امام حسین علیه السلام مکه یولوندا

سمعان اوغلو عقبه دئمیشدیر : مدینه ده ن چیخیب اصلی یول ایله گئدیردیک.

اهل بیتدن بیریسی ، بیزه چاتا بیلمه سینلر دئیه ابن زوبئیر کیمی اصلی بولدان چیخیب کورا یوللا گئتمگی اماما تکلیف ائتدی.

امام جاوابیندا «یوخ» دئیه سؤزونه داوام ائتدیردی : تانری حاققی عمومی جاده دن چیخمایاجاغام تا آللاه اؤز سئودیگی کیمی بیزیم حاققیمیزدا حؤکم ائتسین.

عقبه سونرا دئمیشدیر : یولدا عبدالله بن مطیع بیزیم قارشیمیزا چیخیب امام حسیندن هارا گئتمک ایستدیگینی سوردو.

امام جاوابیندا دئدی : حال حاضیردا مکه یه گئتمک ایسته ییرم. لاکین سونرا تانریا استخاره ائده جه یم.

عبدالله بن مطیع دئدی : آللاه سنین استخاره نی خئیر ائتسین و بیزی سنه قوربان ائتسین .

مکه یه چاتدیقدا کوفه یه یاخینلاشما چونکی شوم بیر شهردیر. آتان علینی اورادا اولدوردولر. قارداشینا حؤرمتسیزلیک ائتدیلر و آزقالا اؤلدورن بیر طعنه ووردولار.

حرمه گئت ، سن عرب قومونون آغاسی سان . آللاها آند اولسون حیجاز اهلی سندن باشقاسینا باش اگمز و امت هر طرفدن سنه بیعت ائدر.

تانری حرمیندن اوزاق قالما سنه قوربان اولوم. آند اولسون آللاها سن اؤلسن بیزی قول ائده جکلر.

 

امام حسین علیه السلام مکه ده

امام حسین علیه السلام 60 – جی ایل 3 – شعبان جمعه گئجه سی مکه یه چاتدی .

معلوم اولدوغونا گؤره امام مدینه ده بئش گؤن عرضینده مکه یه اؤزونو یئتیرمیشدیر بو ایکی شهرین فاصله سین 500 کیلومتر اولدوغونو نظره آلساق گؤنده 100 کیلومتر یول گئتمیشدیر و بو سرعت ولیدین آداملارینین اونلارا چاتماماسینا گؤره ایمیش.

او ذیحجه نین سگگیزینه ده ک ( شعبان رمضان و ذی القعده آیلارینی ) مکه معظمه ده قالدی. مکه اهالیسی ، ها بئله حاجا و عؤمره یه گلنلر امامین گؤروشونه گلمه یه باشلادیلار.  مکه اطرافیندان دا امامین گؤروشونه گلیردیلر.

زوبئیر اوغلو عبدالله کعبه ده قالیب گونونون چوخونو ناماز و طوافلا کئچیریردی. بعضا ده امامین قوللوغونا گلیردی . هر گلنده ده اماما مصلحت گؤستریردی.

امام زوبئیرین یانیندا بوتون مخلوقاتدان آغیر ایدی. چونکی او بیلیردی کی ، نقدر حسین مکه ده دیر حجاز اهلی باشقاسینا بیعت ائتمزلر. و حجاز اهلینین یانیندا او عظمتده بیر آدام یوخدور.

قایناق : کربلا ماجراسی ، روایت : ابو مخنف لوط بن یحیاداندیر ، نشر ائدن : اسلامی تبلیغات تشکیلاتی ، تدقیقاتچی : شیخ محمد هادی یوسفی ، چئویرن : شیخ عباس امامی کرکوکلو ، دیجیتال یاییمجیلیک : ائل اوبا

Print Friendly, PDF & Email