سعد اوغلونون کوفه دن کربلایه چیخماغی

حضرت امام حسین نینوا دوشرگه سینده

اهل بیت کاروانی نینوا منطقه سینه چاتیب اورادا اوتراق ائتدیلر. کوفه دن بیر آتلی گلیر گوردولر. آتلی گليب حر بن يزيده و اونون آداملارينا سالام وئردی.

لاکین امام حسین عليه السلاما سالام وئرمدی. او زیاد اوغلوندان حر بن یزیده بو مضموندا بیر مکتوب گتیرمیشدی:

ائلیچیم بو مکتبو سنه چاتدیردیقدا حسینی سویو ، پوسقوسو اولمایان قورو بیر یئرده دوشوردوب ساخلا. اؤز ائلچیمه اورادا قالیب سنین ایشینه نظارت ائدیب خبرینی گتیرمک امرینی وئرمیشم.

حر مکتوبون مضمونونو بيليب زیاد اوغلونون حوکمونو امام حسینه و اونون اصحابینا خبر وئردی.

دیگر طرفدن امام حسین علیه السلامين اصحابیندان ابو شعثا آدلی بیر نفر، آجیقلا زیاد اوغلونون ائلچیسینه باخیب دئدی: سن ای نسیر اوغلو مالک!

کنده ائلیندنسنمی؟ او، «بلی» دئدی.

آنان ماتمينده اگلشسین بو مکتوبدا نه گتیریبسن؟ دئیه سوردو.

اودئدی: نه گتیرجه یم، اماميما اطاعت انديب بيعتيمه وفا ائتمیشم.

سونرا ابو شعثا اونا دئدی: اوز نفسینین هلاکتینده آللاهينا عاصی اولوب ، امامینا اطاعت ائتدین ، دونیادا عارسیزلیغی آخرتده ايسه جهنم اودونو قازاندین.

آللاه تعالی قصص سوره سینده بویوروب:

«وجعلناهم أئمة يدعون الى النار ، و يوم القيامة لاینصرون»

یعنی اونلارا (اؤز عمللری نتیجه سینده) جهنم اودونا دوغرو چاغیران قاباقجیللار قرار وئرمیشیک ، قیامت گونو ده کومک اولونمازلارا سنین امامین اودورمو؟

بئله لیکله یزید اوغلو حر او عصمت و طهارت کاروانینی سوسوز و ساکینسیز چولده ائنمک مجبوریتینده قویدو . امام حسین صحابه لریندن حره «قوی بو شهرلرین بیرینده نینوادا غاضریه ده یاخود شفيه ده اینک» دئدیلر.

حر ، واللاه «ائله یه بیلمرم» دئدی «چونکی زیاد اوغلو بو آدامی منه جاسوس گونده ریب.»

زهیر بن قین دئدی: ای پیغمبر بالاسی بو جماعتله ساواشماق سونرا گلنلرله ساواشماقدان بيز اوچون داها آساندير ، جانیما آند اولسون سونرا اوقدر آدام گله جک کی ، قاباقلاریندا دایانماغا طاقتیمیز اولمایا جاقدير.

امام بویوردو : بونلارلا ساواشی من باشلامارام.

زهير دئدی: بیزی فرات قيراغيندا يئرلشن و چوخلو پوسقوسو اولان بوشهره آپار، گئتمگیمیزه مانع اولارسالار اونلارلا ساواشاريق.

امام حسین (بوشهرين آدي ندير»؟ دئیه سوردو.

زهير «العقر دير » دئدی. حضرت بویوردو : ایلاهی من بو شهرده ن سنه سيغينيرام ، سونرا کاروانین ائنمه سينه امر وئری.

بوایسه 6۱۔ نجی هجرت ایلی محرمین ایکیسی جمعه – آخشامی گونو ایدی.

سبط ابن الجوزی روایت ائدیر: حضرت «بویئرين آدی ندير ؟» دئیه سوردو.

«کربلادير » دئدیلر نینوا شهری بورادادیر. حضرت آغلاییب دئدی:

چتینلیک کرب و بلا. سونرا آرتیردی: ام سلمه منه دئییب کی: جبرائیل پیغمبرین قوللوغوندا ایدی سن ده منیم قوجاغیمدا. آغلادین. پیغمبر بویوردو : بوشلابالامی. من سنی بوشلادیم. پیغمبر سنی قوجاغینا آلدى.

