مئهترین آنلاغی

قدیم زامانلار ، بَی لر قوناقلیغا گئدنده ، مئهترلرین ده یانلارینجا آپاراردیلار.مئهتر آتا باخار ، بَی ین قوللوغون توتار و گوز اولاردی.

بیر گون بیر قوناقلیقدا شام یئییلندن سونرا بیر مئهتر گؤرور کی آغاسی نین ساققالیندا ایکی دنه دوگی یاپیشیب قالیب.

اوزون آغاسینا توتوب دئییر:

آغالار آغاسی بَی لرین بَیی ، بیر سؤز دئسم اؤلدورمه منی. صلوات داغیندا بیر جوت حرامی ، بئش قارداشی گؤندر اؤلدورسون اونی.

بَی متوجه اولور ، الین ساققالینا چکیب دوگولری سالیر.

باشقا بیر بَی آفتابا گؤتورنده مئهترینه دئییر: گؤردون او مئهتر نئجه ادبله آغاسینا سؤز قاندیردی!

مئهتر دئدی : من اوندان یاخشی بیلرم.

بَی ساققالینا ایکی دنه دوگی قویور گلیب مجلیسده اوتورور. مئهتر بئله گؤردوکده دئییر: آغا موستراحداکی سؤز!

قایناق : ائل بیلگی ثروتیمیز ، یازان : علی ظفرخواه ، انتشارات یاران ، دیجیتال یایینجیلیک : ائل اوبا