لایلای

لای – لای دئدیم یاتاسان

قیزیل گوله باتاسان

گول یاستیقین ایچینده

شیرین یوخو تاپاسان

لای – لای قوزوم آغلاما

اوره گیمی داغلاما

یات یوخون شیرین اولسون

یوخوما داش باغلاما

لای – لای دئدیم همیشه

کروان گئده ر انیشه

یاستیغیندا گول بیتسین

دوشه گینده بنوشه

لای – لای آ گلین بالا

یوخوسو درین بالا

تانریدان عهدیم بودور

تویونی گوروم بالا

لای – لای دئدیم گونده من

کولگه ده سن ، گونده من

ایلده بیر قوربان اولار

سنه قوربان گونده من

لای – لای امه ییم بالا

دوزوم ، چوره ییم بالا

گؤزله رم بویویه سن

گؤروم کومه یین بالا