امام حسین مدینه دن چیخیر

ائل اوبا – امام حسین (ع) بازار گونو گئجه سی 28 رجب ، 60 – جی ایلده اؤز قارداشلاری ، قوهوم اقرباسی و اهل بیتینین چوخو ایله بیرلیکده مدینه ده ن چیخدی .

اومدینه ده ن چیخارکن بو آیه نی اوخویوردو :

( فخرج منها خائفا یتقرب قال رب نجنی من القوم الظالمین )

یعنی قورخولو حالدا اطرافی سؤزه رک شهرده ن چیخدی دئییردی الهی منی ظالملردن قورتار.

امام گلیب مکه یه چاتدی شهره گیرنده بو آیه نی اوخودو :

( فلما توجه تلقاء مدین قال عسی ربی ان یهدینی سواء السبیل )

یعنی مدین سمتینه دؤندوکده دئدی : تانریمین دؤز یول گؤسترمگینی امید ائدیرم.

 

عؤمر اوغلو عبداللانین احوالاتی

دیگر طرفدن مدینه والیسی بیعت آلماق اوچون عبدالله بن عؤمره ائلچی گؤندردی. ائلچی مؤضونو اونا دئدیکده عبدالله خالق بیعت ائدرسه من ده بیعت ائده جه یم دئدی. مجلیسده کیلردن بیری عبدالله بن عؤمره دئدی :

بیعت ائتمکدن چکینمگینین سببی ندیر؟ بئله معلوم اولور کی ، خالق آراسیندا اختلاف تؤره دیب قیردیرماق ایسته ییرسن.

بئله لیکله ده هامی قیریلاندان سونرا ، خالق عبداللادان باشقا بیر کیمسه یوخدور دئیه سنه بیعت ائتملی اولاجاقلار.

عبدالله بن عؤمر بئله جواب وئردی :

من خالق آراسیندا اختلاف تؤره نیب باش کسیلمه گینی سئومیرم. هرگاه هامی بیعت ائده و مندن باشقا بیری قالمایا بیعت ائده جه یم.

ولیدین آداملاری اونون یزید خلافتینه مانعه چیلیک تؤرتمیه جگینی بیلیب اوندان ال چکدیلر.

قایناق : کربلا ماجراسی ، روایت : ابو مخنف لوط بن یحیاداندیر ، نشر ائدن : اسلامی تبلیغات تشکیلاتی ، تدقیقاتچی : شیخ محمد هادی یوسفی ، چئویرن : شیخ عباس امامی کرکوکلو ، دیجیتال یاییمجیلیک : ائل اوبا

Print Friendly, PDF & Email