ائله بیر کیشی نین توت اتگیندن

بیل سنه ایمدادی اول ائیلر – ائیلر

ذره جه اوستونده اولسا نظری

یئردن داش گؤتورسن لعل ائیلر – ائیلر

بؤهتان دئمه ، بؤهتان توتار آدامی

قول ائیلر ، بازاردا ساتار آدامی

جهنم اودوندان بتر آدامی

یوخسوللوق یاندیریب ، کول ائیلر – ائیلر

عاقل اینسان دئمز هر گؤردوگونو

دالدالار دوشماندان وای دردیگینی

گؤرمزسن ناکسین پای وئردیگینی

وئرسه ده منتین بول ائیلر – ائیلر

«خسته قاسیم» دئیر سؤزون بو باشدان

پای اومما قوهومدان ، یاردان ، یولداشدان

اؤزون امک چکسن سو چیخار داشدان

اریدر داغلاری یول ائیلر – ائیلر