عزیزیم سن ، ننه باخ

ائوینه دؤننه باخ

مرادینا چاتماییب

چیراغی سؤننه باخ

 

گئجه نین آیینا باخ

اولدوزون سایینا باخ

یار یولوندا جان قویدوم

وئردیگی پایینا باخ

 

گنجه نین داغینا باخ

سولونا ساغینا باخ

دردیمی اینانمیرسان

گؤزومون آغینا باخ

آلمانی سویمادیم هئچ

بشقابا قویمادیم هئچ

یار من نن دویوب گئتدی

من یاردان دویمادیم هئچ

 

من عاشیقام آی مدد

اولدوز مدد ، آی مدد

دان اولدوزو باش وئریر

آیریلیق دیر ، آی مدد

 

عزیزیم غم داغیدیر

سینمده غم داغیدیر

زره جه اوزون گورمک

دریاجا غم داغیدیر

 

قاشلارین قمری دیر

تئللرین کمری دیر

دوه نی سروان اگسه

ایگیدی غم اریدیر

 

ائولری دربندده دیر

قیزیل گول پیوندده دیر

او قیزا سؤز دئمه یین

سئوگیسی غربتده دیر

 

اولکلر آیدان اوجادیر

نه آیدینلیق گئجه دیر

یاماندیر منیم حالیم

سنین حالین نئجه دیر؟

آخشاملار آی آخشاملار

چراغ یانار آخشاملار

یئرلی یئرینه گئدر

غریب هاردا آخشاملار