عقیل اوغلو مسلیمین شهادتی

سونرا زیاد اوغلو امر ائتدی مسلیمی دارالاماره سارایینین دامینین اوستونده باشینی کسیب نعشینی یئره آتسینلار.

ایش بو یئره گلدیکده جناب مسلم اشعث اوغلونا دئدی: آللاها آند اولسون هرگاه منه آمان وئرمه سئیدین تسلیم اولمازدیم. دور قیلینجینی گؤتور منی مدافعه ائت.

چونکی من سنین آمانیندایام ، اشعث اوغلو گلیب ، حمران اوغلو بکیرین مسلیمی قیلینج ایله وورماغینی ، مسلیمین ایسه اونو نه کئیفیتده اؤلدورمگینی هابئله مسلیمه آمان وئرمک مجبوریتینده قالماغینی زیاد اوغلونا دئدی.

زیاد اوغلو ، «سن کیمسن کی آمان وئره سن؟» دئیه آرتیردی: بیز سنی مسلیمه آمان وئرمگه یوخسا توتوب گتیرمگه می گوندردیک؟ اشعث اوغلو دینمدی.

سونرا زیاد اوغلو مسلیمین قیلینجلا ووردوغو آدامی ایسته ییب امر ائتدی کی ، مسلیمی آپاریب سارایین دامینین اوستونده بوینونو وورسون.

بکیر احمری اونو داما چیخاردار کن اوحضرت اوجا سسله الله اکبر دئییر ، استغفار ائدیر ، صلوات گوندریر و دئییردی:

ایلاهی بیزله بونلارین آراسیندا حوکم ائت گیلن. بونلار بیزی آلدادیب یالان ساتیب و ذلیل ائتدیلر. نهایت بکیر احمری اونو آپاریب بوینونو ووروب جنازه سینی دامدان یئره آتدی قاییداندان سونرا زیاد اوغلو ، «مسلیمی اؤلدوردونمو ؟» دئیه سوردو. بلی ، اؤلدوردوم دئدی.

زیاد اوغلو سوردو : مسلیمی داما چیخارار کن نه دئییردی؟

بکیر : الله اکبر سبحان الله استغفرالله دئییردی. اونو اؤلدورمک ایستدیکده ایسه دئییردی: الاهی بیزله بونلارین آراسینداسن حؤکم انت. بونلار بیزی آلدادیب یالان ساتیب اولدوردولر من اونا یاخینا گل دئدیم. بیر قیلینج ووردوم کار کسمدی ایکینجیینده باشینی بد نیندن آییریب اولدوردوم.

سونرا جناب مسلیمین باشینی زیاد اوغلونا گتیردیلر.

دیگر طرفدن سعد اوغلو ، زیاد اوغلونا بیلیرسنمی؟ مسلیم منه نه دئمیشدی؟ دئدی . سونرا مسلیمین گیزلی وصیتینی اونا دئدی.

زیاد اوغلو دئدی: بو او دئمکدیر کی ، امین کیمسه خیانت ائتمز، لاکین بعضا خائن آدامین یانیندا دا امانت قویارلار ، وصیته گلدیکده بیز مانعیچلیک تورتمیه جی ییک نه ایسته ییر سنسه اونو ائت گیلن ، حسین حاققیندا دئملی یم

کی ، بیزیمله ایشی اولمازسا اونونلا ایشیمیز اولمایاجاقدیر. مسلمین جنازه سینه گلدیکده اونو اؤلدورموشوک نه ائدیر سنسه ائت.

 

عوروه اوغلو هانینین شهادتی

حضرت مسلمین شهادتیندن سونرا زیاد اوغلو ، هانی نی اولدورمه مک خصوصوندا اشعث اوغلونا وئردیگی سؤزونه وفا ائتمدی (قید ائتملی ییک کی، اشعث اوغلو هانی نی ائودن گتیرنده هانی طایفاسی دوشمنچیلیک ائتمه سین دئیه زیاد اوغلو اونو اؤلدورمه ییب اشعث اوغلونا هدیه ائده جگینه سؤزن وئرمیشدی.) بوتون بونلارا باخمایاراق زیاد اوغلو اونو بازارا چیخاریب بوینونو وورماغا امر وئردی.

نهایت هانی نی قولو باغلى حالدا بازارا گتیردیلر. او یاردیم تاپماق اوچون هارای چکیردی: چاتین دادیما ای مذحج طایفاسی! بوگون مذحج طایفاسیندان بورادا یوخدور مو؟ هاردادیر مذحج؟

سونرا کؤمکچی بیر کیمسه گورمه دیکده الینین بیرینی ایپدن چیخاریب دئدی: آدام اؤزونو قوروماق اوچون آغاجدان بیچاقدان داش دان ، سومو کدن زاددان یوخدرو مو؟

جماعت تؤکولوب قوللارینی برک باغلادیلار و «بوینونو اوزاد » دئدیلر.

هانی – بو ایشه سخاوتلی دئییلم و اؤزومو اؤلدورمکده سیزه یاردیم ائتمرم. دئدی زیاد اوغلونون رشید آدلی تورک غلامی ایره لی گئدیب بوینونا بیر قیلینج ووردو کار کسه بیلمدی.

هانی دئدی: آللاها دوغرودور قاییدیش. الهی سنین رحمتینه و رضایتینه دؤنورم. او ملعون ایکنیجی ضربه نی ووروب هانی نی اؤلدوردو (اونون باشینی زیاد اوغلو اوچون آپاردیلار.)

 

اونلاردان سونرا شهید اولانلار

زیاد اوغلو مسلیمی و هانی نی اؤلدوردوکدن سونرا شهاب اوغلو کثیرین حبسه سالدیغی عبد الاعلى الکلبی نی چاغیرتدیریب ، احوالینی منه دانیش دئدی.

کلبی، آللاه کؤمگین اولسون دئدی چیخدیم گؤرم جماعت نه ائدیر ، شهاب اوغلو کثیر منی یاخالادی. زیاد اوغلو اونون آند ایچمگینی ایستدی.

او آند ایچمدی. زیاد اوغلو «آپارین» دئدی « جبانه السبیع محله سینده بوینونو وورون.» جلادلار اونوندا بوینونو ووردولار.

سونرا جناب مسلیمه یاردیم ائتمک ایستدیگینه گؤره حبسه آلینان عماره صلخب ازدی نی گتیردیلر.

زیاد اوغلو، «هانسی طایفادانسان ؟» دئیه سوردو ؟

عماره، «ازد طایفاسیندانام»، دئدی.

زیاد اوغلو اونوندا اؤز طایفاسی آراسیندا بوینونون وورولماسینا امر ائتدی. بئله لیکله اونوندا بوینو وورولدو.

قایناق : کربلا ماجراسی ، روایت : ابو مخنف لوط بن یحیاداندیر ، نشر ائدن : اسلامی تبلیغات تشکیلاتی ، تدقیقاتچی : شیخ محمد هادی یوسفی ، چئویرن : شیخ عباس امامی کرکوکلو ، دیجیتال یاییمجیلیک : ائل اوبا

Print Friendly, PDF & Email