دگییم اوچون اونلارین طرفیندن دانیشیب سیزی غرورلاندیرمیرام.

آند اولسون آللاها اؤز اینانديقلاريمدان دانیشیرام. آند اولسون آللاها مني چاغیرسانیز سیزینله اولوب دوشمنلرینزله ووروشارام. و تانریمی ملاقات ائده نه کیمی اؤز قیلينجيملا ووروشارام.

بو ایشدن ایسه تانرینین یانیندا اولماقدان باشقا بیر شنی ایستمیرم.»

سونرا حبیب بن مظاهر اسدی آیاغا قالخيب بئله دئدی:

«ای شبیب اوغلو ، تانری سنه رحمت ائتسین. اورگینده کی شئيلری قیسا سؤزلرله بیلدیردین.

سونرا اوجا بیر سسله دئدی: تایی اولمایان تانریا آند اولسون منده عابس يولوندایام. سونرا کوفه اهلی نین امام حسینه گؤندردیگی و امامین جوابینی اونلارا گتیرن ائلچی عبدالله حنفي آياغا قالخيب حبیب بن مظاهرين سؤزلرینه اوخشار سؤزلرله چیخیش ائتدی.

دیگر طرفدن کوفه واليسی نعمان بن بشیر حضرت مسلمین گلمگیندن خبردار اولوب مسجده گئتدی. او منبره چیخیب بو مضموندا بیر نطق سؤیلدى.

شکر اولسون تانریا . ای تانرینین بنده لري آللاهدان قورخون فتنه و اختلاف تؤرتمگه تله سمه یین. چونکی اختلاف تؤرنمکله آداملار اؤلر قانلار تؤکولر و ماللار غصب اولار. منیمله ساواشمایانلا ساواشمارام ، منه يوروش ائتمه ينه يوروش ائتمرم ، سیزلره بیر سؤز دئمه ییب توخونمارام ، بیر کیمسه نی ظن و گمان اوزره اتهام ائديب ياخالامارام.

لاکين منه آرخا دؤنده ریب بیعتینیزی سیندیرماقلا خلیفه یه مخالفت ائتسه نیز آند اولسون آللاها نه قدر الیمده قیلینج توتا بیلیرمسه سیزی ووراجاغام.

امید ائدیرم کی، سیزین ایچینیزده حاق سئوه ن باطيل سئوه ندن چوخدور.

سونرا بنی امیه طرفداری اولان عبد الله بن مسلم آیاغا قالخيب نعمانا خطاب سؤيلدي:

شاهد اولدوغون بو وضعیت ظلمدن باشقا يول ایله اصلاح اولوناسی دئییلدیر، سنین بو حاقدا کی فیکرین ایسه مستضعفلرین فیکری کیمیدیر.

نعمان بن بشیر اونون جاوابیندا دئدی منیم فیکریمجه تانریا معصیت ائدیب عزیز اولماقدان سا آللاها اطاعت اندیب مستضعف اولماق یاخشیدیر.

نهایت نعمان منبردن یئره ائندی ، عبدالله بن مسلم ایسه مسجد دن چیخیب پزیده بو مضموندا بیر مکتوب یازدی:

عقيل اوغلو مسلم کوفه یه گلیب و حسین شیعه لری اونا بيعت ائتمیشلر. سنین کوفه یه احتياجين وارسا حوکمونو اجراء ائتمک اوچون و دوشمنلرينه سنین کیمی یاناشماق اوچون قدرتلی بیر آدام گؤندر. چونکی نعمان بن بشیر یا ضعیف بير آدامدیر یادا اؤزونو ضعیف گؤسترير.

عقبه اوغلو عماره و سعد اوغلو عؤمر يزيده آیری – آیری عبدالله بن مسلمین مکتوبر مضمونلو مکتوب یازدیلار ابن هشام ، عوانه آدلی بیر آدامدان بئله نقل ائدير :

گلن مکتوبلار یزیدین یانیندا توپلاناندان ایکی گون سونرا معاویه نین کاتیبی نصارا دینلی سرجون بن منصور الرومی نی چاغیرتدیریب دئدی:

ای سرجون علی اوغلو حسین کوفه یه دوغرو گلمکده دیر عقیل اوغلو مسلم حال حاضیردا کوفه ده اونا بيعت آلیر، نعمان بن بشیرین ضعیفلیگی و پیس دانیشماغی منه چاتیب. بو حاقدا نه مصلحت گؤرورسن؟ کیمی کوفه یه والی گؤندریم؟

سرجون دئدی: معاویه قبیردن قالخيب نظرینی دئسه قبول ائدرسنمی؟

یزید ، بلی دئیه جاواب وئردی. سرجون زیاد اوغلونون کوفه یه والی اولماغی حاققيندا اولان امریه نی چیخاریب

دئدی: بو دور معاویه نین امری ، اؤلمزدن اول بو وصیتی یازماغا امر ائتمیشدی ، یزید امریه نی اوندان آلیب مسلم بن عمرو باهلینی حضورونا ایسته دی.

بو مضموندا بیر مکتوب یازدیریب بصره واليسی ابن زیادا گؤندردی.

شیعه لریمین منه یازدیغینا گؤره عقیل اوغلو کوفه اهالیسینی باشینا توپلائیب مسلمانلارین بیرلیگینی داغیتماق ایسته ییر. بو مکتوبو اوخوماق همن کوفه یه گئت عقيل اوغلونو تاپیب ادب ائت ، حبسه آل یا خود اؤلدور والسلام.

عبیدالله مکتوبو اوخویوب کوفه یه گئتمک قرارینا گلدی….

امام محمد باقر عليه السلام بو خبره اوخشار بیر روایتده بویورور:

یزید سرجونو چاغیرتدریب کوفه وضعیتی حاققيندا اونونلا مصلحتلشدی. سرجون دئدی: معاویه دیری اولسایدی حوکمونو قبول ائدردینمی؟

یزید «بلی» دئیه جاواب وئردی.

سرجون دئدی: کوفه اوچون عبيد الله دان باشقاسی والی اولماغا قابل دئیلدیر. بونو قبول ائت و عبيداللاهي اورايا والی تعیین ائت. بئله لیکله یزید زیاد اوغلونا بیر مکتوب یازیب کوفه یه والی گؤندردی.

مکتوبدا عبیداللاها مسلم بن عقیلی اؤلدورمک امرینی وئرمیشدی.

قایناق : کربلا ماجراسی ، روایت : ابو مخنف لوط بن یحیاداندیر ، نشر ائدن : اسلامی تبلیغات تشکیلاتی ، تدقیقاتچی : شیخ محمد هادی یوسفی ، چئویرن : شیخ عباس امامی کرکوکلو ، دیجیتال یاییمجیلیک : ائل اوبا