معاویه نین اؤلؤمؤ و یزیدین مدینه والیسینه مکتوبو

ابو مخنف لوط بن یحیاداندیر

ائل اوبا – بئله لیکله معاویه 60 – نجی ایلین رجب آییندا جهنمه واصیل اولدو.

قئیس فهری اوغلو ضحاک مسلمانلارین ییغینجاغیندا منبره چیخدی. معاویه نین کفنینی الینده توتوب دئدی :

معاویه عرب قومونون دیره گی ایدی . تانری اونون الی ایله بوتون فیتنه لری یاتیرتدی . اونو اؤز بنده لرینه سرور ائتدی.

اؤلکه لری اونون الی ایله آچدی . بوگون معاویه اؤلوب و بو کفن ایله ( ضحاک دمشق قاردینین امیری ایدی ) کفنله نیب باستیریلاجاقدیر.

شاهد اولماق ایسته ینلر گون اورتا چاغی حاضیر اولا بیلرلر.

بئله لیکله میندار یزید 60 نجی ایلین رجب آییندا خلافت تاختیندا اگلشدی.

او ، معاویه نین مدینه ده کی والیسی ولیده گؤندردیگی بیر مکتوبدا بئله یازمیشدیر:

« بسم الله الرحمن الرحیم : مؤمنلرین امیری یزیددن عتبه اوغلو ولیده . تانرینین بنده سی معاویه عؤمرو قدر یاشاییب و اؤز اجلی ایله اؤلموشدور.

تانری اونا رحمت ائتسین.»

او سونرا بیر آیری صحیفه ده بئله یازیر :

« ای ولید! علی اوغلو حسینی ، زوبئیر اوغلو عبداللانی و عؤمر اوغلو عبداللانی در حال و فرصت وئرمه دن یاخالاییب منیم اؤچون بیعت آل والسلام .»

یعقوبی بو روایتی اؤز تاریخ کتابینین ایکینجی جیلدینده 229 – جو صحیفه ده بئله یازیر :

« بو مکتوب سنه چاتماق همن علی اوغلو حسینی و زوبئیر اوغلو عبداللانی چاغیریب بیعتلرینی الده ائت . بیعت ائتمه سه لر بویونلارینی ووروب باشلارینی منه گؤندر. عمومیتله بیعت ائتمه ینین بوینونو وور. والسلام.»

معاویه نین اؤلوم خبری ولیده چاتدیقدا سارسیلیب آغلادی . او معاویه نین اؤلومونو بؤیوک بیر فاجعه بیلیب یزیدین مکتوبونداکی موضوع حاققیندا مصلحتلشمک اوچون حکم اوغلو مروانی چاغیرتدیردی.

محمد اوغلو هشام بو واقعه نی ابی موخنفدن روایت ائده رک بئله یازیر:

ولیدین مدینه یه والی اولماسی مروانی ناراحات ائتمیشدی . او مروان حاققیندا پیس سؤزلر دانیشمیشدی .

مروان ایسه اونون مجلسینه گلمیردی ، معاویه نین اؤلوم خبری گلدیکده ، ولید مروانی چاغیرماق مجبوریتینده قالمیشدی.

بئله لیکله مروان مجلسده حاضیر اولوب ، یزیدین گؤنده ردیگی مکتوبون مضمونونو ولیددن ائشیتدیکده «گئرچکده بیز تانریدانیق و اونا دوغرو قاییتمالی ییق (انا لله و انا الیه راجعون) و آللاه اونا رحمت ائتسین » دئیه آرتیردی :

نظریم بودور ؛ در حال بو اوچ نفری چاغیرتدیریب یزیده بیعت ائتمکلرینی ایسته یه سن اگر بیعت ائدرلر سنه یاخشی هر گاه بیعت ائتمه سه لر بویونلارینی ووردورارسان.

بو ایش ، اونلار معاویه نین اؤلوم خبرین بیلمده ن اول اولمالیدیر. یوخسا اونلار یزیدله مخالفت ائدیب مسلمانلاری اؤز طرفلرینه چکه جکلر.

ولید امام حسینی (ع) اؤز مجلسینه چاغیریر – نهایت ولید عؤمر اوغلو عبداللانی امام حسینی و زوبئیر اوغلو عبداللانی چاغیرماغا گؤندردی ابن عؤمر مسجیده گیریب امام حسینله ابن زوبئیره دئدی :

مدینه والیسی سیزی اؤز مجلسینه چاغیریر اجابت ائدین. اونلار سن گئت بیز گله جییک دئیه جواب وئردیلر.

ابن زوبئیر ، « بو واختلار ولید مجلسینده اوتورماز. بیزی نه اؤچؤن چاغیریر؟» دئیه امام حسیندن سوردو.

گئرچکده بو چاغیریش جمعه گونو اولموشدو. بوگون ایسه هفته نین تعطیل گونو اولدوغوندان والی مجلسده اولمازمیش.

امام حسین علیه السلام بویوردو: من بئله ظن ائدیرم کی اونلارین طاغیسی اؤلوب و خالق بو خبری بیلمه زدن اول بیزده ن بیعت آلماق ایسته ییر.

ابن زوبئیر: منده بئله دوشونورم. سن نه ائده جکسن؟ دئیه سوردو.

امام حسین (ع) بویوردو : گنجلریمی (جاوانلاریمی) توپلاییب مجلیسه گئده جه یم.