جبرائیل « یا رسول الله سئویرسنمي اونو ؟ » دئیه سوردو.

حضرت (بلی) دئیه جاواب وئردی. جبرائیل دئدی: اونو امتين اؤلدوره جکدیر. ایسته ییرسنسه اونون اولدوگو یئرین تورپاغینی سنه گؤستریم.

حضرت پیغمبر «گؤستر » دئدی و سونرا جبرائیل کربلا چؤلونون اوزه رینه قانادلارینی آچیب او تورپاغی پیغمبره گؤستردی ، حضرت او تورپاغی قوخولادی…

سونرا امام حسین علیه السلام آرتیردی: بودور ، آللاها آند اولسون جبرائیلین پیغمبره خبر وئردیگی یئر بورادير، من ده بورادا اؤلدورله رم.

سعد اوغلو طبقات کیتابیندا شعبي ده ن نقل ائدیر:

حضرت علی علیه السلام صفین دعواسینا کربلادان کئچر کن، فرات قيراغيندا يئرلشن نینوا شهرينه چاتدیقدا دایانیب امام حسین علیه السلاما بویوردو :

ای ابا عبدالله بو يئره نه دئییرلر؟ کربلاء دئیه جاواب وئردی.

حضرت آغلاییب گؤزلریندن یاش تؤکولد و ، سونرا دئدی: بیر گون پیغمبرین قوللوغونا یئنیشیب گوردوم آغلاییر. «نیه آغلاییرسان» دئیه سوردوم.

حضرت بویوردو : بير آز بوندان اول جبرائیل یانیمدا ایدی. منه خبر وئردی کی ، بالام حسینی فرات قیراغیندا کربلا آدلی بیر یئرده اؤلدوره جکلر، جبرائیل اورانین تورپاغیندان بیر اوووج دا گتیردی من اییله دیم و گؤز یاشیمین قارشیسینی آلا بیلمدیم.

سعد اوغلونون کوفه دن کربلایه چیخماغی

روايته گؤره زیاد اوغلو، کوفه لیلردن دؤرد مین نفر سعد اوغلونا قوشوب دستبی (دشتبه کلمه سینین عربجه ساختالاشماسيدير) منطقه سینه گؤندردی.

چونکی دئیلم ائلی عصیان ائتمیشدی. بئله لیکله زیاد اوغلو ری ولایتینین حؤکومتینی یازیب سعد اوغلونا وئریب حرکت ائتمگینه امر ائتدی ، سعد اوغلو دؤرد مین نفر له کوفه دن چیخیب «اعين حمامی» آدلانان بیر یئرده چادر قوردو.

امام حسین علیه السلامين ایشی بو یئره یئتیشیدیکده زیاد اوغلو عؤمر بن سعدی ایسته ییب دئدی: حسین اوستونه گئت اونون ایشینی قورتارديقدان سونرا ری شهرینه گئدرسن.

سعد اوغلو «آللاه کؤمگین اولسون، بو ايشدن منی معاف ائده سن.» دندی.

زیاد اوغلو دئدی: بو شرط ایله معاف ائدرم کی ، وئردیگیم حؤکمو گیری قایتاراسان.

سعد اوغلو فیکر ائتمک اوچون بو گونو مهلت وئر دئدی…

سونرا او ، اؤز مشاورلری ایله مصلحتلشیب، هامیسی اونو حسين دعواسيندان چکیندیریردی. باجیسی اوغلو حمزة بن مغیر داییسینین یانینا گلیب دئدی:

آللاها آند ایچیرم کی ، حسین ساواشینا گئتسن تانرینین اؤنونده گناهکار اولوب رحمتینی گسه جکسن. بئله لیکله آند اولسون آللاها ، دونیادان ، دونیانین مالیندان و شاهلیغیندان ال چکسن ، قیامت گونو حسین قانی اوسته تانرینین قارشیسیندا دایانماغیندان سنه یاخشیدیر.

عؤمر بن سعد باجیسی اوغلونا دئدی: انشاء الله سن دئیه نی ائده رم.

