قاضی اوغلو

ائل اوبا – داها صونرا امام علیه السلام ، حق اوغروندا اریمه یه حیات دولو بیر شهادته حاضرلاندی. بوصیرادا دوشمانین عسکری امامین دورت یانینی صارمیشتی …

امام علیه السلام چادیرلارین ئوگونه گلدیغینده باجیسی زینبه سانکی بویله بویوردو :

گوروسون ای باجی یالنیزیم یالنیز

عباس صو یولوندا دوشوبتو قولسوز

اکبریم ، قاسیمیم ، اصحابیم جانسیز

اللها شکر اولسون ای آنام قیزی

آیریلیغ چاغیدیر آزدی فرصتیم

بویونومو آزاد إیت بودور رغبتم

 

الینده یتیملر بیر امانتیم

بابا اول هپسینه ای آتام قیزی

آیریلیغ چاتارکه ن بوزما وقارین

دوشمانلارا الماسین سه سین هاوارین

سن زهرا قیزیسین توت اعتبارین

دایان زور گونلره ای بابام قیزی

بابام ایله آنام بکلیرلر منی

ایسته رلر گورسونلر صابرلی سنی

آغلارسا سن اوقشا صوصوز قیزلری

آننه اول خسته مه ای زهرام قیزی

گوره رکه ن باشیمی دوشمان الینده

بیلیریم گوج قالماز باجی به لینده

قالارسیز تک یالنیز بلا چولونده

بابامی تیز چاغیر مرتضی م قیزی

رباب سا یانیری اوغلو اصغرچین

لیلی دا آغلیری قاسم اکبرچین

سکینه یاس قوروب أر علمدارچین

بو گونه صبر ایله کربلام قیزی

آییرسا باشیمی جانمدان اشرار

گزدیرسه اوستومده آتینی کفار

اللها باغلا بیل ایله مه هاوار

بابا اول عیاله ای بابام قیزی

اللهین لطفنده ن اولمایین یائس

بابام دا آنام دا سیزلره حارس

بو گیجه یاقناشسا سیزلره فارس

باباندیر ، قورخمایین ای زهرام قیزی !

داها صونرا بویوردو! باجی زینب اصغری گه تیرگینه ن یانیما اونونلادا صون کره گوروشه لیم ، علی اصغری قوجاغینا آلیب ، اونو اوپه نده ن صونرا دوشمانین عسکرینین قارشیسینا گه تیردی.

صوصوزلوغدان یوره گی چیرپینان اوغلونو الیله یوخاری قالدیردی سانکی بویله بویوردو :

کیم بیر ایچیم صو ویره ر بو قاناتسیز سرچه یه

کیم بیر داملا گوز یاشی باغیشلار بو کورپه یه

چادیردا چاناغلار بوش چای باشیندا قارداشیم

شهید اولموش ، گوزلر تیکیلیب بوش شربه یه

بو باهارسیز یه له په م قونوب یایلا قاپیسیندا

قوجاغدا دایانمیری ناز ایدیری کولگه یه

یوره گیمده حبیبلر قان ایچینده یاتمیشلار

منه جواب ویرمیرلر ناز ایدیرلر هر شی یه

 

دوشمان عسکرینده ن اوغلو علی اصغر ایچین بیر قورتوم صو ایسته دی او حالدا دوشمان عسکرلرینین کیمی صو ویرمه غ ایسته دی ، کیمده بیر داملا صو ویرمه یین ، چونکو حسین صویو ئوزو ایچین ایستیری ، دیدیلر .

اوردونون ایکی یه بولونمه سینی گوره ن حرمله بیر کره ده ن سوت امر علی اصغرین بوغازینی نیشان آلیب اوخلادی.

اوشاغسا باشی که سیک قوش گیبی باباسینین الینده چالیندی …

امام حسین علیه السلام کورپه نین قانیندان اوجونو دولدوروب گوگه سه په رکه ن بویله بویوردو :

« بو مصیبت لر منیم ایچین قولایدیر ، چونکو الله یولوندادیر و الله بولاری اییجه گورور ، ای اللهیم بو مصیبتلر روحومون بدنده ن آیریلماسیندان قولای ده گیل.

ای اللهیم بیلیره م ظفرده ن داها اییسینی بیزه ویردین ، بو جماعت دن بیزیم انتقامیمیزی آلاجاغسان وبیزیم بولارین الینده چه کتیغیمیزی آخرتیمیز ایچین صاخلایاجاغسان».

داها صونرا مظلوملارین باش تاجی امام حسین علیه السلام سانکی بویله دیدی :

گوگ ده یانار

قورویلا گوگ ده یانار

قان سه پتیم دادا گیتسین

بیلمه دیم گوگده یانار

بو صوصوز کورپه م ایچین

ییر یانار گوگ ده یانار

بیزلره اولان ظلما

اینانمام گوگ دایانار

علی اصغرین نه نه سی رباب کورپه سین قان ایچینده گوره رکه ن سانکی  بویله سازلیردی :

کورپه اوغلوم داغلاندی

آل قانا صیریغلاندی

نه سوت گوردو نه ده صو

جیگه ریم دورغالاندی

اوخلادیلار بالامی

داغیتدیلار یووامی

قوجاغیم بوش قویدولار

هیچ ایتدیلر جفامی

باغریمی قان باغلیری

کورپه م ده ردی داغلیری

قولاغیمدا شن سه سی

یوره گیمده آغلیری

قایناق : کربلا اولایلاری – یازان : قاضی اوغلو – عربجه مقرم مقتلینده ن سه چمه لر

ائل اوبا

Print Friendly, PDF & Email