امام حسین علیه السلامین مکه دن چیخماغی

امام حسین علیه السلام 60 – نجی ایل شنبه ۲۸ – رجب ده مدینه دن چیخیب ۳۔ شعبان جمعه گونو مکه یه گیردی ، او حضرت شعبان ، رمضان ، شوال و ذیحجه آیلارینی مکه ده قالدى. و چرشنبه آخشامی گونو ذیحجه نین سگگیزینده مکه دن چیخدی.

حضرت مکه ده دوشرکن او شهرین اهالیسی ها بئله حجه وعمره یه گلن مسلمانلار دسته – دسته اونون گؤروشونه گلیردیلر.

 

زبیر اوغلونون امام حسین علیه السلام گؤروشو

امام حسین علیه السلام مکه ده اولار کن زبیر اوغلو عبد الله دا مکه ده ایدی. او بعضا گون آشیرا بعضا ده ایکی گون دال – بادال او حضر تین گؤروشونه گلیردی.

زبیر اوغلونا معلوم اولموشدوکی ، نه قدر امام حسین (ع) مکه ده دیرسه حجاز اهالیسی اونا بیعت ائتمیه جکلر. و امام علیه السلام اونلارین یانیندا بؤیوک شخصیت صاحبی ایدی.

بونا گؤره بیر گون او امام حسین علیه السلام لا خصوصی شکیلده صحبته باشلاییب دئدی: بنی امیه نین بیزی بوشلاماغینین سببینی بیلمیرم.

خلافت و ولایتی اله آلا بیملدیگیمیزین سببینی ده بیلمیرم. بیز مهاجرلر اؤولادی ییق، خلافت بنی امیه اوچون دئییل بیزیم اوچوندور. دئه گؤروم نه ائده جکسن؟

امام حسین علیه السلام: آند اولسون آللاها اؤزومله آراشمیشام کی ، کوفیه گئدم. شیعه لریم و کوفه اعیانلاری دا بونو یازمیشلار. آللاهدان خیر دیله ییرم.

زبیر اوغلو: منیم ده سنین شیعه لرین کیمی شیعه لریم اولسایدی کوفه دن ال چکمزدیم.

سونرا «امام حسین علیه السلامین حجازدان چیخیب گئتمگینه راضی ایمیش» دئمه سینلر دئیه سؤزونه داوام ائتدیردی: اگر حجازدا قالیب ولایتی ایسته ییر سن سه انشاء الله بیر کیمسه مخالفت ائتمز. سونرا دوروب چیخدی.

امام حسین زبیر اوغلو گئدندن سونرا دئدی: اونون اوچون دونیادا منیم حجازدان چیخیب عراقا گئتمگیمدن یاخشی شئی یوخدور. چونکی یاخشی بیلیر نه قدر من حجازدا وارامسا ، اونا بیر ایش یوخدور. مسلمانلار منی اونلا تای ائتمزلر. او دور کی منیم بورادان گئتمگیمی و حجازین اونون اوچون قالماغینی ایستدی.

 

امام حسین علیه السلامین ابن عباس ایله بحثی

امام حسین علیه السلام کوفیه گئتمک قرارینا گلدیکده ، عبدالله بن عباس گلیب اونا دئدی: خالق آراسیندا بئله یاییلیب کی ، عراقا گئدیرسن دئی گؤروم نه ائتمک ایسته ییرسن؟

حضرت جاواب وئردی: بو ایکی گون عرضینده یولا دوشه جه یم انشاء الله. ابن عباس ، «بئله سه بو سفرده سنه آللاهدان سیغیناجاق دیله بیرم.» دئیه آرتیردی:

آللاه سنه رحمت ائتسین دئه گؤروم بیر طایفایا دوغرو گئدیرسنمی کی ، اؤز امیرلرینی اؤلدوروب اؤلکه لرینی آلیب دوشمنلرینی قووموشلار؟ اگر بئله دیرسه گئت اورایا . یوخسا بیر حالدا کی اونلارین امیرلری زورلا حؤکم سورور و عاملارینین الیله زکات توپلاییر سنی دعوت ائتمکلرینین معناسی یوخدور.

اونلار سنینله ساواشماق ایسته ییرلر. من ایسه سنی اونلارین زیانیندان آماندا گؤرمورم. اونلار حیله ائدر، یالان ساتار ، سنله مخالفت ائدر و سنی اؤلدورمگ او چون دئدیکلرینین ضدینه دایانارلار.

امام حسین بویوردو : من ایسه آللاهدان خئیر ایسته ییرم. گؤرک نه اولاجاق ؟

 

امام حسین علیه السلامین ابن عباس ایله ایکینجی بحثی

آخشام اولدوقدا ابن عباس امام حسین علیه السلامین یانینا گلیب دئدی: عمی اوغلو نه قدر اؤزومو دؤزمگه یؤنلدیرم سه دؤزه بیلمیرم.