عبد الله بن يسار جهنی دن ، اوغلو عماردان ، عوانه بن حکمه چاتان خبری هشام بئله نقل ائدير : عبد الله بن يسار دئییر:

امام حسینله ساواشماغا امر اولوندوغو زامان سعد اوغلونون یانینا گئتدیم. او منه دئدی: امیر زیاد اوغلو عبيد الله حسئینین دعواسينا گئتمگيمه امر ائدیب منی. من اونون گئتمگینه مانع اولوب دئدیم:

تانری سنه دوز یول گؤستريب هدایت ائتسین ، اوتور یئرینده ، بوایشی گؤرمه ، وحسين دعواسينا گئتمه. عبدالله دئییر:

سونرا من اونون یانیندان چیخدیم ، آز زامان سونرا بير نفر گلیب منه دئدی: سعد اوغلو حسين دعواسينا قوشون توپلاییر.

قاییتدیم سعد اوغلونون یانینا اوتوروب گؤردوم. منی گؤردوکده اوزونو آیری یانا دؤندردی. بیلدیم کی ، حسین دعواسينا گئتمک قرارينا گلیب ، من ده اورادان چیخدیم.

یئنه عبدالله بئله روایت ائدیر: عؤمر بن سعد زیاد اوغلونون حضورونا گلیب دئدی: آللاه گؤمگین اولسون ، سن منی بو ایشه سئچیب و ری حؤکومتینی یازدین. اهالی ده بونو ائشيد يب. ایسته ییرسنسه بو حوکمو منه وئر لاکین حسین ساواشینا کوفه اعیانلاریندان بوقوشون ایله گؤندر. من باجارمارام.

زیاد اوغلو دئدی: کوفه اعیانلارینی منه تانیتديرما . سنین امرينله دئییل ، هر کیمی ایسترسم گؤندره رم. ایسته ییرسن قوشونلا گئت ، یوخسا حوکمو گئرى قايتار.

عؤمر بن سعد زیاد اوغلونون عناد ائتمگینی گؤروب دئدی: گئده رم بئله لیکله سعد اوغلو ، دؤرد مین نفر قوشونلا حرکت ائدیب کربلادا حسین قارشیسیندا اوندان بیر گون سونرا ائندی.

شیخ مفید ارشاددا محمد بن ابی طالب مقتليندن بوخبری بئله نقل ائتمیشدیر:

زیاد اوغلو ، عؤمر بن سعدی دوققوز مین نفر ايله ، يزيد بن ركاب کلبینی ایکی مین نفر ايله ، محصين بم تمیم سکونی نی دؤرد مین نفر ايله ، مازنی نی اوچ مین نفر ایله و نصر بن فلانی نی ایکی مین نفر ایله حسين دعواسينا گوندردی. جمعلیکده ایگیرمی مین نفره یاخین پیادا و آتليدان عبارت قوشون.

شافعی مطالب السئوول دا قوشونون ایگیرمی ایکی مین نفر اولدوغونو قئيد ائدير. شیخ صدوق ایسه ، حضرت امام صادق عليه السلامدان قوشونون سایینی اوتوزمین نفر نقل ائدیر

سبط الجوزی روایت ائدير: محمد بن سیرین دئییر: علی بن ابیطاليبين کرامتی بوندادیر کی ، بیر گون سعد اوغلونو گنجليگينده گؤروب دئدی: وای حالينا سعد اوغلو. نه جور اولاجاقسان بیر گون جنتله جهنمی سئچمک مجبوریتینده قالیب و جهنمی سئچمگیندن؟

عبد الله جهنی نین روايتينه گؤره ، سعد اوغلو امام حسین عليه السلامين بو يئره گلمه گینین سببینی سورماق اوچون عزرة بن قيس احمسی نی گؤندرمک ایستدی، او ، امام حسینه دعوت مکتوبو یازانلاردان اولدوغو اوچون اوتانیب گئتمدی سونرا سعد اوغلو کوفه اعيانلاریندان هر کیمه اوز توتدوسا مکتوب یازدیقلاری اوچون گئتمکدن چکیندیلر.

