چوخ زاماندیر اوره گیم ائیلئییر افغان گئجه لر
درد الیندن منه یوخ قاچماقا امکان گئجه لر
یوخونون داشینی گور باشدان آتیبدیر بئله کیم
یوخلایان بخته اولا یاخجی نگهبان گئجه لر
نه گونشدن منه پای چاتدی نه اولدوزدان هارای
نه منیم همدمیم اولموش مه تابان گئجه لر
باخورام گویلره اولدوزدا سمادن آزالیب
گوره سن کیمدی وئریب اوغرییا میدان گئجه لر
یئدیگیم اولدی صداقت کتکی عمر بویی
ایچدیگیم شهد اولا زهر ائیله دی دوران گئجه لر
کیمه عمروم بویی جان جان دئمیشم هر سؤزونه
دئدیگیم هر جانا مین یول دئدی قان قان گئجه لر
اوقدر ساخلامیشام غصه لرین حورمتینی
غمدی دائم یئتیشیر بزمیمه مهمان گئجه لر
تکجه شعریمدی منی باغلایان آیدین سحره
یوخسا یوردومدی منه قورخولی زندان گئجه لر
دوزه رم ظلمته چنگیمده امیدین اتگی
قویمارام سالسین ایاخدان منی هجران گئجه لر
ای منیم روحیمی ایللر بویو تسخیر ائله ین
یوخ خیالین کیمی جان دردینه درمان گئجه لر
تاپمادی “عاصمی” شیرین یوخو عمرونده بیرآن
نئجه یومسون گوزونو دردلی انسان گئجه لر
29
کتاب : یارالی دورنا – اثر: عاصم اردبیلی – انتشارات آذرکهن
مطالب جالب
ضرب المثل های ترکی – الف
آذربایجان ادبیات تاریخینه بیر باخیش (2)
بایاتی – دو بیتی ترکی آذربایجانی