من عاشیق آی جامالا

یار الدن آی ، جام آلا

گؤتؤر اوزدن اؤرتوگون

باخیم بیر آی جامالا

 

کمان بلا اوخ بلا

ائل گله لی یوخ بلا

نامردله دوست اولانین

باشی چکر چوخ بلا

 

نارینجا باخ نارینجا

ساخلارام سارالینجا

اؤله یدیم قورتولایدیم

بو گونلره قالینجا

 

بو باغدا بار اولونجا

هئیوالار ناراولونجا

دیل آچار دلی کؤنلوم

سن منه بار اولونجا

 

آرخالیغی جوت یاخا

یاخاسینا گول تاخا

باش قویوم دیزین اوسته

جان وئریم باخا – باخا

 

صیادا باخ صیادا

تورون قوروب قایادا

تورونا ترلان دوشوب

آدامی یوخ اویادا

 

داغلاری ان پیادا

یولا گیر تن پیادا

گئدیریک حقی تاپاق

سن آتلی ، من پیادا

 

گول اکدیم گول مکاندا

یئرین بول گول مکاندا

سن گولدون منده گولدوم

من هاندا ، گولمک هاندا؟

 

قاپی دؤیه ن کیم اولا؟

آچ گلسین هر کیم اولا

اورگیمده کی درده

بلکه بیر حکیم اولا

 

عاشیق ناچار آغلاما

پیس گون گئچر آغلاما

بو قاپینی باغلایان

بیر گون آچار آغلاما