کیثربن عبدالله الثعبی آدلی شجاعتلی و اوتانماز بیر پهلوان قالخيب «من گنده رم» دئدی «و آند اولسون آللاها ای سعد اوغلو! ایسته سن اونو دوغرارام دا» سعد اوغلو ، «دوغرانماسینی ایستمیرم» دئدی «لاکین گئدیب اوندان نه اوچون بورايا گلمگینی سور. بئله لیکله او معلون امام حسینه دوغرو دؤندو .

ابو ثمامه صائدي اونو گؤروب حسينه «آللاه کؤمگین اولسون ای ابا عبدالله یئر اوزونون ان شرارتلیسی و ان جرأتلیسی ، قان توکن بیر آدام سنه دوغر گلیر » دئدی ، سونرا الينده قیلینج كثيرين قارشیسینی آلیب «قیلینجینی آت يئره» دئیه هایلادی.

کثیر «اولماز واللاه» دئدی «من بیر ایکی کلمه سؤز دئمگه گلن ائلچییم ، قولاق آسسانيز دئیه جم ، یوخسا گئری قاییداجاغام.»

ابوثمامه دئدی: من قیلینجینین دسته سیندن یا پیشیم سن سؤزونودئی.

کثیر، «يوخ واللاه الين منیم قیلینجیما دگمز» دئدی.

ابوتمامه دئدی: سؤزونو منه دئی ، حسینه یاخینلاشماغا قويمارام سنی. چونکی سن بیر اجلاف و فاسق آدامسان…. اونلار بیر – بیرلرینه پیس سؤزلر دئدیلر ، و کثیر دؤنوب ماجرانی سعد اوغلونا دئدی.

سعد اوغلو قرة بن قيس حنظلینی چاغیریب «وای حالينا » دئدی «ای قرة گئدیب حسينله گؤروش و اونون بورا یا گلمگینه نه کیمی عاملرين سبب اولدوغونو سور .

امام حسین علیه السلام قرة بن قیسین گلمگینی گؤروب اصحابینا دئدی: بونون کیم اولدوغونو تانییرسینیزمی؟ مظاهر اوغلو حبيب ، «بلی» دئدی «بو حنظله آدلی بیر آدامدير ، تمیم ائلیندن، و باجیمیز اوغلودور ، من دوغرودان دا بونو خیرخواه آدام تانییردیم ، و بو وضعيتده اولاجاغینی ظن ائتمیردیم.

نهایت قرة بن قیس گلیب سالام وئرندن سونرا ، سعد اوغلونون تاپشیریغینی امام حسین علیه السلاما دئدی. او حضرت جاوابیندا دئدی:

شهرينیزین اهالیسی منه مكتوب یازیب گلمگیمی ایستمیشلر. ایندی مندن چکینیرلرسه گئری قاییدارام.

قیس اوغلو قاییدیب امامین جاوابینی سعد اوغلونا یئتیردی… سعد اوغلو، «تانریدان ، حسینین دعواسيندان و اولدورمگیندن منی معاف ائتمگینی دیله ییرم دئدی. سونرا زیاد اوغلونا بو مضموندا بیر مکتوب یازیب گوندردی.

بسم الله الرحمن الرحيم

حسینین قارشیسینی آلیب اونون بورایا گلمگینین سببینی و نه ایستدیگینی سورماق اوچون بیر ائلچی گوندردیم. حسینین جاوابی بئله دیر:

بوشهر اهالیسی منه مکتوب یازیب و ائلچی گوندریب کوفه یه گلمگیمی ایستدیلر. من ده اونلارین چاغیریشلارینی قبول ائدیب گلمیشم. ایندی ، اگر مندن چکینیرلرسه یا خود فیکیرلری دگیشیلیبسه ، منصرف اولوب گئری قاییدارام.

مکتوبو زیاد اوغلونا اوخودوقدا او ملعون بو شعری اوخودو

الان اذ علقت مخالبنا به

یرجو النجاة ولات حین مناص!

(یعنی: ایندی المیزه کئچدیکده اؤزونه قورتولوش یولو آختاریر)

قایناق : کربلا ماجراسی ، روایت : ابو مخنف لوط بن یحیاداندیر ، نشر ائدن : اسلامی تبلیغات تشکیلاتی ، تدقیقاتچی : شیخ محمد هادی یوسفی ، چئویرن : شیخ عباس امامی کرکوکلو ، دیجیتال یاییمجیلیک : ائل اوبا