مجلیسه گئتمگیندن قورخورام.

چاغیریشلارینی رد ائتمک امکانیم اولمایینجا مجلیسه گیرمه رم.

بئله لیکله امام حسین (ع) اؤز کؤمکلرینی توپلاییب گئتدی . ولیدین قاپیسینا چاتدیقدا بویوردو : من ایچری گیریرم. سیزی چاغیرسام یاخود ولیدین سسی اوجالسا ایچری گیرین یوخسا گودون من ائودن چیخیم

امام حسین (ع) ولیدین مجلسینه گئدیر

امام مجلیسه داخل اولوب سالام وئردی . مروانی اورادا گؤروب ( سانکی معاویه نین اؤلوموندن بیر شئی بیلمیر) «صله رحم یاخشیدیر» دئیه سؤزونه داوام ائتدی « تانری آرانیزدا باریشیق یاراتسین».

اونلار بیر سؤز دئمدیلر. امام اگلشدی. ولید یزیدین مکتوبونو اوخویوب و مؤعاویه نین اؤلوم خبرینی وئردی . سونرا امامدان بیعت ایستدی.

امام حسین علیه السلام بویوردو : «گئرچکده بیز تانریدانیق و اونا دوغرو قایتمالی ییق (انا لله و انا الیه راجعون) بیعته گلدیکده منیم کیمی بیر آدام گیزلی بیعت ائتمز ، سن ده بو بیعتی اهالی آراسیندا اولماسا قبول ائتمیه جکسن ائله دئییل می ؟

ولید بلی دئیه جاواب وئردی .

امام حسین (ع) بویوردو : اهالینی بیعته چاغیراندا بیزیده چاغیر.

بو ایشدن جانینی قورتارماق ایسته ین ولید دئدی : گئت گیلن خالق ایله بیرلیکده بیعت ائدرسن.

مروان اؤزونو ولیده توتوب دئدی : « آند اولسون آللاها حسین ایندیجه یزیده بیعت ائتمسه چوخلو قان توکولمه دن اونا ال تاپا بیلمه یه جکسن. مجلیسدن چیخماغینا اذن وئرمه یا بیعت آل یوخسابوینونو وور .»

امام بو سؤزلری ائشیتمک همن یئریندن قالخیب

« ای زرقا اوغلو : ( وهب قیزی زرقا جاهلیت دؤورونده بایراقلیبیرقادین ایدی . بو سؤزون امام طرفیندن دئییلمه سی بهتان دئییل و قذف حساب اولونماز. قرآن کریمده ده موغئیره اوغلو ولید حاققیندا دئییلیر : « عتل بعد ذلک زنیم » زنیم ایسه لغتده نسبسیز دئمکدیر.)

ای زرقا اوغلو : سنمی منی اؤلدورجکسن یوخسا ولید؟

آللاها آند اولسون یالان دانیشیب گناهکار اولدون » دئیه اؤز کؤمکلری ایله بیرلیکده ائوینه قایتدی.

خوارزمی مقتلینده امام حسینین بو سؤزونو آیری حرفلرله روایت اولوتاندان سونرا آرتیریلیر:

« بیز رسالت معدنی ، پیغمبر اهل بیتی ، ملائکه لرین و تانرینین رحمتی نازل اولان یئریک. تانری بیزه گؤره اموراتی آچیب باغلار . یزید ایسه فاسق ، سرخوش ، ناحاق یئره قان تؤکن و آیدینجا فساد ایشلری گؤرن بیرآدامدیر . منیم کیمی بیر اینسان اونون کیمی بیر فاسده بیعت ائتمز. لاکین بونونلا بئله صاباح آچیلار و کیمین بیعته لایق اولدوغونو گؤره ریک» معلوم اولدوغونا گؤره بو اثنادا سس اوجالیر و امامین کؤمکلری مجلسه گیریب مروانین مراما چاتماغینا مانع اولورلار.

هشام تاریخ کیتابیندا ( بئشینجی جیلد 339 – جو صحیفه ) ابو مخنفدن و خوارزمی مقتل کتابیندا (184 – جو صحیفه ده ) بو روایتی عینی شکیلده بئله یازیرلار : مروان ولیده دئدی : سؤزومه باخمادین آند اولسون آللاها حسینه بیر داها بو آسانلیقلا ال تاپا بیلمه یه جکسن .

ولید اونون جاوابیندا دئدی :

اؤلوم اولسون سندن باشقالارینا ای مروان سن منه دینی مین آرادان گئتمه یولونو سئچدین . آند اولسون آللاها حسینی اؤلدورمک اؤچون شرقدن غربه کیمی دنیا مالی وئریلرسه سئومیرم. و اند اولسون آللاها بئله ظن ائدیرم کی ، حسینی ئولدورنین ترازوسو قیامت گونو یونگول اولاجاقدیر.

و شیخ مفید (ره) ین ارشادیندا (201 – جی صحیفه ده) نقل ائتدیگینه گؤره بورادا مروان ولیده دئییر: اگر نظرین بودورسا یاخجی بیر ایش گؤردون.

قایناق : کربلا ماجراسی ، روایت : ابو مخنف لوط بن یحیاداندیر ، نشر ائدن : اسلامی تبلیغات تشکیلاتی ، تدقیقاتچی : شیخ محمد هادی یوسفی ، چئویرن : شیخ عباس امامی کرکوکلو ، دیجیتال یاییمجیلیک : ائل اوبا