گوزومو آینه بندان ائله دیم سن گله سن

یولونا قیرمزی مرجان چیله دیم سن گله سن

وار یوخوم یالنیز اوره ک ده بیر اووج قانیمدی

اونودا یئرلره گوزدن اَلَه دیم سن گله سن

آناسیندان زورولا آیریلانان کؤرپه کیمی

باشیمی گویلره توتدوم مَلَه دیم سن گله سن

اسگی قونداغدا سیغینمیش سود امر آرزیلاری

گئجه نی گوندوزو آچدیم ، بَلَه دیم سن گله سن

شمع تک گاه سوزاریب گاه قیزاراردی جانیم

اونودا سون نفسیمله پیله دیم سن گله سن

اؤلورم دورما باری تورپاغیمین اوستونه گل!

گونده مین مرتبه اؤلمک دیله دیم سن گله سن

«ناظرم» عشقیم ، امیدیم ، هوسیم سنسن ، سن

هامی دان سینه م ائوین سیلکه له دیم سن گله سن