اؤزونون و کؤمکچیلرینین بو یولدا اولمگیندن قورخورام. عراق اهالیسی حیله کار دیر، اونلارا یاخین گئتمه. حجازدا قالسان بورانین امیریسن، عراقلیلار سنی ایسته ییرلرسه بیر مکتوب گؤندر دوشمنلرینی کوفه دن چیخاریب قووسونلار سونرا گئت بیرده اگر هجرت ائتمگه تأکید ائدیر سنسه چوخلو داغی و دره تپه سی اولان یئمن شهرینه گئدیب اورا مسلمانلارینین آراسیندا سنه بیعت آلماق اوچون تبلیغاتچی گؤندر. من ده خلافتین دینج یوللا الینه کئچمگینی ایسته ییرم.

امام بویوردو: عمی اوغلو آللاها آند اولسون کی، سنین صداقتلى و مهربان اولدوغونو یقین ائدیرم.لاکین شبهه یوخومدور کی ، عراقا گئتمگ عزمینده یم.

ابن عباس دئدی: بئله دیرسه آرواد اوشاقلارینی آپارما . آللاها آند اولسون قورخورام سنی اؤلدوره لر.

 

امامین عؤمر بن عبد الله مخزومی ایله بحثی

عؤمر مخزومی دئییر: امام حسین علیه السلام عراقا گئتمک اوچون حاضیرلاندیقدا یانینا گئدیب آللاها حمد ائدندن سونرا دئدیم :

عمی اوغلو یانینا گلمیشم نصیحت ائتمک حاجبتم واردیر . نصیحتیمی ایسته ییر سنسه دئییم یوخسا واز کئچیم سؤزومدن.

حضرت امام حسین علیه السلام بویوردو : دئگیلن سؤزونو . آللاها آند اولسون فاسد اولماغینی ظن ائتمیرم. نصیحت ائتمک ایسه پیس بیر ایش دئییلدیر.

عؤمر مخزومی دئدی: عراقا گئتمک ایستدیگینی بیلمیشم. من بو گئتمکدن ال چکمیگینی دیله ییرم.

معلومدور ، ائله بیر شهره گئدیرسن کی ، اورانین حاکمی واردیر . اللرینده ده بیت المال چوخدور اهالیسی ایسه دنیا قولودور . سنه یاردیم وعده سی وئره ن او جماعتین سنینله ساواشماما سینی ظن ائتمیرم.

امام حسین علیه السلام دئدی: آللاه سنه یاخچی مکافات وئرسین عمی اوغلو. تانری حاققی بیلیرم سن اخلاص و نصیحت اوچون بورا گلیب و عقل اوزو ایله دانیشیرسان سنین رأینی قبول ائدم یوخسا قبول ائتمه یم هر حالدا طالع اؤز ایشینی گؤروجکدیر . سن منیم یانیمدا یاخچی مصلحتچی و نصیحت ائدنسن.

 

ابن زبیرین امام حسین علیه السلاملا سون دانیشیغی

روایته گؤره عبدالله بن سلیم ومذری بن مشعل دئمیشلر : بیز ترویه گونو حج مناسبتیله مکه یه گیریب گؤردوک: امام حسین (ع) و زوبیر اوغلو عبدالله حجر اسماعیل ایله کعبه قاپیسی آراسیندا دوروبلار.

یاخینلاشیب گؤردوک زوبیر اوغلو دئییر: مکه ده قالماق ایسته سن سنینله قالاریق. ولایت ده الینده اولار. سنه بیعت ائدیب آرخادوراریق.

حضرت دئدی: آتام (امام علی علیه السلام) منه دئییردی: «بیر قوچ مکه حؤرمتینی آرادان آپاراجاق.» من ایسه او قوچ اولماق ایستمیرم.

سونرا زوبیر اوغلو امام حسینه گیزلی بیر سؤزده دئدی: او حضرت دؤنوب بیزه دئدی ، بیلدینیزمی زوبیر اوغلو منه نه دئدی؟ «قوربانین اولاق بیلمه دیک.» دئدیک.

امام بویوردو : زوبیر اوغلو دئدی کی، من گئدیم جماعتی سنین باشینا توپلاییم.

سونرا امام بویوردو : واللاه بیر قاریج مکه دن قیراق اولسم بورادا اؤلمگیمدن منه یاخشیدیر . آللاها آند اولسون اگر بیر حیوان یوواسینا گیرسم منی چیخاریب حاجتلرین یئرینه پئتیررلر. والله یهود طایفاسی شنبه گونو ظلم ائتدیکلری کیمی منه ظلم ائدرلر.

 

عمروبن اشدق بن احوالاتی

امام حسین علیه السلام مکه دن هجرت ائدنده سعید بن عاص اوغلو مدینه والیسی ایدی. او امام حسین علیه السلامین عراقا گئتمگینه مانع اولماق اوچون قارداشی یحیی ایله بیر تعداد آدام گؤندردی.

حضرت مکه دن چیخدیقدا بو آداملارلا قارشیلاشدی. اونلار، «هارا گئدیر سن گئری قاییت دئدیلر. امام گئری دؤنمکدن چکینیب ساواشدیلار. نهایت مانع اولا بیلمدیلر ، امام ایسه یولا دوشوب گئتدی.»

