ائل اوبا – ابن زوبئیر ولید ائلچیسیندن خبری ائشیدیب : « بیر آزدان گله رم » دئییب مسجیددن چیخیب ائوینده گیزلندی.

گون باتان چاغی دا نئچه ائلچی دالیسیجا گلدی یئنه حاضیر اولمادی.

ولید ایلک آخشام ابن زوبئیری چاغیرماغا نئچه نفر یاساوول گؤندردی. او قارداشی جعفری ولیدین یانینا گؤندردی جعفر ولیده دئدی :

آللاه کؤمکین اولسون ائلچیلرینین چوخلوغوندان عبداللاهین قلبینه قورخو سالمیشسان ال چک اوندان ، صاباح قوللوغونا یئتیشر ان شاالله.

ولید ایسه یاساووللارین داغیلماسینا امر وئردی.

دیگر طرفدن ابن زوبئیر رجب آیینین 27 – ده شنبه گئجه سی امام حسین هجرت ائتمزدن بیرگئجه اول قارداشی جعفر ایله بیرلیکده کورا یوللا مکه یه دوغرو یوللاندی . مکه یه چاتدیقدا اورانین والیسی ابن سعیده دئدی : من گلمیشم آللاهین ائوینه سیغینام.

 

امام حسین علیه السلام مدینه مسجیدینده

ولید و اونون آداملاری شنبه گونو 28 رجب آخشامادک ابن زوبئیرین طلبینده مشغول اولدولارسا اونا ال تاپا بیلمدیلر. ولید گئجه امام حسینی (ع) چاغیرماغا گؤندردی.

امام حسین (ع) ائلچیه « سحره کیمی سیزده فیکیرلشین بیزده فیکیرلشک » دئدی ایسه او گئجه نی امامدان ال چکدی …

امام ایکی نفر صحابه لری ایله مدینه مسجیدینه گئتدی.

ابوسعید مقبری بو بارده ده دئییر : امام حسینی صحابه لرنیین گاه بیرینه بعضا دیگرینه دایاناراق یزید بن موفررغین شعرینی اوخودوغو حالدا گؤردوم کی مسجیده گیریر:

لا ذعرت السوام فی فلق الصبح – مغیرا

ولا دعیت یزیدا یوم اعطی من المهایه ضیحا – والمنایا یرصدننی ان احیدا

یعنی : اؤلوم اولسون منه اگر آدیملا چاغیریلدیقدا ، قویونلاری اوتارماغا آپارماسا ، هر گاه بو ایش کیچیلمگیمه سبب اولورسا ، بیر حالداکی ، بؤیوکلوکله اؤله بیله رم.

ابو سعید آرتیریر : اؤز – اؤزومه فیکیرلشدیم « امام بو شعری اوخوماقدا بیر ایش گؤرمک ایسته ییر» و ایکی گون کئچمده ن امامین مکه یه گئتمه گینی ائشیتدیم.

قایناق : کربلا ماجراسی ، روایت : ابو مخنف لوط بن یحیاداندیر ، نشر ائدن : اسلامی تبلیغات تشکیلاتی ، تدقیقاتچی : شیخ محمد هادی یوسفی ، چئویرن : شیخ عباس امامی کرکوکلو ، دیجیتال یاییمجیلیک : ائل اوبا

Print Friendly, PDF & Email