اونلار اوجا سسله دئدیلر: ای حسین (ع) آللاهدان قورخ. مسلمانلار آراسیندا آیریلیق سالماق ایسته ییر سنمی؟

حضرت بو آیه نی اوخودو: لی عملی و لکم عملکم انتم بریئون مما اعمل و انا برى مما تعملون (نساء سوره سی) منیم عملیم منیم اوچون سیزین عملی نیز ایسه سیزین اوچوندور ، سیز منیم عملیمدن اوزاقسینیز من ده سیزین عملینزیدن اوزاغام.

حضرت امام زین العابدین بویورور: عبد الله بن جعفر امام حسین علیه السلامه بیر مکتوب یازیب ایکی اوغلو عون و محمد ایله گؤندر میشدی. اونلار بیز مکه دن چیخدیقدا بیزه چاتدیلار. مکتوبدا یاز میشدی:

بو مکتوبو اوخودوقدا بیل کی من آللاها گؤره سنین کوفه یه گئتمه مگینی ایسته ییرم. من بو سفرده اؤزونون و آرواد اوشاقلارینین اؤلمگیندن قورخورام.

بو گون سن اولسن یئر اوزونون چیراغی سؤنر. سن هدایت اهلینین بایراغی و مؤمنلرین امیدیسن. گئتمکده تله سمه بو مکتوبون دالینجا گلیرم والسلام.

دیگر طرفدن مدینه ده عبد الله بن جعفر عمرو بن سعید ایله دانیشیب دئدی:

امام حسین علیه السلاما بیر امان نامه یازیب بیلیندیرکی، اونونلا یاخشی یاناشا جاقسان. هم ده اوندان عراقا گئتمکدن واز کئچمگینی ایسته. بلکه امین اولوب قاییدا.

مکتوبو دا قارداشین یحیی دان گؤندر . بئله لیکله او سنه امین اولار و سنین بو مکتوبدا یازدیقلارینا اینانار

عمرو بن سعید دئدی: نه ایسته ییر سنسه یاز من مؤهورله ییم.

عبد الله بن جعفر بو مضموندا بیر مکتوب یازدی:

رحمان و رحیم اولان آللاهین آدی ایله

عمرو بن سعید ده ن على اوغلو حسینه:

سونرا ، من آللاهدان سنی اؤلومدن قورتاریب هدایته یؤنلتمگی ایسته ییرم. عراقا گئتمگینی ائشیتمیشم. سنی آیریلیقدان قورویورام. هلاک اولماغیندان قورخورام قارداشیم یحیی نی جعفر اوغلو عبدالله ایله بیرلیکده سنین یانینا گؤنده ریرم. بونلارلا گئری قاییت سنین اوچون امان و یاخشی قونشولوق واردیر

عبدالله بن جعفر مکتوبر گتیریب عمروبن سعید مؤهورلدى. سونرا یحیی ایله گلیب امام حسین علیه السلاما چاتدیلار. او حضرت مکتوبو اوخویوب سعید اوغلونا بو مضموندا بیر جاواب یازدی:

« آللاها دعوت ائدیب صالح عمل ائله ین و مسلمانلاردانام» دئین بیر کیمسه ، تانرینی و اونون پیغمبرینی اینجیتمه ییب. دوغروندان دا آمانا و قوهوملوغا چایغرمیشسان. ان یاخشی آمان ایسه آللاه آمانیدیر. دونیادا آللاهدان قورخمایان قیامتده اونون آمانیندا اولماز. بیز دونیادا آللاهدان ائله قورخماق ایسته ییریک کی ، قیامتده اونون آمانی بیزه واجب اولا. اگر مکتوبوندا نیتین منه یئتیشمک و خیر دیرسه دونیادا و آخرنده خئیر جزاسی گؤره سن والسلام.

جعفر اوغلو عبد الله و یحیی گئری دونوب عمرو بن سعیده دئدیلر: مکتوبو او خوندوردوق نه قدر قایتارماغا چالیشدیقسا عذر ایسته ییب دئدی:

یوخودا آللاهین پیغمبرینی گؤردوم منه بیر امر ائتدی اونون قوللوغونا

گئدیرم. بو ایسه منیم اوچون داها گوزلدیر.

یوخونون نه اولدوغونو او حضرتدن سوردولارسا بویوردو

بو یوخونو بیر کیسمه یه دانیشمامیشام تانری ایلن ملاقات ائدنه کیمی دانیشمایا جاغام دا.

قایناق : کربلا ماجراسی ، روایت : ابو مخنف لوط بن یحیاداندیر ، نشر ائدن : اسلامی تبلیغات تشکیلاتی ، تدقیقاتچی : شیخ محمد هادی یوسفی ، چئویرن : شیخ عباس امامی کرکوکلو ، دیجیتال یاییمجیلیک : ائل اوبا

Print Friendly, PDF & Email